Vẽnegre 20 - KÃAB-PAALGÃ KOE-NOOGO

Yʋʋm tusr naam dɩɩbo

¹ Dẽ poore, mam yãa malɛk sẽn yi arzãn n sigda, n zãad bog zulungã kʋɩlen-biiga la bãng-kãseng a nugẽ.

² Malɛkã yõka dargõ wã sẽn ya wag-kʋdrã, la rõatã, la a Sʋtãan n balg-a yʋʋm tusr yĩnga.

³ A lob-a-la bog-zulungã pʋgẽ n page, la a sog bokã noor Sʋtãanã zugẽ, sẽn na yɩl t'a da leb n belg soolem dãmba yɛsa, hal tɩ yʋʋm tusrã pidsi. Rẽ poore, yaa tɩlɛ tɩ b lok-a n bas wakat bilf yĩnga.

⁴ Mam yãa naam-gɛyã. La b kõo neb nins sẽn zĩnd gɛyã zutã noor tɩ b bʋ bʋʋdo. La mam yãa neb nins b sẽn fiuus b zut a Zezi kasetã ne Wẽnnaam goamã yĩngã sɩɩse, la neb nins sẽn dag n ka wõgemd rũngã wall a bõn-naandgã taoore, la b ka reeg bãndã b rĩyẽ wall b nusã zutã sɩɩse. Bãmb vʋʋgame n dɩ naam ne Kirist yʋʋm tusri.

⁵ La kũ-rãmb a taabã ka vʋʋg ye, hal tɩ yʋʋm tusrã pidsi. Vʋʋg-kãng yaa dẽenem vʋʋgre.

⁶ Neb nins sẽn naag n paam dẽenem vʋʋgrã tara bark la sõmblem. Kũum a yiib soabã ka tar b tʋʋmd ye. Bãmb na n yɩɩ Wẽnnaam ne Kiristã maan-kʋʋdba, la b na n dɩɩ naam ne Kiristã yʋʋm tusri.

⁷ Yʋʋm tusrã sã n wa pidi, b na n yiisa a Sʋtãan a bi-bees roogẽ wã n bas-a,

⁸ la a na n yiime n belg soolem nins sẽn be dũniyã kɩrems a naasã neba, Gaoog ne Magaoog, sẽn na n yɩl n tigim bãmb zabr yĩnga. Bãmb sõorã yaa wa ko-kãsengã bĩisri.

⁹ Bãmb yiime n yɛdg tẽng zugu, la b kẽe nin-sõamy wã tãb-sikẽ wã, la tẽn-nongrẽ wã. La bugum yii arzãn n sig n dɩ-ba.

¹⁰ B loba bɛlgdã, soab ning sẽn dag n belgd nebã bugum mogr sẽn dɩt kidbr pʋga, zĩig ning rũngã ne belgr no-rɛɛsã sẽn be wã. Bãmb na n namsa wĩndg ne yʋngo, zamaan o zamaane.

Yaoolem bʋ-kaoore

¹¹ Dẽ poore, mam yãa ge-kãseng sẽn ya pɛɛlga, ne ned ninga sẽn zao-a geerã zugã. La dũniyã ne saasẽ zoee bãmb taoor n looge, la zĩig ka leb n be bãmb yĩng ye.

¹² La mam yãa neb nins sẽn ki wã, nin-kãsemse, nin-talse tɩ b yas geerã taoore. La b lagsa sɛba, la b laka sebr a to sẽn ya vɩɩm sebre. B bʋʋ sẽn ki-bã bʋʋdo, n zems ne bũmb nins sẽn gʋls sɛbã pʋsã, n zems ned fãa tʋʋmd sẽ yɩ a soaba.

¹³ Ko-kãsengã lebsa kũum nins sẽn da be be wã, tɩ kũumã ne kɩɩm-kulg lebs kũum nins sẽn da be be wã, la b bʋʋ bãmb ned kam fãa bʋʋd wa sẽn zems a tʋʋma.

¹⁴ B loba kũumã ne kɩɩm-kulg bugum mogrã pʋga. Bugum mogrã yaa kũum a yiib soaba.

¹⁵ B loba ned ning fãa b sẽn ka yã a yʋʋr tɩ gʋls vɩɩm sebrã pʋgẽ wã bugum mogrã pʋga.