Ŋaŋalue 1 - O Vatavata we Garaqa 1931 (Vanuatu)

¹ O Ŋaŋalue mon Jesus Christ, God me la ti munia, sin gaganag munra rowrowovag anana o gene ŋaŋ me vet si a rasu gaplot ma; wa ni me vaglala apena, me suware at mun i angel anana sur i John o rowrowovag anana;

² wa ineia qara gaganag weswes at o vavae mon God, wa o vavae gaganag we tira mon Jesus Christ, o savasava ŋaŋ ni me ilo.

³ Turwia i gene we vasvasogo, wa iragai we tiŋtiŋqoro o vavae ŋaŋ tape liŋe prophet iloke, wa we kokor mora o gene ŋaŋ me rave siwo alolona; ape o masao qoŋ we arivtag.

⁴ I John mun o loglue lavearua we toga a Asia: O sogov mun kamiu wa o tamata tamen i gene we toga, wa me toga ti, wa te mule ma aŋaisa, wa tamen o Vui lavearua we toga ape nago tano putepute anona,

⁵ wa tamen i Jesus Christ i gaganag we tira we nun, i matagaraqa nan ra mate, wa i moai goro ran maranaga ŋaŋ talo tano. Naŋ mun i gene we tape nina wa me vasug wenewene nina ti nan napuganina alo tur narana,

⁶ wa me ge nina si nina a qeteg marana, o oloolo ŋaŋ mun God ineia wa i Tamana, munia gina o leŋas wa o riga goro ti tuai ti tuai. Amen.

⁷ Ilo, ti susurut ma alo maligo ŋaŋ, wa val matai te sagaragia, wa iragai ŋaŋ me asia ti, wa val veve ŋaŋ talo tano te tut navarara ape neia. We nun, Amen.

⁸ Inau i Alpha wa i Omega, amon i Lord God we vava, i gene we toga, wa me toga ti, wa te mule ma aŋaisa, i riga goro ronronotar.

⁹ Inau i John, i tasimiu nake, wa we taur pul amen kamiu alo ganawono wa alo marana wa alo liŋe roŋo malumuaga alo i Jesus Christ, nau me goara alo nat vanua we log si Patmos, o manigiu o vavae non God, wa we gaganag we tira ape Jesus.

¹⁰ Naŋ nau alo Vui alo qoŋin Lord; wa na me roŋotag ma nan ape kulak o liŋai liwoa tama o liŋe tauwe,

¹¹ we vava wa si, O savasava ko we ilo, ko rave siwo alo book, wa ka vatraŋ at mun o loglue lavearua we toga a Asia; i Ephesus ke, wa i Smurna, wa i Pergamum, wa i Thuatira, wa i Sardis, wa i Philadelphia, wa i Laodikea.

¹² Naŋ nau me kilau ris si na ilo mok o liŋai me vava ti munau; wa me kilau veta na me ilo o tano pul lavearua o gold,

¹³ wa alo vatitne tano pul iloke isei tama o nat tanun, me saru goroa mun o siopa we niŋa siwo ape malekana, wa me rotig goroa avawo sus mun o rotig gold.

¹⁴ Wa naqatuna wa nauluna we aqaga les tama o ul sheep we aqaga, tama o wena maremare; wa namatana tama o garame av;

¹⁵ wa namalekana tama o bras we veveramule, tama me ge wenewene alo vasawu av; wa naliŋana tama o liŋe pei tar.

¹⁶ Wa ni me taur alo pane matuana o vitu lavearua; wa nan navalana o gasal ape vagalo o nagoi tavalirua we tup we rowrowolue; wa nanagona tama o loa we siŋasiŋa alo non o vavakae.

¹⁷ Wa na me iloa, wa na me mas siwo goro namalekana tama me mate; naŋ ti taŋov nau mun napanena o matua, ti vet munau wa, Nipea gogolo, inau i moai wa i paspasoanai,

¹⁸ wa i esu, pa na me toga tamate ti, wa ilo, nau we esu ti tuai ti tuai; wa na we taur mok o ki ŋaŋ tape Panoi wa tape Matea.

¹⁹ O gene ŋaŋ ko me ilo veta ka rave siwo, wa o gene ŋaŋ we toga ilokenake, wa o gene ŋaŋ te qeteg rasu ma ape kule gene iloke ŋaŋ;

²⁰ o gene vagis nake, o vitu lavearua ko me ilo alo pane matuak, wa o tano pul lavearua o gold. O vitu lavearua, ira angel tape loglue lavearua nake, wa o tano pul lavearua o loglue lavearua nake.