O LEA WE WIA TAMA NAMON LUK ME RAVE 1 - O Vatavata we Garaqa 1931 (Vanuatu)

¹ O manigiu irasei we qoqo me ge ilo veta si a sargag tuwale o kakakae ape gene ŋaŋ iloke me ge tira ran veta amenina,

² tama iragai we gaganag tapare ma mun kamam; iragai nane me ilo mora ran ma ti alo qetegiu, wa me gagapalag o vavae;

³ nau me nonom mok mulaŋ si we wia, ape nau me tatataga waririag mok veta ape savasava kalo sage ran ma, si na rave valvalug at muniko, gai wowut Theophilus,

⁴ si ka gilala mantag moma o liŋe nun ape gene ŋaŋ ilone me vatvatogoko veta ti apena.

⁵ Naŋ alo qoŋin Herod i maranaga ta Judea i tuara oloolo nasasana i Sakarias, wa ineia talo vavtig varleas non Abia; wa i rasoana amaia nanra nanatun Aaron, wa nasasana i Elisabeth.

⁶ Wa irarua me toga taniniga tatarua alo nagon God, we mulemule mantag alo lea vatraŋ ŋaŋ wa o lea vatogoa ŋaŋ mon Lord, gate tila lai apena si me ava,

⁷ wa naturara tagai, apen i Elisabeth o kelo, wa irarua me tamaragai wa me magatea veta.

⁸ Naŋ me ge tamaike, ni we gagapalag o liŋe oloolo alo nagon God alo tanora talo vavtigiu anona,

⁹ tama me avu veta muneira alo liŋe oloolo, o vaglala me qaloa sin kalo pata ilo iman Lord wa we siŋsiŋ o tangae punapuna;

¹⁰ wa o vavtig sul nol we tataro avarea alo masao qoŋ te siŋsiŋ o tangae punapuna alolona.

¹¹ Wa o angel anan Lord me ŋaŋa lue munia we tira matua ape tano oloolo we siŋsiŋ o tangae punapuna avunana.

¹² Wa i Sakarias me iloa, natoqana we matikotiko, o gogogolo ti siwo ma avunana.

¹³ Pa o angel me vava munia wa, Nipea gogolo, Sakarias; apen God me roŋotag nom o tataro; wa i rasoama i Elisabeth te vasus natuma muniko, wa ko te log nasasana i John.

¹⁴ Wa ko te malakalaka wa te marekereke apena, wa o sul we qoqo te malakalaka ape non o wotava.

¹⁵ Ape ni te liwoa alo nagon Lord, wa ni tete un namana o wine wa o pei te malesulesu apena, wa ni te uravag o Vui we Roŋo alo toqan ravevena ran;

¹⁶ wa ni te ge vusiag kel ira nanat Israel we qoqo sur i Lord God ineira.

¹⁷ Wa ni te moai goro nanagona alo vui wa alo mana non Elia, si a ge vusiag kel natoqara tamara ape natura, wa ira leasag ape liŋara taniniga we menaro, wa si a wurvag mun Lord o sul taurmate.

¹⁸ Naŋ i Sakarias me vava mun o angel wa, Na te gilala gasei o ike? ape nau o tamaragai, wa i rasoak me magatea veta.

¹⁹ Naŋ o angel me valui goroa, we vet wa, Inau i Gabriel, nau we tira ape nagon God, wa ni me vatraŋ nau ma si na vava muniko, wa si na gaganag muniko o lea we wia iloke.

²⁰ Wa ilo ma, ko te luto, ko tete vavava lai gai niŋa o qoŋ o gene ŋaŋ iloke te wesu alolona, ape ko gate nomtup nok o vavae ŋaŋ te wesu ran alo qoŋ ilone me vono veta apena.

²¹ Wa o sul we toga nerei i Sakarias, wa me mamakei ape ni we maul alo ima we roŋo.

²² Wa ni me rowolue, gate vava lai muneira; wa neira qara gilala si ni me ilo o taqaŋiu alo ima we roŋo; wa ni we tultul naqatuna muneira, pa ti toga luto galava.

