1 JOHON 4 - ITHAR CHONGHAK

Ichum re Ichummah Laetha

¹ Kauw kanae ae, laetha ynthiing kaningna omna achii mee chaap thacha mahruw, changvakonchu eningna om laethachu Thangnang ningtaniiva ningtanii mahva ichiichu nenuw ing ibuwrnehruw. Akhaechuve ichummah jaephar aajaeh ing apham aangkhenglaangna sisae.

² Jinge ichii ing Thangnang ningtanii laethachu nenuw ing manghuw chehva nenta: Achuw yngkheh mee ing Jesu Khrista ing hakchaang inuwzii ing juwngsa taka aru laetha chaapchu Thang-nang taniiva.

³ Changvakonchu achuw yngkheh ing havana Jesu Khrista akhae i manghuwmah nave, Thangnang ningtanii ynthiing laetha aningna omah mee chuva. Aningna om laetha chuve Khrista arumah mee ningtaniiva. Hangchii i thengvaata ichiichu nenuw ing nemanghuw vasahva, atii laaruw paamne thengka omsa.

⁴ Changvakonchu kasitiae nenuwve Thangnang tavachuw, vokhehkho ichummah jaephar aechu nencheh vasahva, chutahnache neningna om ynthiing laetha i laaruw paam tanii athiseh ing ipirsehva.

⁵ Ichummah jaephar ae inge laaruw paam ta khaenapang ichong paetah, vokhehkho laaruw paam ing arungaechu yng-khaenava ynchii imbe enuw laaruw paam ta engaansuwhtah nava.

⁶ Changvakonchu inuw chuve Thang-nang tavamuw. Achuw yngkheh ing Thangnang manghuw nave kenuw ing kenriirchu arungaenah; achuw yngkheh Thangnang tamah vanave kenuw ing kenriirchu rungaemahnii ae. Jinge ichii ing ichum laetha vokhehkho ichummah laetha ruwrakna aantheepniichu inuw ing manghuwcheh vataruw.

Thangnang chuve Ningsiihva

⁷ Kauw kanae ae, yngkheh re yngkheh ningsiih ympitaruw, akhaechuve ningsiih i Thangnang ningtaniiva. Achuw yngkheh ing meechu aning mansiih nave Thangnang siti chuva vokhehkho Thangnang amanghuw mee chuva.

⁸ Achuw yngkheh ing mee aning mansiih chehmah nave Thangnang chu amanghuw mahva, akhaechuve Thangnang chuve ningsiihva.

⁹ Amanche Thangnang ing inuwchu aning ymmansiih khaena asapa yngkhehpangchu laaruw paamna ynjebathenpeehpa, akhaechuve inuw vakhae ing ama ajaarna iringnii ringkumchu phanii khaena chenva.

¹⁰ Haviva ningsiihchu: Thangnang chu inuw ing ynning ymmansiih tahna mahva, changvakonchu ama ing aning imansiihka inuwchu isii tanii ikuhpeeh phanii khaenache asapa chu ajenbathenpa.

¹¹ Kauw kanae ae, jinge ichii ing Thangnang ing inuwchu aning ymmansiih vakhaka, inuw yngkheh re yngkheh ningsiih ympivaan chiiva.

¹² Achuw ingkho Thangnang chu mumahri, changvakonchu yngkheh yngkheh ningsiih ympi manuwve, Thangnang thohche inuw yntuwhak vamuw, vokhehkho ynning nache aningsiihchu manthiingsa.

¹³ Inuw vakhae i Thangnang thoh yngkhehpang ing om manuw vokhehkho Thangnang i inuwthoh yngkhehpang ing omna ichiichu iseengkiir ing ymmanghuwsa. Akhae-chuve alaethachu ynning nache ympeehpa.

¹⁴ Apa Thangnang ing laaruw paam ikarpeehnii khaena asapa ajebathenchu inuw ing ymmusa vokhehkho reentaang ae ningnakho ynjeersa.

¹⁵ Achuw yngkheh ing Jesu i Thangnang sitiva tanaka riirnave, ama meechu Thangnang thoh yntuw ing ongna vokhehkho Thangnang ingkho amathoh onghakna.

¹⁶ Thang-nang ningsiih ynningna om havi inuw yntaksah ing ymmanghuwsa vokhehkho ynthachasa. Thangnang i ningsiihva, achuw yngkheh ing ningsiih nache paar-nave, Thangnang thoh yntuw ing paarna vokhehkho Thangnang inche amathohche yntuw ing paarna.

¹⁷ Ynningna ningsiihchu mapung amanphapa, akhaechuve vajeer inii nache inuw ing thona yndeennii khaenava; vokhehkho inuw ing deenvataruw akhaechuve laaruw paamna yngringkum i Khrista thohche aanghaksamuw.

¹⁸ Ningsiih ing ynchik omah; ichum ningsiih ing ynchik om aangkheng athurchirva. Chunave achuw mee yngkheh ing ynchik nave aningna ichum ningsiihchu aommah tahnava, ynchik inche vajeernii vaata.

¹⁹ Inuw ing Thangnang ynning ymmansiih i ama ing amaensana aning ymmansiih tahnava.

²⁰ Achuw yngkheh ing Thangnang chu kaning kamansiihva tanaka, auwnae batir nave aningna ichum omahsa. Akhaechuve amik ing amu auw anaechu aning mansiih chehmah nave, amumah Thangnang chu aning mansiih chehmahnii.

²¹ Thangnang ing chonghak ympeehchu haviva: Thangnang aning amansiih mee inche auwnae chukho aning mansiih vachiiva.