Mathew 4 - O Vatavata we Garaqa 1931 (Vanuatu)

¹ Naŋ o Vui me vanogag i Jesus sage ilo vanua vanameag si i Satan ni gale iloa aia.

² Wa ni me matir wora o maran wa o qoŋ saŋavul vat, paso nan me maliŋsala.

³ Wa i meregale qara van ma suria, ti vet wa, Si iniko Natun God, ka vet ape vat ŋaŋ iloke si a ris bread nia.

⁴ Pa ni me valui goroa ti vet wa, Me rave veta wa, O tanun tete esu mun o bread vires, nava mun o val vavae ŋaŋ we rowo lue nan navalan God.

⁵ Naŋ i Satan ti vanogagia ilo laqlaqe vanua we roŋo, ti vatira neia vawo ŋorŋor ima we roŋo,

⁶ ti vet munia wa, Si iniko Natun God, ka rowo siwo; ape me rave veta wa, Ni te vareg ira angel ŋaŋ anana apeniko, Wa neira te sapalo kalo ko mun napanera, Nan ko wa tika taso wun naraŋoma ape vat.

⁷ Naŋ i Jesus me vet munia wa, Me rave mulaŋ wa, Ko tete meregale i Lord God iniko.

⁸ Naŋ i Satan me vanogag mulaŋ neia vawo qase tauwe we tole aneane, wa ti gaganag munia o marana ŋaŋ a marama, wa o leŋas tapena.

⁹ Ti vet wa, Na te le nol at iloke ŋaŋ muniko, si ko qe rowo taqa wa we vatieqau goro nau.

¹⁰ Naŋ i Jesus ti vet wa, Toa reag, Satan, ape me rave veta wa, Ko te vatieqau goro i Lord God iniko, wa ko te rowrowovag munia tuwale.

¹¹ Wa i Satan me rowo vitagia; wa ilo, ira angel ŋaŋ me mule ma we tataga suria.

¹² Naŋ i Jesus me roŋotag si me ukeg vano i John ilo ima rotrot, ni me sirig i Galilea;

¹³ wa ti toavtag o Nasaret, ti mule ti togatoga a Kapernaum a pan qilo, ape tiŋgoro vanua Sabulon wa Naphtali.

¹⁴ Si ilone te tira amon Isaia o prophet me vava apena, we vet wa,

¹⁵ O vanua Sabulon wa o vanua Naphtali, O matesala a lama, tavala Jordan, Galilea nora sul ŋaŋ we sea,

¹⁶ O sul me togatoga ti alo silsiliga, Me ilo o valawar liwoa, Wa mun ragai me togatoga ti alo masao matea wa alo malumalu tapena, O valawar me rowo raka muneira.

¹⁷ Naŋ alo qoŋ ilone i Jesus qara qeteg raka we toretore, wa we vava wa, Tur nomleas, ape o marana tavunana me rasu ma.

¹⁸ Wa ni me tatatale a pan qilo ta Galilea, wa me ilo o tatasiu pulrua, i Simon, navaruesasana i Peter, wa tasina i Andrew, we tultul o gape ilo qilo; ape rara o vaŋvaŋona.

¹⁹ Naŋ ti vet mun rara wa, Ura tataga inau, wa na te ge kamurua o vaŋvaŋon tanun.

²⁰ Wa rara me toavtag gaplot norara o gape ŋaŋ, wa me tataga ineia.

²¹ Wa ni me van at nan o vatine, wa me ilo o tatasiu we sea pulrua, i James natun Sebede, wa tasina i John, alo aka amen Sebede tamanrara, we wurvag noratol o gape ŋaŋ, wa ti loglog rara.

²² Wa rara me toavtag gaplot o aka wa tamanrara, qara tataga neia.

²³ Wa i Jesus me mulemule tal alo Galilea nol, we vatogo alo nor o ima siwo tuwale ŋaŋ, wa we toretore ape lea we wia tape marana, wa we ge esu o sale gopae ŋaŋ, wa o sale mageregere ŋaŋ amaira sul.

²⁴ Wa narorona me gao lue nol o vanua a Suria. Wa neira me vanogag ma suria ira gopae ŋaŋ, o gopae ŋaŋ we seasea wa o vivtig ŋaŋ me qalora, wa irasei o vui we tatas me gege neira, wa irasei o tamate lelera me ge neira ti, wa ira mawea ŋaŋ, wa ni me vaesura.

²⁵ Wa o sul we qoqo me tataga neia nan o Galilea wa Dekapolis wa Jerusalem wa Judea wa ta tavala Jordan.