II Peter 1 - O Vatavata we Garaqa 1931 (Vanuatu)

¹ I Simon Peter, o rowrowovag wa o sala anan i Jesus Christ, mun ragai me taur mora veta o nomtup iloke, o gene tun amaira wa amen kamam we sasarita, alo liŋe taniniga mon God inina wa i Vaesunina i Jesus Christ:

² O sogov wa o tamata a qoqoqo mun kamiu alo tur lolomaran apen God wa apen i Jesus i Lord inina.

³ Wa o manigiu apena mun non o mana tape matev God ni me la ma mun nina o gene nol we tira ape esu wa ape momogo God, mun o tur lolomaran apen i gene me loglog nina ma ti mun naleŋasina ran wa namatevuna we wia;

⁴ wa alo ilone ni me la ma mun nina o vatavata ŋaŋ we poa wa we mava aneane; si mun iloke ŋaŋ te ge kamiu si a pul alo matev God, pa me toa wasawasa veta nan o gene narunaru tape marama mun o tortoron kiskislag.

⁵ Wa o manigiu iloke namomiu a la piriŋ o tinegaro nol; tur tuan mun nomiu o nomtup o matevui we wia, wa mun o matevui we wia o lolomaran,

⁶ wa mun o lolomaran o matev ora goro kel, wa mun o matev ora goro kel o malumuaga, wa mun o malumuaga o momogo God,

⁷ wa mun o momogo God o tapetape retatasiu, wa mun o tapetape retatasiu o tapeva.

⁸ Ape si iloke ŋaŋ ta toga alo ikamiu wa we ura sal, we ge kamiu si kamiu gate maraŋ wa o parou alo tur lolomaran apen Lord inina i Jesus Christ.

⁹ Pa si iloke ŋaŋ ta tete amen sei, neia o matapei, wa we ilo maturtur, wa me ge loloqoŋ kelua si me ge wenewene veta ineia nan non o ganganor we tuai.

¹⁰ O manigiu iloke, ra tasik, tur meremawui si a ge nomiu o liŋe suwasuware wa o iloraka si a tira maremare: pa si kam ta ge o ike ŋaŋ kam tete tutuag ran:

¹¹ ape tamaike nake te vasoal poa mun kamiu o tano vanoga ilo marana galava non i Lord wa i Vaesunina i Jesus Christ.

¹² O manigiu iloke na te toga taurmate mok si na ge lolomaran vagae kamiu ape ike ŋaŋ, pa kamiu me lolomaran veta apena, wa me vatogar veta kamiu alo nun te qale toga ti.

¹³ Pa nau we nonom si we wia alo na qale toga alo paito iloke, si a vasosov lolomaran kamiu.

¹⁴ Ape na we gilala si rigrig ti na te saru vitag napaitok iloke, tama i Lord inina i Jesus Christ me gaganag ti munau.

¹⁵ Wa mulaŋ na te gege ilo si alo nau me mule veta at kamiu te lolomaran vagae ape ike ŋaŋ;

¹⁶ apen kamam gate tataga gap o kakakae nurnurug ŋaŋ alo kamam me gaganag lolomaran kamiu ape o mana wa o muleva ma anon i Jesus Christ i Lord inina, pa katol me sagsagarag naleŋasina mun namatankatol.

¹⁷ Ape ni me la mona amen God o Mama o ronoga wa o leŋas, alo me rowo ma munia o liŋai tamaine nan o leŋas maranaga ilone wa, Iloke gina natuk o meratape, na me ilo mana ineia.

¹⁸ Naŋ katol me roŋotag o liŋai iloke we rowo ma avunana alo katol amaia avawo tauwe ilone we roŋo.

¹⁹ Wa amen kamam o vavae ligoligog me rapai veta, wa kamiu we ge we wia si kam qe nonom tinegaro apena, tama si o pul we lawalawa alo masaoi we silsiliga, o maran gai teve, wa o masoe a rowo raka alo toqamiu.

²⁰ Pa kamiu we lolomaran moai iloke, ape vavae ligoligog nol talo raverave we roŋo si sei tete gaganag ulul matapuna lai apena.

²¹ Ape vavae ligoligog gate mule we tuai ran ma mun o maros non o tanun; nava o tanun ŋaŋ we roŋo anan God me vavava tama me vasuratira amon o Vui we Roŋo apena.