John 6 - O Vatavata we Garaqa 1931 (Vanuatu)

¹ Naŋ me paso o ike i Jesus me levegao tavala qilo ta Galilea, o qilo ta Tiberias.

² Wa o sul we qoqo me tataga ineia, o manigiu ineira me ilo mora o vaglala ŋaŋ ni me ge ti munra gopae.

³ Wa i Jesus me kalo sage i vawo tauwe, wa tara tiŋqoro me pute siwo aia.

⁴ Wa o rowolagau o lakalaka nora ta Judea me noga.

⁵ Wa i Jesus me ate laŋ, ti sagarag o sul we qoqo we mule ma suria, ti vet mun i Philip wa, Nina te wol o sinaga avea aganragai ŋaŋ iloke?

⁶ Pa ni me vet tamaike si a meregalea, ape ni me gilala mona o sava ni te ge.

⁷ Naŋ i Philip ti valuia wa, Ta wol o bread mun o som melnol vagarua tete ninile val tanun.

⁸ Tuwale nanra tiŋqoro anana, i Andrew, tasin i Simon Peter, ti vet munia wa,

⁹ O lumagav iake, o bread tavelima amaia, o barley, wa o iga nirua; pa te tira gasei ape neira we qoqo?

¹⁰ Naŋ i Jesus wa, Tur vapteg o sul. Wa o valis we lolo alo vatine. Naŋ o rereata me pute siwo tama tar vagatavelima.

¹¹ Naŋ i Jesus me taur o bread, ti wievavae, ti tirag munra tiŋqoro, wa ira tiŋqoro mun o tanun ŋaŋ me pute siwo; wa o iga mulaŋ tama isei qe maros.

¹² Wa neira me toqo qet, ni me vet munra tiŋqoro anana wa, Vilerag o garate sinaga me tuqe ti, nan o sava wa tagea.

¹³ Wa neira me vilerag, wa me sogon ura o gete saŋavul tuwale o numei nirua mun o garate sinaga tape bread tavelima ilone neira me ganagana matila ti.

¹⁴ Wa o manigiu o ine iragai me ilo o vaglala i Jesus me ge ti, qara vet wa, We nun, i gene iloke i prophet te mule ma ilo marama.

¹⁵ Wa i Jesus we ilo vaglala ape neira te mule ma we wosagia, wa we ge ineia sin maranaga, ni me toa kel mulaŋ magesena i tauwe.

¹⁶ Wa me ravrav veta, ira tiŋqoro we taqel siwo i lau;

¹⁷ we rap vawo aka, we gamo siwo tavala qilo i Kapernaum. Wa me qoŋ, wa i Jesus gate mule tiqa surira,

¹⁸ wa o rep we kalokalo ma ape laŋ liwoa we vus.

¹⁹ Wa ineira me sua o masaoi saŋavul rua o numei tavelima si saŋavul tol, qara ilo i Jesus ti mulemule avune pei, ti rivtag o aka, wa neira we gogolo.

²⁰ Pa ni me vava muneira wa, Inau iloke; turpea gogogolo.

²¹ Wa ineira me maros we lav vasgotia ilo aka; wa o aka ti olo gaplot salilina ineira me sua aia.

²² Tavala maran o sul me tira ti a tavala qilo i rowo me ilo si tagai o natiaka we sea aia, pa ituwale ilone, wa si i Jesus gate rap mona vawo aka ilone amaira tiŋqoro anana, nava si ra tiŋqoro anana me vanreag magesera.

²³ Panava o tuan aka mulaŋ me tikarag nan a Tiberias, me olo i rowo arivtag o vatine neira me gana o bread aia, i Jesus me wievavae paso ti apena.

²⁴ Wa o sul me ilo tamaine i Jesus tagai aia tara tiŋqoro anana, wa neira we rap kalo mora vawo natiaka ŋaŋ ilone, we niŋa siwo i Kapernaum, we sike i Jesus.

²⁵ Wa neira me ilo suaria a tavala qilo siwo, we vava munia wa, Vatogo, ko me van ma anaŋaisa?

²⁶ Naŋ i Jesus ti valuira wa, We nun, we nun, nau we vava mun kamiu wa, Kamiu we sike inau pa gate apen kamiu me ilo o vaglala ŋaŋ, nava apen kamiu me gana ti wa me toqo.

²⁷ Tur pea mawmawui ape sinaga te tagea, panava ape sinaga te toga ilo esu galava, i Nat tanun te la mun kamiu; apen o Mama, i God, me vatapua.

²⁸ Naŋ neira we vet munia wa, Kamam te ge o sava, si kamam a gagapalag lai o gagapalag ŋaŋ mon God?

²⁹ Naŋ i Jesus ti valuira wa, Iloke o gagagapalag mon God, si kamiu a nomtup i gene ni me vatraŋ ma.

³⁰ Naŋ ineira me vet munia wa, Ko we ge o sava o vaglala, si kamam a ilo wa we nomtupuko? ko we gagapalag o sava?

³¹ Ratupunina me gana o manna alo vanua vanameag, tama me rave ti wa, Ni me le gar o bread ma vunana si a gana.

³² Naŋ i Jesus me vet muneira wa, We nun, we nun, nau we vava mun kamiu wa, Gate i Moses me la mun kamiu o bread ma vunana, nava i Tamak we le mun kamiu o tur bread ma vunana.

³³ Apen o bread mon God iloke we siwo ma vunana, wa we ge esu o marama.

³⁴ Naŋ ineira we vava munia wa, Lord, ka la vagae ma mun kamam o bread iloke.

