John 20 - O Vatavata we Garaqa 1931 (Vanuatu)

¹ Naŋ alo qoŋ tuwale talo wik, i Meri ta Magdala me mule ilo qaraŋa alo gap matava ran ti, qale silsiliga, ti ilo o vat me wil reag veta nan o qaraŋa;

² ti valago, ti mule sur i Simon Peter tana tuara tiŋqoro i Jesus me tapea, ti vet murara wa, Neira me lareag i Lord nan o qaraŋa, wa kamam gate gilala si neira me mapua avea.

³ Wa i Peter me kalo lue tana i tuara tiŋqoro, wa rara me gis raka ape qaraŋa.

⁴ Wa rara me valvalago tuwale, pa i tuara tiŋqoro me valago sal i Peter, ti niŋa amoa alo qaraŋa:

⁵ ti taqaloŋ, ti matarag ilolona, ti ilo o siopa lolos tamate we risa, pa ni gate mule pata ilolona.

⁶ Paso nan, i Simon Peter qara niŋa, we tataga ineia, ti mule pata ilo qaraŋa, ti sagarag o siopa we risa,

⁷ wa o siopa maŋmaŋ me toga ti avune qatuna gate risa tuwale ape siopa ŋaŋ ilone, pa me luqe sea alo tanona.

⁸ Paso nan i tuara tiŋqoro me niŋa ti amoa alo qaraŋa ti mule pata mona, ti ilo, ti nomtup.

⁹ Ape neira gate gilala tiqa o raverave, si ni te tavaraka nan ra mate.

¹⁰ Wa ira tiŋqoro me vareag kel ilo imanrara.

¹¹ Pa i Meri qale tira avarea a pan qaraŋa, ti taŋitaŋi; wa alo ni we taŋitaŋi, ti taqaloŋ, ti matarag ilo qaraŋa,

¹² ti sagarag o angel nirua me saru o siopa aqaga we pute, i tuwale ape qatuna wa i tuara ape raŋona, naturian Jesus me risa ti aia.

¹³ Naŋ rara we vava munia wa, Vavine, ape sa ko we taŋi? Naŋ ni me vava murara wa, Ape neira me lareag i Lord inau, wa na gate gilala si neira me mapua avea.

¹⁴ Ni me vava paso tamaike, pa ti kilau, ti sagarag i Jesus we tira; pa ni gate gilala si ineia i Jesus.

¹⁵ Naŋ i Jesus ti vet munia wa, Vavine, ape sa ko we taŋi? ko we sike isei? Pa ni me nonom si neia i ilo goro tuqei, ti vet munia wa, Gai, si ko me saureagia, ka gaganag munau ape vatine ko me mapua ti aia, pa na te lavreagia.

¹⁶ Naŋ i Jesus ti vet munia wa, Meri. Ni me kilau, ti vet munia o vavae ta Hebrew wa, Raboni, we vava leas si, Vatogo.

¹⁷ Naŋ i Jesus ti vet munia wa, Nipea taŋtaŋov inau; ape na gate mule kalo tiqa sur i Tamak; nava mule sur ira tasik, wa ka vava muneira wa, Nau we mule kalo sur i Tamak wa i Tamamiu, sur God inau wa God ikamiu.

¹⁸ I Meri ta Magdala we van ma, ti vet mura tiŋqoro si, Nau me ilo i Lord; wa ape ni me vava tamaine munia.

¹⁹ Wa alo qoŋ ilone, o qoŋ tuwale talo wik, alo ravrav, wa me tipag veta o mateima ira tiŋqoro me vug tuwale aia, ape neira we gogolo ira ta Judea; wa i Jesus me va ma, ti tira alo vatitnara, ti vet muneira wa, O tamata mun kamiu.

²⁰ Ni me vava tamaike, pa ti la lue mun neira napanena wa nalalana. Wa ira tiŋqoro me malakalaka raka ape neira we ilo i Lord.

²¹ Naŋ i Jesus ti vet mulaŋ muneira wa, O tamata mun kamiu; tama o Mama me vatraŋ nau ma, tamaine gina nau we vatraŋ kamiu at.

²² Wa ni me vava tamaike, ti mapsag avunara, ti vet muneira wa, Tur la momiu o Vui we Roŋo:

²³ kam qe maukeg o ganganor munrasei, te maukeg lai muneira; kam qe taur goro o ganganor munrasei, te taur goro muneira.

²⁴ Panava i Thomas, i tuwale nan ra numei nirua, we logia si Didimus, ni gate vug amaira alo i Jesus me va ma.

²⁵ Naŋ ira tiŋqoro we sea we vava munia wa, Kamam me ilo i Lord. Nava ni me vet muneira wa, Si na qe tete ilo o tano pismarawa ape panena, wa si na qe tete gis napisuk alo tano pismarawa, wa si na qe tete rau napanek ilo kikina, na tete nomtup.

²⁶ Wa o qoŋ lavetoliu me niŋa ira tiŋqoro me vug mulaŋ alo ima, wa i Thomas amaira. I Jesus we mule ma, wa o mate ima me tipag veta, ti tira alo vatitnai, ti vet wa, O tamata mun kamiu.

²⁷ Paso nan, ti vet m un Thomas wa, Ka sis ma napisuma, wa ilo napanek; wa kaka ma napanema, ka rau ilo kikik; wa nipea nomnom varuarua, pa ka nomtup.

²⁸ Naŋ i Thomas me valui goro, ti vet munia wa, Lord inau, wa God inau.

²⁹ Naŋ i Jesus ti vet munia wa, Ko we nomtup ape ko me ilo nau; tur wia irasei gate ilo, pa me nomtup.

³⁰ Wa i Jesus me ge o vaglala ŋaŋ we sea we tar ape nagora tiŋqoro, gate rave siwo alo raverave iloke.

³¹ Pa me rave iloke ŋaŋ, si kamiu a nomtup apen i Jesus si neia i Christ, Natun God; wa si kamiu a taur o esu alo sasana alo we nomtup.