John 1 - O Vatavata we Garaqa 1931 (Vanuatu)

¹ Alo qetegiu i Vavae, wa i Vavae amen God, wa i Vavae God.

² Ineia iloke alo qetegiu amen God.

³ Me tiŋ o gene ŋaŋ munia: wa asau nania gate tiŋ ilo o sava tea me tiŋ ti.

⁴ O esu alo ineia, wa o esu o ge marmararan o tanun ŋaŋ.

⁵ Wa o marmararan we siŋa alo silsiliga, wa o silsiliga gate taur goro lai.

⁶ O tanun apena, God me vatraŋia ma, nasasana i John.

⁷ Ineia iloke me mule ma sin gaganag we tur ape marmararan ilone, si o tanun ŋaŋ a nomtup munia.

⁸ Gate ineia o marmararan ilone, pa ni me van ma sin gaganag we tur ape marmararan ilone.

⁹ O tur marmararan apena, ilone nane we na marmararan o val tanun ŋaŋ we wot ma ilo marama.

¹⁰ Ineia me toga ran ma a marama, wa me tiŋ o marama munia, panava o marama gate gilala ineia.

¹¹ Ni me mule ma ilo gene ŋaŋ napulana, wa o tanun anana ŋaŋ gate lav vasgotia.

¹² Pa irasei me lav vasgotia, ni me manag neira, neira te qeteg mermerein God, iragai nane we nomtup nasasana.

¹³ Neira gate wota ma nan o nare tanun, wa nan o maros non o visogoi, wa nan o maros non o tanun, panava amen God.

¹⁴ Wa i Vavae me qeteg visogoi, wa we togatoga alo inina, wa kamam me sagarag naleŋasina tama naleŋasin Natun o Mama o wotuwale, we uravag o sogov wa o nun.

¹⁵ I John we gaganag we tira ape neia, ti vava eleele wa, Iloke i gene na me vava apena wa si, I mule ma i tagirik me ge sin moai nan nau, ape neia moai ran nau ma.

¹⁶ Wa inina nol me la nan o gene ni me uravag ti, wa o sogov avune sogov.

¹⁷ Ape me la ma o lea mun Moses; o sogov wa o nun me qeteg ma mun Jesus Christ.

¹⁸ Isei gate ilo ran ma God; o Natui wotuwale we toga alo varan o Mama, ni me maŋasag luea.

¹⁹ Wa iloke o vavae gaganag we tira mon John, alo ira ta Judea me vatraŋ ma ira oloolo a Jerusalem wa ira ta Levi si a varusia wa, Iniko isei? pa ni me gaganag lue wa ni gate gale goro,

²⁰ pa ni me gaganag lue wa, Na gate i Christ.

²¹ Naŋ neira me varusia wa, Pa o sava? Iniko wun i Elia? Naŋ neia wa, Inau gate ineia. Iniko ilone i prophet? Naŋ ni me valui gorora wa, Tagai.

²² O manigiu o ine neira me vava munia wa, Pa iniko isei? si kamam a gaganag kel munragai me vatraŋ kamam ma ti. Ko we vava kel o sava apeniko?

²³ Naŋ neia wa, Inau o liŋe tanun we loglog alo vanua vanameag wa si, Tur ge taniniga namatesalan Lord tama i Isaia i prophet me vet ti.

²⁴ Wa ira gene vatraŋ suria ineira nan ra Pharise ŋaŋ.

²⁵ Naŋ neira me varusia, we vava munia wa, Si ko ta tete i Christ, si i Elia, si i prophet ilone, ape sa ka we vasugroŋo?

²⁶ Naŋ i John me valui gorora ti vet wa, Na we vasugroŋo mun o pei vires, pa isei we tira alo vatitnamiu, wa kam gate gilala ineia,

²⁷ ineia i gene we mule ma a tagirik, wa ineia moai ran nau ma, wa na gate sar si a ul o ga qoaqoas raŋona.

²⁸ Wa me ge o gene ŋaŋ iloke a Bethabara a tavala pei Jordan, i John we vasvasugroŋo aia.

