I John 1 - O Vatavata we Garaqa 1931 (Vanuatu)

¹ Kamam we gaganag mun kamiu ape gene talo qetegiu ran ma, kamam me roŋotag ape vave esu, wa kamam me ilo mun namatamam, wa kamam me sagarag, wa napanemam me taŋo apena;

² wa o esu me ŋaŋa lue; wa kamam me ilo, wa we gaganag we tira, wa we gaganag mun kamiu o esu, o esu galava ilone me toga we tuai amen o Mama, wa me ŋaŋalue ma mun kamam.

³ Kamam we gaganag mun kamiu o gene kamam me ilo wa me roŋotag, si kamiu mulaŋ a pul amen kamam, wa we nun nomam o pul tuwale amen o Mama wa amen Natuna i Jesus Christ.

⁴ Wa ikamam we rave o gene ŋaŋ iloke, si nomam o malakalaka a wesu ran apena.

⁵ Wa iloke o roro lea kamam me roŋotag amaia, wa we gaganag tapare at mun kamiu, was God o marmararan, wa i tagtagai tea o silsiliga alo ineia.

⁶ Si nina qe vava wa si nina we pul amaia, pa nina qale mulemule alo silsiliga, nina we gale, nina gate gagapalag o nun;

⁷ pa si nina qe mulemule alo marmararan, tama ineia alo marmararan, nina te qara varpul tuwale, wa nanaran i Jesus Christ i Natuna we ge wenewene inina nan o ganganor nol.

⁸ Si nina qe vava wa si o ganganor gate toga tea alo inina, nina we ge lera kel nina, wa o nun gate toga alo inina.

⁹ Si nina qe gaganag lue ape nonina o ganganor, ni we toga kokomag wa ni tete ge ava mon o vavae ligoligog ape nomvitag nonina o ganganor, wa ape ge wenewene inina nan o lerava nol.

¹⁰ Si nina qe vava wa si nina gate ge ilo o ganganor, nina te vet si ni we gale, wa mon o vavae gate toga alo inina.