O LEA WE WIA TAMA NAMON LUK ME RAVE 3 - O Vatavata we Garaqa 1931 (Vanuatu)

¹ Naŋ alo taun Tiberias Kaisar we maranaga, o tau saŋavul tuwale o numei tavelimai, wa i Pontius Pilat o governor a Judea, wa i Herod we tetrark a Galilea, wa i Philip i tasina we tetrark alo vanua a Iturea wa Trakonitis, wa i Lusanias we tetrark a Abilene,

² wa i Anas tana i Kaiaphas o moe oloolo, naliŋan God me rowo ma sur i John natun i Sakarias alo vanua vanameag.

³ Naŋ ni me van ilo vanua nol we toga pan pei lava Jordan ti toretore ape vasugroŋo nomleas te le o ul ganganor nia;

⁴ tama me rave ti alo raverave o vavae ŋaŋ mon Isaia o prophet wa, Naliŋan o tanun we awoawo alo vanua vanameag wa, Tur ge taurmate namatesalan i Lord, Tur wurvag taniniga non o tano vanoga ŋaŋ.

⁵ Te tavig wono o val qaraŋa, Te ge vasartag o val tauwe wa o warevutvut ŋaŋ; Te ge taniniga o sala kekeluag, Wa o sala wotwotora ŋaŋ te qeteg ninin kel apena;

⁶ Wa o visogoi nol te ilo o vaesuva non God.

⁷ O manigiu ilone ni me vet mun o sul we rowolue ma suria si a la o vasugroŋo amaia wa, Ra natmata, isei me nir lue mun kamiu si a toa nan o lologagara we rasu ma?

⁸ Tur uwa o woai we tira ape nomleas, wa turpea qeteg vavava alo lolomiu was, I Abraham i tamanina; ape nau we vava mun kamiu wa, God te ge raka lai nan o vat ŋaŋ iloke ra nanatuna mun i Abraham.

⁹ Ilokenake o parapara me map veta ape gar tangae ŋaŋ, wa o val tangae ta tete uwa o woai we wia te tara sur, te sasavrag ilo av.

¹⁰ Naŋ o sul me varusia wa, Kamam te ge o sava apena?

¹¹ Naŋ neia we valui goro we vava muneira wa, Isei non o siopa nirua apena, ni ukeg munsei non o siopa tagai; wa isei gan o sinaga apena, ni ge mulaŋ tamaine.

¹² Naŋ o tuan rowoagtalsom mulaŋ we mule ma si a la o vasugroŋo amaia, wa neira we vava munia wa, Vatogo, kamam te ge o sava?

¹³ Naŋ ni we vet muneira wa, Turpea gege sal tea ape som nan me vareg ti mun kamiu.

¹⁴ Naŋ o tuan soldier mulaŋ we varusia wa, Wa ikamam te ge o sava? Naŋ neia wa, Turpea gege vavakae tea isei. Turpea gagagalesag rasei, tur mawui goro o som rusarusai kamiu si we sasarita.

¹⁵ Naŋ o sul we nonom nerei, we nom vasarig nol alo toqara apen i John, si ineia wun i Christ si tagai.

¹⁶ Naŋ i John me valui gorora ŋaŋ wa, Nau we vasugroŋo mok kamiu mun o pei, panava i gene we mulemule ma we mana nan nau, nau gate sasarita si a ul o gae qoaqoas raŋona: ni te vasugroŋo kamiu mun o Vui we Roŋo wa mun o av.

¹⁷ Non o rivriv alo panena si a wurvag wenewene ran non o tano pitpit nia, wa ni te sogon tuwale o sivui ilo non o qea, panava ni te siŋ tagea o virotiu mun o av tete mate lai.

¹⁸ Wa ni me gaganag o lea we wia mun o sul tamaike, mun o vavae vasosov we qoqo wa we seasea.

¹⁹ Nava i Herod i tetrark, ni me gol vatanaua ti apen i Herodias rasoan Philip i tasina, wa ape gene kiskislag ŋaŋ i Herod me ge ti,

²⁰ wa ni me tuan mulaŋ sage, me pala goro i John alo ima rotrot.

²¹ Naŋ me ge tamaike, me vasugroŋo qet o vavtig sul, wa qara vasugroŋo i Jesus, wa alo ni we tataro o tuka kor ti ravewora.

²² Wa o Vui we Roŋo ti sale sur ivunan Jesus, o tarapei apena we ilo tam o qona, wa o liŋai ti rowo ma avune tuka, wa si, Iniko natuk o meratape, nau we ilo mana iniko.

²³ Naŋ i Jesus iloke we qeteg vatvatogo wa natauna tama saŋavul tol, pa me nonom ape ineia si natun Joseph natun Eli,

²⁴ natun Mathat, natun Levi, natun Melki, natun Jana, natun Joseph,

²⁵ natun Matathias, natun Amos, natun Naum, natun Esli, natun Nagai,

²⁶ natun Maath, natun Matathias, natun Semei, natun Joseph, natun Juda,

²⁷ natun Jonas, natun Resa, natun Sorobabel, natun Salathiel, natun Neri,

²⁸ natun Melki, natun Addi, natun Kosam, natun Elmodam, natun Er,

²⁹ natun Jose, natun Elieser, natun Jorim, natun Mathat, natun Levi,

³⁰ natun Sumeon, natun Juda, natun Joseph, natun Jonan, natun Eliakim,

³¹ natun Melea, natun Mainan, natun Matatha, natun Nathan, natun David,

³² natun Jese, natun Obed, natun Boas, natun Salmon, natun Naason,

³³ natun Aminadab, natun Aram, natun Esrom, natun Phares, natun Juda,

³⁴ natun Jakob, natun Isaak, natun Abraham, natun Tera, natun Nahor,

³⁵ natun Seruk, natun Ragau, natun Phalek, natun Eber, natun Sala,

³⁶ natun Kainan, natun Arphasad, natun Sem, natun Noa, natun Lamek,

³⁷ natun Methusala, natun Enok, natun Jared, natun Maleleel, natun Kainan,

³⁸ natun Enos, natun Seth, natun Adam, natun God.