1 PITAR 2 - ITHAR CHONGHAK

Iring Rung re Ynthiing Jaati

¹ Chukhaenache isamah chaap, mare om, isachaang itu, kallak om vokhehkho thaechii thaenam chong aangkheng bathenchir nuwna,

² naeduung ijungompeh vaangkhe, ynthiingtatak chongsae shangkhomchu idiktherruw, amana chembe nenuw hungruung tanuwka,

³ Aafhuw i tungsiih ihaeva ichiichu atatak ing manghuwva nenta.

⁴ Mee ae ing atatak ing enrupeehmah changvakonchu Thangnang inchembe aateer vasah amen iruwpak iring rung aningtingche nenuw ihuungvachuw.

⁵ Jesu Khrista ajaarnache Thangnang ningna irupeehvachii ing laethacher chaathachu ipinii khaena, ynthiing jaethiim pham vinii khaena, nenuw nentaksahchu iring rung ae vaang, laetha eenchu nemangiirva.

⁶ Chukhaenache ynthiing thiimziih nakho ynthinna, “Enruw ki ing Zaion nache athurfhuwrungchu, ynteer vasah amen iruwpak kasiihsa, aningna athacha meechu utaraenkho ningjak phamahnii ae.”

⁷ Chukhaenache athacha nening nache rung havi amen iruwpakva; changvakonchu chongriir ynjiimah ae ningna chembe, “Een itu aeng enrimah rungchu athurfhuwrungchu hunginsuwhsa,”

⁸ Vokhehkho reentaang yngkhehna jinge ariirsa, “Haviva mee ae khi mansiinii, vokhehkho engaanruumnii rungchu.” Enuw ing chongriir emanjiimah tahnache chongsae nache engkhi emansiiniipa; havikho engkhaena chembe enlaepah ynsuwhsa.

⁹ Changvakonchu nenuw chuve eeteer sungkhur, iruwng jaethiim, iseeng jaati, vokhehkho athurfhuw Thangnang meechu vachuw, ama inche ynthim lipah tanii angakpa yngkheh ireng tingche yngeenchu itongnii khaena ynsuwhsachuw.

¹⁰ Apha vokhehna chembe nenuw Thangnang meemah vachuw, changvakonchu atiive nenuw ameechu ynsuwh sachuw; aningsiih phamahchuw changvakonchu atiive aningsiihchu nenphapa.

Thangnang Suwh ae

¹¹ Kaningsiih kaarang ae, laetha taklina laar atuk hakchaang ing aadik tanii ingahnii khaena lamkhii mee vokhehkho marpah mee aevaang kathamsahnahchuw.

¹² Reentaang mee ae kaarna nenong mansakruw, amana chembe enuw ing nentaklina isamah atu meepae ichii ing enchonglae, nenongtu isachu muae naka Thangnang manpahnii vaatae.

¹³ Aafhuw khaenache laaruw mee ing jiivachii chongjeer vakhae derna ongruw, iruwng ing aangkaangseh vakhaeka aderna ongruw,

¹⁴ vokhehkho lipah aapuh vakhangnare, isamah atu mee ae miraar ipeehnii khaena vokhehkho isa nong atu mee aechu ympahnii khaena Aafhuw ing enuwchu ajenchiirpae.

¹⁵ Akhaechuve haviva Thangnang ing amandenchu, isa nong nentu inche amanghuwmah iveermah aechu enghuw mandaenii rasii.

¹⁶ Ruwkuwrjoh mee vaang nenuw paarruw amanche ruwkuwrjoh inche isamahchu mangkhumnii mahruw; changvakonchu Thangnang suwhvaang paarruw.

¹⁷ Mee vakhae ijaaruw, unae ae vakhaechu nening mansiihruw, Thangnang chu chiiruw amanche iruwng chukho ijaaruw.

Khrista Ijachaam Ynghuwnii

¹⁸ Meenae ae, nengafhuw aechu nengajathoh ynruw ing abarungriir isa vokhehkho iduwr ningna chenpang mahka, abarungriir ithi derna chenkho ongruw.

¹⁹ Akhaechuve Thangnang ting abarungriir manruwh naka ichum atu khaena ijachaam aphachu khaangcheh nave ympahfhuwva.

²⁰ Akhaechuve nenuw ing isii nenrang tahna rumor nensahchu ynchii ympahfhuw omkhang! Changvakonchu nenuw ing isa nentutahna ijachaam badaar tanuwve, Thangnang maanache ympahfhuw vachuw.

²¹ Yngkhaena ynchii imbe havi ipha inge nenuwchu yngeenpa, nenuw ing Khrista akhiknuwchu aanuw ijiinii khaena neningna buwtinnii imapeehka, Aafhuw ing nengkhaenache ijachaam yngkhaangpeehpa.

²² Aafhuw chuve isii tumahdeh, amanche aner nakho ichummah chong yntangakho siimah-muw.

²³ Ataklina ningjak pikhang ae nakho, ama ing huw verimah; ama ing ijachaam apharae mee manchiihmah, changvakonchu ichum ynthiing ing vajeer atu Thangnang ningnache atakchu ynsirsah.

²⁴ Inuw ing isii icher ing thikmuwka ommuwchu ichum ynthiing ing ynringnii khaenache, Aafhuw ataksahrap ahakchaang nache thing taklina inuw vakhae isii icherchu ynreenpeehpa. Ama ing rumor asahnii abuw inche nenuwchu ymmandampa.

²⁵ Nenuw chuve jao aeng enjiinii lam emamoh vaang ichii vasah vachuw, changvakonchu atiive nenuw nenlaetha aacheer vokhehkho eengahpeeh Aafhuw ningtingche hunganrisachuw.