Mark 1 - O Vatavata we Garaqa 1931 (Vanuatu)

¹ O qeteg lea we wia non i Jesus Christ, Natun God.

² Tama me rave veta ti alo Isaia i prophet, wa si, Ilo, na we suware nasalak at goro nanagoma, Wa ni te wurvag moai ko namatesalama.

³ Naliŋansei we awoawo alo vanua vanameag, wa si, Tur ge taurmate namatesalan i Lord, Tur wurvag taniniga non o tano vanoga ŋaŋ;

⁴ I John me qeteg vasvasugroŋo alo vanua vanameag, we toretore ape vasugroŋo nomleas si a nomvitag pugai ŋaŋ.

⁵ Naŋ we rowrowolue suria o vanua nol a Judea, wa ra ta Jerusalem; wa me la mora nol o vasugroŋo amaia alo pei lava Jordan, we gaganag ulul napugara ŋaŋ.

⁶ Pa me saru goro i John mun o ul kamel, wa o rotig vin kau goro nawerena; wa ti pigpig o pautu wa ti ganagana o lig telepue pulemot.

⁷ Naŋ ni me toretore, we vet wa, I gene we mana nan nau we mule ma ape kulak, wa na gate sasarita si na taqaloŋ siwo si a ul o gae qoaqoas raŋona.

⁸ Nau me vasugroŋo moksa kamiu mun o pei; nava ni te vasugroŋo mona kamiu mun o Vui we Roŋo.

⁹ Wa me ge alo qoŋ ŋaŋ ilone, si Jesus me mule ma a Nasaret takele Galilea, wa i John me vasugroŋoa alo Jordan.

¹⁰ Wa gaplot alo ni we vara kalo nan o pei, ni me ilo o tuka we rave wora, wa o Vui tama o qona we siwo ma ivunana;

¹¹ wa o liŋai nan o tuka ma, wa si, Iniko Natuk o meratape, nau me ilo mana iniko.

¹² Wa gaplot o Vui ti vasurat luea ilo vanua vanameag.

¹³ Wa ni me toga alo vanua vanameag o qoŋ saŋavul vat, i Satan we gale iloa aia, wa ineia amaira qoe turtur; pa o angel ŋaŋ we tatataga suria.

¹⁴ Naŋ me ukeg vano paso i John, wa i Jesus me vano i Galilea, ti toretore mun o lea we wia tape marana non God,

¹⁵ ti vava wa si, O masaoi me wesu vunvun, wa o marana non God we rivtag veta ma; tur nomleas, wa tur nomtup o lea we wia.

¹⁶ Naŋ alo ni we mulemule sir pan qilo ta Galilea, ni me ilo i Simon tana i Andrew i tasina we tul siwo o gape tultul ilo qilo, apen rara o vaŋvaŋona.

¹⁷ Naŋ i Jesus ti vet munrara wa, Ura mule ma ape kulak, wa na te ge kamurua sia qeteg vaŋvaŋona o tanun.

¹⁸ Wa gaplot rara me toavtag morara o gape ŋaŋ, wa me tataga ineia.

¹⁹ Naŋ ni me van kalo mantagai nan o vatine, wa ti ilo i James natun Sebede tana John i tasina, wa irara avawo aka we wurwurvag o gape ŋaŋ.

²⁰ Naŋ ti log gaplot rarua; wa rara me toavtag i tamanrara i Sebede alo aka tara rowrowovag anana me qil, we vano ape kulana.

²¹ Naŋ neira we mule pata i Kapernaum; wa gaplot alo qoŋ mapsag ni me kalo pata ilo ima siwo tuwale, ti vatogo.

²² Wa neira we mamakei lava ape non o liŋe vatogo; o manigiu ni me vatvatogora tama si o mana amaia, wa gate tama ira vatogo.