²³ Wa me paso o qoŋ ŋaŋ ni we gagapalag alolora ni qara vareag kel ilo imana.

²⁴ Wa o qoŋ ŋaŋ ilone me paso, i Elisabeth rasoana me wune, wa ni me toga sus o vula tavelima, ti vet wa,

²⁵ I Lord me ge tamaike munau alo qoŋ ni me vaatev inau ma alolona si a lareag nan nau nok o vavae vasir amaira tanun.

²⁶ Naŋ alo vula laveteai God me vatraŋ o angel i Gabriel ilo laqlaqe vanua takele Galilea, wa o sase vanua a Nasaret,

²⁷ sur o malamala o qilowar me vatvatalig goroa veta mun o mereata nasasana i Joseph, talo iman David, wa nasasan o qilowar ilone i Meri.

²⁸ Naŋ ti mule pata, ti vet munia wa, We wia gai, iro gene sogov, i Lord amaiko; te logiko iro gene vawia amaira tavine ŋaŋ.

²⁹ Pa ni me iloa, natoqana we matikotiko aneane ape non o vavae, ti nom sikesike o vavae vawia iloke si we tama avea.

³⁰ Naŋ o angel ti vet munia wa, Nipea gogolo, Meri; ko me la suar o sogov amen God.

³¹ Wa ilo ma, ko te wune alo toqama wa ko te vasus o mereata, wa ko te log nasasana i Jesus.

³² Ineia te liwoa, wa te logia si Natun i Eleele; wa i Lord God te le at munia o tanoputepute maranaga non tamana i David.

³³ Wa ni te maranaga goro galava naiman Jakob; wa tete ulus marana anona ti tuai ti tuai.

³⁴ Naŋ i Meri me vava mun o angel wa, O ike te ge gasei? ape na gate gilala o mereata.

³⁵ Naŋ o angel me valui goro, we vet munia wa, O Vui we Roŋo te van ma avunama, wa o mana non i Eleele te malumalu goro ko: o manigiu te log i gene we roŋo te wota amaiko si Natun God apena.

³⁶ Wa ilo, i Elisabeth i sogoma me wune veta alo magatea; wa iro gene me logia we tuai o kelo navulana laveteai iloke.

³⁷ Ape itagai tea o vavae si te ae ran amen God.

³⁸ Naŋ i Meri wa, Ilo ma, iro rowrowovag anan i Lord: ni lai munau tama ko me vava ti. Wa o angel me vareag nania.

³⁹ Wa alo qoŋ ŋaŋ ilone, i Meri me tavaraka me mule gaplot sage ilo vanua vutvut, ilo laqlaqe vanua takele Judea;

⁴⁰ ti kalo pata lele iman Sakarias, ti wievavae i Elisabeth.

⁴¹ Wa me ge tamaike, i Elisabeth me roŋotag o wievavae mon i Meri, pa o natmera we tiratira alo toqana. Wa i Elisabeth me liwat mun o Vui we Roŋo,

⁴² wa ni we log raka mun o liŋai we poa, ti vet wa, Iniko iro vawia amaira tavine ŋaŋ, wa nawotoqama mulaŋ i gene vawia.

⁴³ Wa iloke ma avea mun nau si raveven i Lord inau te van ma surinau?

⁴⁴ Ape ilo, o liŋe wievavae anoma me niŋa ilo qoroksa, pa o natmera qara tiratira masekeseke alo toqak.

⁴⁵ Wa iro gene me nomtup mona, iro gene vawia nake; ape te ge vunvun ran aŋaisa o gene ŋaŋ ilone me vava ti munia amen i Lord apena.

⁴⁶ Naŋ i Meri me vava wa, Naesuk we log ronoga i Lord,

⁴⁷ Wa naatak we masekeseke apen God i Vaesuk.

⁴⁸ Ape ni me ate sur ma avune tanun iro rowrowovag anana we pepewu: Ape, ilo ma, nan ilokenake o taraŋiu ŋaŋ te log inau iro vawia.

⁴⁹ Ape i mana me ge o vasasa munau: Wa nasasana we roŋo.

