James 1 - O Vatavata we Garaqa 1931 (Vanuatu)

¹ I James, o rowrowovag anan God wa anan i Lord Jesus Christ, we vava vawia munra veve saŋavul tuwale o numei nirua we toga salsaleŋa.

² Tur nonom momiu, ira tatasik, si o gene te lakalaka qet apena, alo si kamiu qe roro lai ilo meregale we qoqo;

³ ape kamiu we gilala si alo we ge iloilo kamiu si we nomtup, te wurvag taurmate o liŋe roŋo malumuaga.

⁴ Pa o liŋe roŋo malumuaga ilone a ge taurmate mon o gagapalag, si kamiu a qeteg taurmate lai, wa we wonowono, gate valuava alo sava tea.

⁵ Pa si sei alo vatitnamiu qe valuava alo lolomaran, ni paere mun God we la aleŋa mun rasei nol wa gate ŋir goro ilo, wa te le at munia.

⁶ Nava amona sin paere mun o nomtup, wa nipea we nom varuarua. Apen isei qe nom varuarua te tama o rep talo lama ti towtowola ape laŋ, ti kalokalo.

⁷ Pa nipea i gene ilone a nonom lai si ni te taur tea o sava amen i Lord.

⁸ O tanun we lolovaruarua we taavaava gese alo matesalana nol ŋaŋ.

⁹ Wa o tasiu we sur siwo ni sotal kelua alo tanona we raka sage;

¹⁰ wa i meresom alo tanona we sur siwo, ape tam o tawagas valis ni te sagesaru vires.

¹¹ Ape o loa we roworaka mun nalalavina wa we saqo ran o valis, wa natawagasina ti nun tagea, wa o lulum tape tarapena ti pea qet; wa tamaine mulaŋ i meresom te raŋo ran alo non o vanoga ŋaŋ.

¹² Tur wievavae i gene we roŋo virig alo we meregalea; ape me iloilo vaglala paso ape neia, ni te qara taur mona o vilvilqat we esu, i Lord me ligog ti apena mun rasei we tapetape ineia.

¹³ Pa alo si qe meregale isei, neia nipea vava si, Amon God we meregale inau. O manigiu tete meregale lai God ape gene ŋaŋ gate wia, wa mulaŋ ni gate meregale ilo isei.

¹⁴ Nava we meregale val sei, alo non o tortoron kiskislag ŋaŋ we kaloa kel wa we pea ineia;

¹⁵ wa paso nan o toron kiskislag me wune, wa ti vasus o ganganor; wa o ganganor me poa sage, wa ti vasisgag o matea.

¹⁶ Tur pea leralera, ratatasik ra meratape;

¹⁷ val gene we wia te ukeg ma, wa val gene we taurmate te sogov ma, we tavunana ma wa we siwo ma amen o Mama, anona o valawar ŋaŋ, wa i tagai ran amaia sin ris, wa i tagai si tama naniniana te al sea nan amoa apena.

¹⁸ Ape ni me maros vasarig apena ni me vasisgag mona inina mun o vavae tape liŋai we nun, si nina tama o sawal taqai alo gene tiŋ ŋaŋ anona.

¹⁹ Wa o manigiu o ine, ra tatasik ra meratape, val tanun ni togtogoa si a tiŋqoro, ni malapusa si a vavava, ni malapusa si a lologagara.

²⁰ Ape o lologagara amon o tanun gate gagapalag ran naliŋan God we taniniga.

²¹ Wa o manigiu si kamiu a gevtag qet o togara pulua, wa o liŋe kiskislag we ura sal; wa tur taur aperig nomiu o vavae me riv siwo, we mana si a vaesu naatamiu.

²² Pa tur qeteg gagapalag o vavae, wa turpea tiŋtiŋqoro vires, we galegale kel kamiu.

²³ Ape si isei qe tiŋtiŋqoro gese o vavae, wa gate gagapalag, i gene ilone te tama o tanun we sagsagarag natarape nagona alo tironin;

²⁴ ape ni me sagarag kelua, wa paso nan ni me suwa kel, wa gaplot ni me loloqoŋ ape neia kel si we savai.

²⁵ Nava isei qe patpatarag o lea me ge taurmate, tape togara wasawasa nane, wa we kata netenete apena; i gene nake iloke gate toga tiŋqoro gap we titatala, nava ni we gege o gagapalag, wa i gene wievavae iloke alo mon o gagapalag.

²⁶ Si qe nonom apen sei alo vatitnamiu si ni we gagapalag we roŋo mun God, pa ni gate ge goro nagarameana mun o talai, pa ni we soŋ vires natoqana, naliŋan i gene iloke o liŋe gagapalag matila.

²⁷ O liŋe gagapalag roŋo we wenewene wa gate pulua ilo alo nagon God i Tamanina ineia iloke wa, sin vaatev ira manua ŋaŋ wa iraro naro alo nor o togara we mamagarosa, wa sin ora goro kelua nan wa lepavag o marama.