²³ Naŋ alo nor o ima siwo tuwale o tanun o vui gagavu amaia: wa ni me awoawo,

²⁴ we vet wa, Awo, o sava amen kamam wa amaiko, Jesus ta Nasaret? Ko me mule ma gai si a ge tagea ikamam? Na we gilala iniko si isei, i Roŋo anan God.

²⁵ Naŋ i Jesus me ŋorov goroa, we vet wa, Toga roroŋo, wa ka rowolue nania.

²⁶ Naŋ o vui gagavu me sarea, we awoawo mun o liŋai we poa, we rowolue nania.

²⁷ Wa neira nol we mamakei aneane, wa we varsike vires neira apena, we vava si, O sava gai iloke? gate liŋe vatogo iloke we garaqa! ape ni we vatraŋ o vui gagavu ŋaŋ mulaŋ mun o mana, wa neira we roŋotagia.

²⁸ Wa narorona me gao lue gaplot valval ilo vanua nol we toga waliog a Galilea.

²⁹ Naŋ neira me rowolue nan o ima siwo tuwale wa rigrig neira me niŋa ilo imanra Simon tana i Andrew wa i James tana i John amenrara.

³⁰ Wa qalgan Simon o tavine we risa, o gopae tutunsag me qaloa, wa rigrig neira we gaganag munia ape neia.

³¹ Naŋ ni me niŋa we taur goro napanena, we lav kaloa; wa gaplot o gopae tutunsag me tagea nania; wa ni me lapasag muneira.

³² Wa me ravrav veta, wa o loa sin tul, wa neira we sasasa ma suria ira gopae nol, tarasei o vui we tatas ŋaŋ we gege neira;

³³ wa o laqlaqe vanua nol me gogorag tuwale ape mateima.

³⁴ Wa ni me ge esura we qoqo we gopavag o gopae ŋaŋ we seasea; wa ni me vure lue o vui we tatas we qoqo, pa ni gate ukeg o vui ŋaŋ ilone si a vava, ape neira me gilala veta ineia.

³⁵ Naŋ tavala maran, te qale silsiliga ran ti, ni we rowolue; wa me vano niŋa o masao vanua vanameag, wa me tataro aia.

³⁶ Wa i Simon me tataga ineia, tarasei ŋaŋ amaia.

³⁷ Naŋ me ilo suaria, we gaganag munia si, Iragai nol we sike iniko.

³⁸ Pa ni we vet muneira wa si, Nina mule reag at ilo laqlaqe vanua ŋaŋ we toga rivtag, si na toretore mulaŋ alolora; ape o manigiu o ine na me rowolue veta ma apena.

³⁹ Naŋ neia alo ima siwo tuwale ŋaŋ tamaira, alo Galilea nan qa nol, we toretore wa we vurevure lue o vui we tatas ŋaŋ.

⁴⁰ Naŋ o tuarasei o resresmavin ti mule ma suria, ti tiasia, ti vatieqau goroa ti vet munia wa si, Ko ta maros ko we mana si a ge wenewene kel inau.

⁴¹ Wa i Jesus me lolomagarosa ineia, me kaka lue napanena, me taŋo vano ape neia, we vava munia wa, Nau we maros, ka wenewene kel.

⁴² Wa gaplot alo ni te qale vava ti, o resresmavin me saru nania, wa me ge wenewene kelua apena.

⁴³ Wa ni me ŋir goro maremarea, me ukeg savrag gaplotua,

⁴⁴ we vava munia wa, Ilo si nipea vava munsei apena; nava mule at, gaganag keluko mun i oloolo, wa ka map kalo o gene ŋaŋ ape we ge wenewene keluko i Moses me vatraŋ ti apena, mun vaglala mun neira.

⁴⁵ Nava i gene me rowolue, me qeteg toretore vagaqoqo wa we sororog o roroi; o manigiu si ni gate mule pata lai ilo laqlaqe vanua alo maea; nava me togatoga alo masao vanua vanameag ŋaŋ, wa o tanun ŋaŋ we vugvug suria nan o valvanua ŋaŋ.