⁵⁰ Wa non o magarosa avunara sei we momogoa, O taraŋiu o taraŋiu ŋaŋ.

⁵¹ Ni me la lue non o vavakae mun napanena: Ni me ara salsaleŋa ira nom liwoa kelura alo nom vasarig ŋaŋ talo toqara.

⁵² Ni me rave sur ira liwoa nan o tano maranaga nora: Pa ni me sau kalo ira pepewu.

⁵³ Ni me ge vaworai ira maliŋsala mun o gene ŋaŋ we wia: Wa ni me vure mamasa ira meresom.

⁵⁴ Ni me tuan Israel o rowrowovag anana, Sin nomkel ape non o magarosa;

⁵⁵ Tama ni me vava ti munra tamanina, Mun i Abraham tara non o veve ti tuai, ti tuai.

⁵⁶ Wa i Meri me toga amaia tama o vula nitol, qara kel ilo imana.

⁵⁷ Wa navulan i Elisabeth me noga sin vasus, wa ni qara lav natuna.

⁵⁸ Wa ira tagvanuana tara sogona me roŋotag apen i Lord me vaqoqo non o magarosa munia, wa ineira me malakalaka tuwale amaia.

⁵⁹ Naŋ me ge si alo qoŋ lavetoliu neira me vug tuwale ma ape teve vaglala o natmera, wa te tiu nasasana si Sakarias tataga nasasan i tamana.

⁶⁰ Naŋ ravevena me valui goro, ti vet wa, Nipea tamaine, pa te logia si John.

⁶¹ Naŋ neira me vava munia wa, Itagai tea amaira sogoma we loglogia mun o sasai iloke.

⁶² Wa neira we qatmawui mun tamana si ni we maros we log nasasana isei.

⁶³ Wa ni me paere o tano raverave, me rave wa, Nasasana i John. Wa ineira nol me mamakei apena.

⁶⁴ Wa navalana me waka gaplot wa nagarameana, wa ni me vava laqa, we wievavae God.

⁶⁵ Wa o gogolo me ge nol iragai we toga peteŋ, wa me sororog o vavae nol iloke val vanua vutvut ŋaŋ a Judea.

⁶⁶ Wa irasei nol me roŋotag me map siwo ilo toqara, we vava wa, Gate tete gai iloke aŋaisa! Ape napanen i Lord me toga amaia.

⁶⁷ Wa i tamana i Sakarias me liwat mun o Vui we Roŋo, ti vava mun o liŋe prophet ti vet wa,

⁶⁸ Tur wievavae i Lord God nora Israel; Ape ni me vaatev wa ni me tunkel o sul anana;

⁶⁹ Wa ni me vatira o maue esunina; Alo iman David o tanun anana;

⁷⁰ (Tama ni me vava ti mun navalara prophet we roŋo anana, alo qeteg marama ma),

⁷¹ O vaesunina nan o tavalalea, wa nan napanera nol we ŋustup nina;

⁷² Sin magarosa ra tamanina, wa sin nomkel ape non o vatavata we roŋo;

⁷³ O vavae vagogonag ilone ni me ligog ti mun Abraham i tamanina,

⁷⁴ Sin vasoal ma munina, si te ge rowolue nina nan napanera tavalalea Nina qara mawmawui apesov munia,

⁷⁵ Mun o togara we roŋo we taniniga alo nagona valqoŋinina.

⁷⁶ Pa iniko, tete, te logiko o prophet anan i Eleele: Ape ko te moai goro nanagon Lord, si a wurvag namatesalana;

⁷⁷ A la o lolomaran ape esuva mun o sul anana, Mun we nomvitag napugara,

⁷⁸ O manigiu o lolomagarosa non God inina, O mera ma vunana te vaatev nina apena.

⁷⁹ Si a valawar irasei we pute alo silsiliga wa alo malumalu matea: Si a ave taniniga naraŋonina ilo matesale tamata.

⁸⁰ Wa o tete ilone me poa sage, wa me vatogar alo atai, wa ni me toga alo vanua vanameag gai niŋa o qoŋ ni me ŋaŋalue taqai ma amaira Israel.