²⁹ Tavala maran ti ilo i Jesus we van ma suria ti vet wa, Ilo, o Lamb non God, we lareag napugan o marama.

³⁰ Iloke i gene na me vava apena wa si, Isei we mule ma a tagirik me ge sin moai nan nau, ape neia moai ran nau ma.

³¹ Wa na gate gilala ranua, pa na me van ma we vasvasugroŋo mun o pei, si ni ŋaŋa lue mura Israel.

³² Wa i John me gaganag we tira, ti vet wa, Na me ilo o Vui we siwo ma vunana tam o qona, wa me gara avunana.

³³ Wa na gate gilala ranua; panava i gene me vatraŋ nau ma si na vasugroŋo mun o pei, ni me vet munau wa, Ko ta ilo o Vui ti siwo ma ti gara avunansei, ineia ilone we vasugroŋo mun o Vui we Roŋo.

³⁴ Wa na me ilo, wa nau me gaganag we tira ape neia si neia iloke Natun God.

³⁵ Tavala maran mulaŋ i John we tira taratol o tiŋqoro anana nirua;

³⁶ wa ni me sagarag i Jesus we mulemule, ti vet wa, Ilo, o Lamb non God.

³⁷ Wa o tiŋqoro nirua ilone we roŋotag ni we vava, wa rara we tataga i Jesus.

³⁸ Wa i Jesus me kilau, ti sagarag rarua we tataga ineia, ti vet wa, Kamrua we sike o sava? Naŋ rara wa, Rabi (we vava leas wasi, Vatogo), ko we toga avea?

³⁹ Naŋ ni me vava murarua wa, Van ma, wa kam te ilo. Wa rara me vano we ilo o vatine ni we togatoga aia, wa rara we toga amaia alo qoŋ ilone: wa o masao qoŋ tama saŋavului.

⁴⁰ Wa i tuara nan rarua me roŋotag i John, wa me tataga ineia, i Andrew nan, tasin i Simon Peter.

⁴¹ Ni me ilo suar i tur tasina i Simon amoa, ti vet munia wa, Kara me ilo suar i Mesia (we vava leas wasi, I Christ).

⁴² Wa ni me takia sur i Jesus. Wa i Jesus me sagaragia, ti vet wa, Iniko i Simon natun i Jonas; te logiko Kephas (we vava leas si, I Peter).

⁴³ Tavala maran ineia me nonom sin vanreag i Galilea; wa ni we ilo suar i Philip; naŋ i Jesus ti vet munia wa, Tataga inau.

⁴⁴ Pa i Philip ta Bethsaida, nalaqlaqevanuanra Andrew tana i Peter.

⁴⁵ I Philip we ilo suar i Nathanael, ti vet munia wa, Kamam me ilo suar i gene i Moses me rave ti alo lea ape neia, wa ira prophet ŋaŋ, i Jesus ta Nasaret, natun Joseph.

⁴⁶ Naŋ i Nathanael munia wa, O gene we wia te rowolue lai ma a Nasaret? Naŋ i Philip ti vet munia wa, Van ma, ka ilo.

⁴⁷ Wa i Jesus me ilo i Nathanael we mule ma suria, ti vet wa, Ilo, i tur nat Israel, o galegale tagtagai amaia.

⁴⁸ Naŋ i Nathanael munia wa, Ko we lolomaran nau gaseinia? Naŋ i Jesus me valui goro we vet munia wa, I Philip gate logiko tiqa, iniko alalaŋe fig ilone, nau me iloko.

⁴⁹ Naŋ i Nathanael me valuia wa, Vatogo, iniko Natun God; iniko i Maranaga goro ra Israel!

⁵⁰ Naŋ i Jesus me valuia we vet munia wa, Ko we nomtup ape na me vava muniko wa, Na me iloko alalaŋe fig? Ko te ilo o gene ŋaŋ we poa nan o ike.

⁵¹ Naŋ ni me vava munia wa, We nun, we nun, nau we vava mun kamiu wa, Kam te ilo o tuka we ravewora, wa o angel ŋaŋ anan God we kalokalo sage, wa we taqtaqel siwo avune Nat tanun.