Mathew 14 - O Vatavata we Garaqa 1931 (Vanuatu)

¹ Naŋ alo qoŋ ŋaŋ ilone i Herod i tetrark me roŋotag naroron Jesus.

² Wa me vet munra rowrowovag anana wa, Iloke i John i Vasugroŋo; ni me tavaraka ma nanra mate, wa o manigiu o ine o vasasa ŋaŋ iloke we gege alo ineia.

³ Apen i Herod me takul veta i John, wa me rotia, wa me mapua ilo ima rotrot; wa o manigiu apena i Herodias rasoan i Philip i tasina.

⁴ Apen i John me vet ti munia si, Gate tira ape lea si ka lavia.

⁵ Pa ni me maros we ge mateia, pa we gogolo o sul, ape neira we nonom mora si neia o prophet.

⁶ Wa o qoŋ me wesu i Herod me wota alolona, wa natun i Herodias iloke o tavine me lakalaka alo vatitnara, wa nalolon i Herod me wia munia apena.

⁷ Naŋ alo ine ni me vava vagogonag, we vatavata munia sin la munia o sava tea ni ta paere lai apena.

⁸ Wa ineia iloke, amon i ravevena me vasuratia ti apena, qara vet wa, Le ma iake alo tapera naqatun i John i Vasugroŋo.

⁹ Pa i maranaga me lolowono; nava ape non o vava vatavata, wa apen ragai we putepute tuwale ape ganagana amaia, ni me vatraŋ si a le munia.

¹⁰ Wa ni qara suware at, me ge sal mot naqatun John alo ima rotrot.

¹¹ Wa me tak ma naqatuna alo tapera, wa me la mun o malamala; naŋ ni me vantak at sur i ravevena.

¹² Pa ra tiŋqoro ŋaŋ anana me mule ma, me taur kalo natamatena, qara tavigia; naŋ neira me mule we gaganag mun i Jesus.

¹³ Naŋ i Jesus me roŋotag apena, pa ni me toavtag o vatine alo aka ilo vanua vanameag asau; wa o sul me roŋotag apena, wa me tataga neia mun o raŋoi nan o laqlaqe vanua ŋaŋ.

¹⁴ Naŋ i Jesus me rowolue ma me ilo o sul liwoa, wa me lolo magarosa ineira, me ge esura we mageregere amaira.

¹⁵ Wa me malurav veta ma, wa ira tiŋqoro anana me mule ma suria, we vet wa, O vanua vanameag nake, wa o masao maran me paso veta; si ka vatoav reag o sul, si neira a mule ilo vutre vanua ŋaŋ si a wol gara sinaga.

¹⁶ Nava i Jesus me vet muneira wa, O manigiu tagai apena si neira a totoa; tur la nagara si a ganagana.

¹⁷ Naŋ neira munia wa, I tagai ran amen kamam iake, nava o bread tavelima, wa o iga nirua.

¹⁸ Naŋ neia wa, Le ma sur nau ilo vatike.

¹⁹ Paso nan ni me vareg mun o sul si neira pute siwo alo valis; wa ni me taur o bread tavelima wa o iga nirua, ti ate laŋ kalo ivunana, ti wievavae; wa ni me tuqe wora, me la o bread mun ra tiŋqoro, wa ra tiŋqoro mun o sul.

²⁰ Naŋ neira me ganagana nol, wa me toqo. Wa me sogon kalo o garate sinaga me tuqe ti, o gete saŋavul tuwale o numei nirua me ura gese.

²¹ Pa iragai me gana, tama tar vagatavelima, o rereata, gate vasogo o retavine wa o nanatmera ŋaŋ.

²² Naŋ gaplot ni me ge ira tiŋqoro si neira rap kalo vawo aka, wa si a sua levegao moai neia i tavala qilo, ni gai vatoav reag mona o sul.

²³ Pa ni me vatoav paso o sul, ni qara vara kalo i vawo tauwe alo pupuel sin tataro. Naŋ me ravrav veta, wa ineia magesena aia.

²⁴ Nava o aka alo tine qilo veta, me magarugaru ape rep; ape laŋ me qalo gorora.

²⁵ Naŋ alo masao mamamata o vavatiu ni me mule sur neira, we varavara avune qilo.

²⁶ Wa ira tiŋqoro me iloa we varavara avune qilo, natoqara me vile ris apena, wa neira me vet wa si o roŋo; wa we awoawo ape gogogolo.

²⁷ Pa i Jesus me vava gaplot muneira, we vet wa, Tur sov naapemiu, inau ran, turpea gogolo.

²⁸ Naŋ i Peter me valuia we vet wa, Lord, si qe iniko ran, ka vareg nau si na mule at suriko avune pei.

²⁹ Naŋ neia wa, Ka mule ma. Wa i Peter me siwo nan o aka, we varavara avune pei, si a mule sur Jesus.

³⁰ Nava ni me ilo o laŋ si we poa, wa we gogolo, wa we tul raka, we awoawo, we vet wa, Lord, ka vaesu inau.

³¹ Naŋ gaplot i Jesus ti kaka napanena, ti takulia, ti vava munia wa, I nomqerqeret, ko me lolovaruarua ape sava?

³² Wa rara me vega kalo ilo aka, o laŋ qara saw mot.

³³ Naŋ iragai me toga ti alo aka me vatieqau goroa, we vet wa, We nun iniko Natun God.

³⁴ Paso nan neira me levegao me niŋa o vanua a Genesaret.

³⁵ Wa o tanun ŋaŋ talo vanua ilone we gilala ineia, we vatraŋ nasalara ilo valvanua wawaliog ilone, we tak ma suria irasei nol we gopa,

³⁶ we paere munia si neira a taŋo vires ape non o golgolo siopa; wa irasei me taŋo mora lai, me vaesura nol apena.