I Peter 1 - O Vatavata we Garaqa 1931 (Vanuatu)

¹ I Peter, nasalan Jesus Christ, munra iloraka tamaira we toga salsaleŋa amaira tawu a Pontus, a Galatia, a Kapadokia, a Asia, a Bithinia,

² tama God o Mama me lolomaran moai neira ti, mun o varoŋova mun o Vui, ilo meremaŋas wa we savsavur nanaran Jesus Christ: O sogov wa o tamata a qoqoqo mun kamiu.

³ Tur wievavae God wa i Taman i Lord inina i Jesus Christ, pa tataga non o magarosa we lava ni me ge wota mulaŋ inina ilo maros nerei we esu, mun o tavaraka anon Jesus Christ nan ra mate,

⁴ ilo tano usurag tete naru lai, wa gate pulua, wa tete golo lai, me kokor goro ape nina avunana,

⁵ pa me ilogoro nina mun o mana non God mun o nomtup ilo esuva, we tira ape we ge ŋaŋalue alo qoŋ ŋaŋ o paspasoanai.

⁶ Alo ike kam we qaraqara; pa ilokenake gale wora, (si qe tira apena), kamiu we lolowono ape meregale we qoqo,

⁷ si alo we gege ilo nomiu o nomtup, pa we mava sal o gold ti tagtagea, pa si me gege ilo mun o av, te rowolue ilo varean, mun o ronoga wa mun o leŋas alo i Jesus Christ we ŋaŋalue ma:

⁸ kamiu gate iloa pa we tapea, wa kam gate iloa ilokenake pa we nomtupua, kam we qaraqara mun o qara tete vava lai apena, wa we leŋas,

⁹ wa we taur o ulus nomtup anomiu, was we vaesu naatamiu.

¹⁰ Wa ape vaesuva ilone, ira prophet ŋaŋ me ligoligog ti ape sogov ilone mun kamiu me sikesike, wa me sikesike nurnur,

¹¹ me sike o masaoi avea wa o masaoi we savai o Vui non i Christ alo ineira we gaganag apena, alo we gaganag we tira amoa ape roŋovivtig ŋaŋ anon i Christ, wa o ronoga te tataga apena.

¹² Wa me ŋaŋalue mun neira, si gate mun neira kel pa mun kamiu neira we gagapalag o gene ŋaŋ iloke, me gaganag lue mun kamiu ilokenake mun ragai me toretore goro mun kamiu ape lea we wia mun o Vui we Roŋo me suwarea ma ti avunana; pa ira angel ŋaŋ me toron we patarag ilolona.

¹³ O manigiu iloke tur rotig goro o toqe gilagilala anomiu, tur ora goro kel kamiu, wa tur maros nerei mantag ape sogov te tak ma sur kamiu alo ŋaŋalue ma anon i Jesus Christ:

¹⁴ tama o nat meremaŋas ŋaŋ, wa turpea ris tataga nomiu o toroniva we tuai alo loloqoŋ:

¹⁵ pa tama i gene we loglog kamiu we roŋo, wa kamiu mulaŋ a roŋo alo val sale togara:

¹⁶ ape me rave ti wa, Kamiu te roŋo, ape nau we roŋo.

¹⁷ Pa si kamiu we loglogia si o Mama, wa ni gate lavlav vires nanagon sei pa we veveg tataga o gagapalag non valsei, tur toga gogolo alo masaoi kam te toga tawu alolona:

¹⁸ wa kamiu we gilala si gate tun kel kamiu mun o gene sagesaru ŋaŋ, tama o silver si o gold, nan o togara matila me gaganag usurag ma ti nan ra tupumiu,

¹⁹ nava mun nanaran Christ o gene tun, tama mun o nare nat sheep tur wia wa we tarowasa;

²⁰ pa me gilala tuai ran ineia alo gate tiŋ tiqa o marama, pa me gaganag luea alo qoŋ ŋaŋ iloke a tagir apen kamiu,

²¹ ragai we nomtup God munia, pa ni me ge raka kelua nanra mate, wa me la munia o leŋas, si nomiu o nomtup wa o maros nerei a toga alo God.

²² Pa kamiu me ge matartoga veta natoqamiu alo we maŋas goro o nun ilo tapetape retatasiu wa gate gale ilo, tur vartapetape lolotitin kel kamiu nan natoqamiu:

²³ ikamiu qa me wota mulaŋ ma pa gate talo sivui we naru, nava talo sivui tete naru lai, mun o vavae esu non God i toga galava.

²⁴ Ape, O visogoi nol tama o valis, Wa o leŋas nol tapena tama o tawagas valis; Pa o valis we kor wa o tawagasiu ti nun tagea,

²⁵ Pa o vavae non Lord ti toga galava. Iloke o liŋe lea we wia nake me gaganag lue veta ti mun kamiu.