III John 1 - O Vatavata we Garaqa 1931 (Vanuatu)

¹ I tamaragai mun Gaius o meratape, nau we tape mok iniko alo liŋe nun.

² Gai meratape, nau we tataro mok si ka tira mantag taso alo gene nol ŋaŋ, wa si ka esuesu tama naatama we tira mantag taso.

³ Ape nau me malakalaka lava mok alo ra tatasiu ilone me niŋa ma wa we gaganag we tira ape nom o liŋe nun, tama ko we mulemule moma alo liŋe nun.

⁴ I tagai o malakalaka amen nau we poa nan o ike, si na roŋotag apenra nanatuk we mulemule mora alo liŋe nun.

⁵ Gai meratape, o gagapalag kokomag iloke ko we ge moma munra tatasiu neira we tawu;

⁶ wa neira me gaganag we tira ape nom o tapeva alo nago loglue; wa ko te ge mantag aneane we suware piriŋira at tama we sar amen God.

⁷ Ape o manigiu o Sasai neira me rowolue at, wa gate taur ilo o sava amenra talo sul ŋaŋ we sea.

⁸ Wa o manigiu o ine amonina ran si nina a lav vasgot iragai we tamaine; si nina a gagapalag piriŋ monina lai ape liŋe nun.

⁹ Nau me rave mok ti mun o loglue, nava i Diotrephes ilone we maros we moai gorora, wa ni gate lav mona ikamam.

¹⁰ O manigiu ilone alo si na qe mule at nau te nom kel mok ape mon o gagapalag ŋaŋ ilone ni we ge, we ŋorogao tamaine apen kamam mun o vavae ŋaŋ we tatas. Wa ilone ŋaŋ gate sasarita munia, pa ineia gate lav mona o retatasiu, wa ni we ge gorora mulaŋ we maros we lavira, wa ni we vurevure savragira nan o loglue.

¹¹ Gai meratape, nipea gege makala ape tatas, nava ape wia. I gene we gagapalag we wia ineia tamen God ma: nava i gene we gagapalag we tatas ni gate ilo tea God.

¹² Iragai ŋaŋ nol we gaganag weswes lue apen Demetrius, wa o liŋe nun mulaŋ we gaganag. Wa kamam mulaŋ we gaganag momam apena, wa kamiu we gilala si nomam o vavae gaganag we nun.

¹³ Amen nau we qoqo si na rave mok at suriko apena, pa nau gate maros we rave suriko mun o iŋ wa o pen.

¹⁴ Nava nau we nom galtag si na ilo gaplot iniko, wa nara te varvava valai ape valai.

¹⁵ O tamata ni toga amaiko. Ira pulpulsala we wievavaeko. Ka wievavae ra pulsala mun nasasara.