1 PITAR 3 - ITHAR CHONGHAK

Rumee Saanglam

¹ Havi vaange rumee ae, nenfhuwsar ae dernache ongruw, achuw yngkheh ing chongchu manjiimah nave, nenongtu inche enuwchu chehva nenta. Eningna ichong paknii omahnii.

² Enuw ing nenongtuchu aajaehmeh ynthiingva vokhehkho ynjasuwhva ichiichu muvaatae.

³ Nenuw nensakniichu taangna ynthongchuw sam iphen, sana sanak nenten vokhehkho isapak peendiir ingkhe ynsuwhmah rasii.

⁴ Changvakonchu mik barengna amen iruwpak maangmah vachii iduwrjaeh re isa ivaar laetha yndangchehmah barungriir inche nensakniichu ynsuwhrasii.

⁵ Chukhaenache isivasahna ynthiing rupanuw aenche eningmandenchu Thangnang ningna siiaeka enfhuwsarsah dernache isiae inche emasak saknii ing entu.

⁶ Havi vaange Sara ing Abraham chu aafhuw taka achongriir amanjii. Nenuw atii ichiifhuw omchu chiiru ing ichumchu tutanuwve, nenuw ama asanuwchu vachuw.

⁷ Amavaangche fhuwsar ae, nenrumee aechu isuursahpae ichiichu manghuw nuwna, vokhehkho Thangnang kikthuur iringniichu nenuw thohche enuwkho phahak vachiipae tanuwna bariimsa ae tanuwka paarhakva nenchiiva. Havi turuw amana chembe nenthamsahchu yntongmahnii.

Khristian Ningsiih

⁸ Akuurchiimna, nenuw nengkheng barungriir yngkhehpang, yngkheh yngkheh ningsiih, unae ningsiih vaang, mee achaarpeeh vokhehkho ynjuursah ing omruw.

⁹ Isamah khaena isamah ing barimahruw, ithipak ing eesaetahna ithipak ing vesaereeh mahruw, ama changdenna bor piruw, akhaechuve nenuw ing bor nenphanii khaenache havi khaena yngeenva.

¹⁰ Ynthiing thiimziih ing ariirchuve, “Nungae ringkum aning amansiih vokhehkho isa iniichu muningka achii mee inche, isamah tangmah ichong vokhehkho ichummah chong iriir manchenrasii.

¹¹ Ama ing isamah nongtu tanii hunganrisana amanche ichumchu turasiing; ama ing idaechu jongsana atuwhnii ing turasiing.

¹² Akhaechuve Aafhuw ing ichum ynthiing ae taklina aabuwrnah vokhehkho enthamsah nache arungaepeehnah; changvakonchu isamah atu mee chuve rupeehmah.”

¹³ Nenuw isachu tunungka nenchii raenche nentaklina isamah tuvachiichu achuwva?

¹⁴ Changvakonchu nenuw ing ichum khaena ijachaam khaang tanuwve bor nenphava. Enuwchu chiimah aeruw vokhehkho jamahruw.

¹⁵ Changvakonchu nenbarungriir sungna Khrista chu ynthiing Aafhuwva tanuwna ruruw. Apha vakhaena neningna om ningmandenchu riirruw ta ae naka ynsii ae raenche ynsangnii khaena thoraang tujaehruw, chang-vakonchu iduwrjaeh ing vokhehkho ynjasah thoh ynruw ing turuw;

¹⁶ Vokhehkho nenruwthuwhchu manthiing rasiing, amana chembe Khrista aanuwjii yngkheh ing isa nenongtu nache isamah ing chong ae naka ningjak ympiae raenche ningjak phasa vaate.

¹⁷ Thangnang ing havi amandenchu vanave, nenuw ing isamah nentutahna ijachaam nengkhaang changve, isa nentutahna ijachaam nengkhaang inche saksehna.

¹⁸ Thangnang ningtingche nenuwchu ihenruwnii khaenache ichummah ae changdenna Khrista ing isii icher khaena vokhehpang ynthikpeehpa; atakchu hakchaang nache thiksa, changvakonchu laetha nache aman-ringpa,

¹⁹ amanche alaetha iring inche sika kaeshum sungna ong laetha ae ningnache ama ing avatongpa.

²⁰ Ajae Noah aaniina ruwkuwngchu aturaenche, Thangnang ing iseehpak ing khaangka ahah ae raenche laetha aenche chongriir manjiimah ae; ruwkuwng sungnache mee topohpang ae, amachuve mee eeriih rikchu chii inche akarpae,

²¹ chii inche amachu vaangche baptais yntu inche atii nenuwchu yngkarpa. Havi hakchaangna imang ynrinii khaena mahva changvakonchu Jesu Khrista ihangring ajaarnache, Thangnang yntongting isa barungriir om ajong-niiva.

²² Aafhuw chuve thangbaen ting karka, vaarmee aekho, ruwreng om vokhehkho aatuaricheh aekho aangkhenglaang aderna amangompa.