³⁵ Naŋ i Jesus ti vet muneira wa, Inau o bread esuva; isei qe van ma sur nau tete maliŋsala, wa isei qe nomtup inau tete marou aŋaisa.

³⁶ Pa na me vava veta mun kamiu wa si, Kam me ilo inau, pa kamiu gate nomtup.

³⁷ O sava o Mama qe la munau te van qet ma sur nau, wa na tete gevtag reag ilo isei qe van ma sur nau.

³⁸ Ape na gate siwo ma vunana si na tataga o sava nau we maros, nava o sava i gene me vatraŋ nau ma we maros.

³⁹ Wa i gene me vatraŋ nau ma we maros iloke, si na tete ge vanvanameag o gene tea ni me la ma munau, pa si na ge rakatia alo ulus qoŋ.

⁴⁰ Ape o maros mon Tamak iloke, si isei qe sagarag o Natui, wa we nomtupua, te esu galava, wa na te ge rakatia alo ulus qoŋ.

⁴¹ Wa ira ta Judea we terevaŋutŋut goroa, ape ni me vava wa, Inau o bread me siwo ma vunana.

⁴² Wa ineira me vet wa, Gate i Jesus iloke, natun Joseph? nina we gilala i tamana tana ravevena. Pa o sava iloke ni we vava wa, Na me siwo ma vunana?

⁴³ Naŋ i Jesus ti valuira we vava wa, Turpea var terevaŋutŋut.

⁴⁴ O Mama i gene me vatraŋ nau ma ta tete ramo isei, ni tete van lai ma sur nau: wa na te ge raka kelua alo ulus qoŋ.

⁴⁵ Me rave ti munra prophet ŋaŋ wa, God te vatogora nol. Valsei me roŋotag amen o Mama, wa we lolomaran, te van ma sur nau.

⁴⁶ Na gate vava si isei me ilo o Mama; i gene amen God ma, ineia tuwale me ilo o Mama.

⁴⁷ We nun, we nun, nau we vava mun kamiu wa, Isei qe nomtup we taur o esu galava.

⁴⁸ Inau o bread esuva.

⁴⁹ Ratupumiu me gana o manna alo vanua vanameag, wa me mate.

⁵⁰ Iloke o bread we siwo ma vunana, si o tanun ni gana, wa ni tete mate.

⁵¹ Inau o bread esu me siwo ma vunana; si isei qe gana o bread iloke ni te esu galava; wa o bread lova iloke na te le navisogok nake na te le, ape esu marama.

⁵² O manigiu ilone ira ta Judea me varleasag, we vet wa, I gene iloke te le gasei navisogona mun ganina?

⁵³ Naŋ i Jesus ti vet muneira wa, We nun, we nun, nau we vava mun kamiu wa, Si kam qe tete gana navisogon i Nat tanun wa we ima nanarana, kamiu gate taur o esu alo ikamiu.

⁵⁴ Isei qe gana navisogok, wa we ima nanarak we taur o esu galava; wa na te ge rakatia alo ulus qoŋ.

⁵⁵ Ape navisogok o tur sinaga, wa nanarak o tur gene ima.

⁵⁶ Isei qe gana navisogok wa we ima nanarak we goara alo inau, wa inau alo ineia.

⁵⁷ Tama o Mama i esuesu me vatraŋ nau ma, wa nau we esu o manigiu o Mama, tamaine gina isei qe gana inau, ineia mulaŋ te esu o manigiu inau.

⁵⁸ Iloke o bread me siwo ma vunana; pa gate tama ira tupumiu me gana o manna wa me mate; isei qe gana o bread iloke te esu galava.

⁵⁹ Ni me vava o vavae ŋaŋ iloke alo ima siwotuwale, alo ni we vatogora a Kapernaum.

⁶⁰ Wa o tuan tiŋqoro anana we qoqo we roŋotag, we vava wa, O vavae we gona iloke; isei te tiŋqoro lai?

⁶¹ Nava i Jesus we gilala matapuna ape ra tiŋqoro we terevaŋutŋut, ti vet muneira wa, Iloke we ge kamiu si a tutuag?

⁶² Pa o sava si kam te sagarag i Nat tanun we mule kalo kel ilo vatine ni me toga ti aia we tuai?

⁶³ O vui we ge esu, wa o visogoi tete piriŋ ilo; o vavae ŋaŋ na me vava mun kamiu, iloke ŋaŋ o vui, wa o esu.

⁶⁴ Wa o tuanimiu gate nomtup. Apen Jesus me gilala alo qetegiu ma irasei gate nomtup, wa isei te maniriŋia.

⁶⁵ Wa ni me vava wa, O manigiu iloke nau me vava mun kamiu wa, I Tamak ta tete sogov munsei, ni tete van lai ma surinau.

⁶⁶ O manigiu iloke ira tiŋqoro anana we qoqo me toa kel nania, gate mule pulpul mulaŋ amaia.

⁶⁷ Wa i Jesus ti vet munra numei nirua apena wa, Kamiu mulaŋ we maros we toa?

⁶⁸ Naŋ i Simon Peter me valuia wa, Lord, kamam te toa sur isei? amaiko o vavae ŋaŋ we tira ape esu galava.

⁶⁹ Wa ikamam me nomtup veta, wa we gilala apeniko i Roŋo anan God.

⁷⁰ Naŋ i Jesus ti valuira wa, Nau gate ilo raka kamiu ira numei nirua, wa o tuara nan kamiu anan Satan?

⁷¹ Pa ni me vava apen i Judas Iskariot natun Simon, ape neia gina te maniriŋia, o tuara nanra numei nirua.