Mathew 1 - O Vatavata we Garaqa 1931 (Vanuatu)

¹ O raverave ape ra tupun Jesus Christ natun David, natun Abraham.

² Abraham me vasisgag Isaak; wa Isaak me vasisgag Jakob; wa Jakob me vasisgag Juda tara tatasina;

³ wa Juda me vasisgag Phares tana Sara mun Tamar; wa Phares me vasisgag Esrom; wa Esrom me vasisgag Aram;

⁴ wa Aram me vasisgag Aminadab; wa Aminadab me vasisgag Naason; wa Naason me vasisgag Salmon;

⁵ wa Salmon me vasisgag Boas mun Rahab; wa Boas me vasisgag Obed mun Ruth; wa Obed me vasisgag Jese;

⁶ wa Jese me vasisgag David i maranaga; wa David i maranaga me vasisgag Solomon mun rasoan Uria;

⁷ wa Solomon me vasisgag Rehoboam; wa Rehoboam me vasisgag Abia; wa Abia me vasisgag Asa;

⁸ wa Asa me vasisgag Jehoshaphat; wa Jehoshaphat me vasisgag Joram; wa Joram me vasisgag Usia;

⁹ wa Usia me vasisgag Jotham; wa Jotham me vasisgag Ahas; wa Ahas me vasisgag Hesekia;

¹⁰ wa Hesekia me vasisgag Manase; wa Manase me vasisgag Amon; wa Amon me vasisgag Josia;

¹¹ wa Josia me vasisgag Jekonia tara tatasina alo tau wosagiva i Babulon.

¹² Wa me wosagira veta i Babulon, wa Jekonia me vasisgag Salathiel; wa Salathiel me vasisgag Sorobabel;

¹³ wa Sorobabel me vasisgag Abiud; wa Abiud me vasisgag Eliakim; wa Eliakim me vasisgag Asor;

¹⁴ wa Asor me vasisgag Sadok; wa Sadok me vasisgag Akim; wa Akim me vasisgag Eliud;

¹⁵ wa Eliud me vasisgag Eleasar; wa Eleasar me vasisgag Mathan; wa Mathan me vasisgag Jakob;

¹⁶ wa Jakob me vasisgag Joseph rasoan Meri, i Jesus me wota amaia, we logia si i Christ.

¹⁷ Wa alo ine o taraŋiu nol nan Abraham gai David o taraŋiu saŋavul tuwale o numei nivat; wa nan David gai wosagiva i Babulon o taraŋiu saŋavul tuwale o numei nivat; wa nan o wosagiva i Babulon gai Christ o taraŋiu saŋavul tuwale o numei nivat.

¹⁸ Naŋ i Jesus Christ me wota ma tamaike: Alo i Joseph me vatvatalig goro veta i Meri ravevena, pa rarua gate toga tuwale tiqa, me ilo si ni me tiana veta amon o Vui we Roŋo.

¹⁹ Wa i Joseph rasoana, ineia o tanun we taniniga wa gate maros we gaganag luea, pa me nonom sin tivtag roroŋoa.

²⁰ Pa alo ni qale nonom vasarig apena, ilo, o angel anan i Lord me ŋaŋa lue munia alo qoreqore, ti vet wa, Joseph, natun David, nipea gogolo si a lav moma rasoama i Meri; ape ilone ni me wune veta nia namon o Vui we Roŋo.

²¹ Wa ni te lav natuna, wa ko te log nasasana i Jesus, ape ineia gina te vaesu o sul anana nan napugara.

²² Wa me ge nol iloke, si a ge tira ran ilone i Lord me vava mun o prophet wa,

²³ Ilo, o qilowar ilone te tiana, wa te lav natuna o mereata, Wa neira te log nasasana si Emanuel; we vava leas wa, God amenina.

²⁴ Wa i Joseph me kekete raka nan o maturu, wa me ge tama o angel anan i Lord me vareg ti, wa ni me lav mona rasoana,

²⁵ wa ni gate toga amaia, ni gai lav mona natuna o mereata: wa ni me log nasasana i Jesus.