II John 1 - O Vatavata we Garaqa 1931 (Vanuatu)

¹ I tamaragai mun o motar ilo raka, tara nanatuna, nau we tape mok neira alo liŋe nun; wa gate inau magesek, nava iragai nol mulaŋ we lolomaran o liŋe nun;

² o manigiu o liŋe nun iloke we goara alo nina, wa te toga amen nina ti tuai ti tuai:

³ O sogov, o magarosa, o tamata te toga amenina, tamen God o Mama, wa tamen i Lord Jesus Christ, i Natun o Mama, alo liŋe nun wa alo tapeva.

⁴ Nau me malakalaka we poa, ape nau me ilo suar o tuan ranatuma we mulemule mora alo liŋe nun tama nina me lav monina o lea vatraŋ amen o Mama apena.

⁵ Wa ilokenake nau we paere muniko, gai motar, pa gate tama si we rave muniko o lea vatraŋ we garaqa, nava iloke nake gina nina me taur monina alo qetegiu ran ma, si nina var tapetape kel nina.

⁶ Wa iloke o tapeva nake, si nina mulemule tataga non o lea vatraŋ ŋaŋ. Iloke gina o lea vatraŋ tama kamiu me roŋotag alo qetegiu ran ma, si kamiu a mulemule momiu alolona.

⁷ Wa o manigiu si ira nulenule we qoqo me rowolue veta ma ilo marama, iragai ŋaŋ nane gate gaganag lue si i Jesus Christ we mule ma alo visogoi. I gene iloke i nulenule wa o tavalalea mun Christ.

⁸ Tur ilo goro kel kamiu, nan kamiu wa ge tagea o gene ŋaŋ kamam me gagapalag momam apena, nava si kamiu a taur qet momiu o rusarusai we wono ran.

⁹ Val sei qe tira taso, wa gate toga nev alo liŋe vatvatogo mon i Christ, God itagai amaia. I gene we toga nev mona alo liŋe vatvatogo mon Christ, amen i gene iloke o Mama wa o Natui.

¹⁰ Si sei qe mule ma sur kamiu, wa gate mulevag ma o lea vatvatogo iloke, turpea lav pata i gene ilone ilo ima, wa turpea vava vawia munia.

¹¹ Apen sei we vava vawia munia, we qeteg pul amaia alo non o gagapalag ganganor.

¹² Amen nau we qoqo si na rave mok at sur kamiu apena, pa nau gate maros mun o paper wa o iŋ. Nava nau we nom galtag si na mule lai at sur ikamiu, wa we varvava valai ape valai, si nomiu o malakalaka a ura qet apena.

¹³ Ira nanatun tasima iro ilo raka we wievavaeko.