Munra ta Philipi 1 - O Vatavata we Garaqa 1931 (Vanuatu)

¹ I Paul tana i Timotheus, o rowrowovag ŋaŋ anan i Christ Jesus, mun ra roŋo nol alo i Christ Jesus we toga a Philipi, wa munra bishop ŋaŋ wa ra dikon ŋaŋ amaira:

² O sogov mun kamiu wa o tamata, amen God i Tamanina ma wa amen i Lord Jesus Christ.

³ Nau we wievavae God inau alo nok o lolomaran kel nol apen kamiu;

⁴ wa vagae, alo val nok o liŋe tiatias apen kamiu nol, na we tataro tiatias mun o qaraqara,

⁵ o manigiu nomiu o pul saratuwale si a piriŋ o lea we wia alo qoŋ ran o moai gai niŋa ilokenake.

⁶ Wa na we matueg avune ike nake, si i gene me qeteg raka ti alo ikamiu o gagapalag we wia, si amona nane te ge vunvun ran gai niŋa naqoŋin i Jesus Christ.

⁷ Tama we taniniga gina si na nonom tamaike apen ikamiu nol, ape na we taur kamiu alo lolok; wa o manigiu apena, alo nok o garotrot, wa alo nau we vava isvitag, wa we vatira o lea we wia, kamiu nol we taur saratuwale o sogov amenau.

⁸ Ape God te gaganag mona we tira ape nau, si naloloksa sur kamiu nol alo lolomagarosa non i Christ Jesus.

⁹ Wa nau we tataro ape ike nake, si nomiu o tapeva ni ura taso sal alo gilagilala wa alo we nom vaglala nol;

¹⁰ o manigiu si kamiu a veveg lai ape gene ŋaŋ we tur raka sage; wa si kamiu a toga vatawasai, wa nipea tutuag ilo gai niŋa naqoŋin Christ;

¹¹ me ge ura veta gina kamiu mun o wo liŋe taniniga we tamen Jesus Christ ma, si a log leŋas wa we varean God apena.

¹² Pa inau we maros kamiu a lolomaran momiu, ra tatasik, si o gene ŋaŋ me ge nau ti, pa me rowolue raka sage si a wurvag o matesala mun o lea we wia.

¹³ Ape nok o garotrot me ŋaŋalue lai apena alo i Christ alo ima maranaga nol, wa mun ragai we sea nol;

¹⁴ wa mulaŋ o retatasiu we qoqo alo i Lord we sov lai naapera ape nok o garotrot ŋaŋ, wa we nom mot aneane nan amoa apena si neira gaganag o vavae wa gate gogogolo.

¹⁵ Pa o tuaniu mun o matawolowolo wa o leleasag, wa o tuaniu mulaŋ mun o lolowia we maŋmaŋasag i Christ.

¹⁶ Wa o tuaniu o manigiu o tapeva, ape neira we gilala si me vatriv nau si na vava isvitag ape lea we wia.

¹⁷ Wa o tuaniu we sororo i Christ o manigiu o matev leleasag, wa gate mun o lolovatawasai, we nonom si te tuan sage o qisaŋ wono ape nok o garotrot.

¹⁸ Pa o sava gai? Pa vagae valval, si mun o manig gale si mun o liŋe nun, ti maŋmaŋasag i Christ, wa alo iloke nau we malakalaka mok; we nun wa te qale malakalaka ran.

¹⁹ Ape nau we gilala si iloke te rowolue ma sur inau alo vaesuva, o manigiu nomiu o liŋe tatataro, wa we tuatuan mun o Vui non i Jesus Christ.

²⁰ Wa iloke tama nau we nom nerei wa we nom nerei apesov mok, si naapek tete maragai alo sava tea, nava si mun o toqai we tawela qet, tama vagae wa ilokenake mulaŋ, te ge ronoga i Christ alo turiak, si mun o esuva si mun o matea.

²¹ Ape mun nau gina o esuva i Christ nake, wa o matea o tano taur raka o moe gene.

²² Pa si o esuesu alo visogoi, si iloke nok o wo gagapalag, esi, nau te ilo raka mok avea? nau gate gilala.

²³ Pa me wonot inau tavalrua iloke; nau we tortoron mok si te mamasug inau, wa si na toga amen Christ, ape iloke we wia raka sage aneane;

²⁴ pa te piriŋ raka sage si na qale toga alo visogoi o manigiu ikamiu.

²⁵ Wa nau we sov naapek tamaike, wa we gilala si nau te qale toga wa te goara amen kamiu nol, si kamiu a poa tasovag wa we malakalakavag o nomtup;

²⁶ o manigiu nomiu o tano sotaliva te ura sal alo i Christ Jesus alo inau, mun nok o togara kel mulaŋ amen kamiu.

²⁷ Pa iloke tuwale, tur togag momiu vanua tama we sar ape lea we wia mon Christ; o manigiu si nau ta niŋa at wa we ilo mok kamiu, si nau ta ras, pa nau te roŋotag o gene ŋaŋ tamen kamiu; wasi kamiu we tiratira alo Vui tuwale, we gege leasag mun o atai tuwale ape liŋe nomtup talo lea we wia;

²⁸ wa kamiu gate toga gogogolo ilo apen ragai we tiratira goro kamiu. Wa ilone nane o vaglala mun neira ape neira te tagtagea; nava mun kamiu o vaglala ape o esuva, wa o qetegiu amen God ma.

²⁹ Ape me sogov veta ma mun kamiu, o manigiu i Christ, gate si kamiu a nomtup vires ineia, nava si kamiu mulaŋ a roŋo vivtig lai ape neia;

³⁰ ape namomiu mulaŋ si kamiu a varlai amaira, tama kamiu me ilo momiu veta alo inau, wa we roŋroŋotag si alo nau ilokenake.