Vẽnegre 19 - KÃAB-PAALGÃ KOE-NOOGO

Neb kʋʋng sẽn pẽgd Wẽnnaam arzãn pʋgẽ

¹ Rẽ poore, mam wʋma koe-kãseng arzãn pʋgẽ sẽn wẽmd neb kʋʋng wʋsg koees sẽn yet yaa: Halleluya! Fãagr la ziir ne pãng yaa tõnd Wẽnnaamã n so,

² bãmb bʋ-kaoorã sẽn ya sɩd la tɩrgã yĩnga. Wẽnnaam kaoo pʋg-yood kãsengã sẽn dag n sãamd dũni ne a yoobã bʋʋdo. La Wẽnnaam doka n tʋmtʋmdbã sũuri, yẽ sẽn daag bãmb zɩɩmã yĩnga.

³ La b leb n yeela naoor a yiib soab yaa: Halleluya! La yẽ bug-zõos zẽkda zamaan o zamaane.

⁴ Kãsem-dãmbã pisi la a naasã ne bõn-vɩɩs a naasã wõgemdame n waoog Wẽnnaam sẽn zao geerã zugã n yeel tɩ: Ãmina! Halleluya!

⁵ Koɛɛg yii geerẽ wã n yeel yaa: Yãmb fãa sẽn ya Wẽnnaam tʋmtʋmdbã, yãmb dãmb sẽn zoet bãmbã, nin-tals la nin-kãsemse, pẽg-y tõnd Wẽnnaamã.

⁶ La mam wʋma koɛɛg sẽn wẽnd wa neb kʋʋng wʋsg koeese, n wẽnd wa ko-kãsems koeese, n wẽnd wa sa-kelems kãsems koees sẽn yet yaa: Halleluya! Bala tõnd Zu-soab a Wẽnnaam sẽn Tõeya fãa wã zĩndiga b naam.

⁷ D maan sũ-noog n kɩdme, la d waoog bãmba, bala Pe-bilã pʋg-peegrã daar taame, la bãmb pʋg-paalã segla a meng n sɛ.

⁸ B kõo pʋg-paalã lẽ sõng fuug sẽn pɩnd n ka tar rẽgd t'a yeelge. Lẽ sõng fuugã yaa nin-sõamy wã tʋʋm sõamyã.

Pe-bilã pʋg-peegr kibsa

⁹ Malɛkã yeela maam yaa: Gʋlse: Bark bee neb nins b sẽn bool tɩ b wa Pe-bilã pʋg-peegr kibsã zutu! La a yeela maam yaa: Koe-kãngã yaa Wẽnnaam meng goama.

¹⁰ La mam wõgemda yẽ taoor n na n waoog-a, la a yeela maam yaa: Da saag n maan a woto ye! Mam yaa fo tʋmd-n-taaga la fo ba-biis nins sẽn tar a Zezi kasetã tʋmd-n-taaga. Waoog Wẽnnaam! Wẽnnaam no-rɛɛsdbã goam yita a Zezi kasetã pʋga.

Wed-rʋʋd sẽn zao wed-pɛɛlga

¹¹ Dẽ poore, mam yãnda arzãn sẽn pake, la mam yãa wed-moaag sẽn ya pɛɛlga. Ned ning sẽn zao-a weefã yʋʋr la a Sɩd-maanda la a Sɩd-sɩda. Bãmb bʋʋda bʋʋdã ne tɩrlem la b zabd ne tɩrlem.

¹² Bãmb ninã yaa wa bug-witim. Maanf-rãmb wʋsg n fõg bãmb zugã. Bãmb tara yʋʋr sẽn gʋls tɩ ned baa a yen ka mi, sã n ka bãmb mengã bala,

¹³ la b yera fu-taok sẽn los zɩɩmẽ. Bãmb yʋʋr la a Wẽnd-gomde.

¹⁴ Sodaasã sẽn be arzãnã dag n zaoo wed-peels n pʋgd bãmba, n yer lẽ sõng fut sẽn ya peels la yoalgma.

¹⁵ Zabr sʋʋg sẽn dɩt n dag yit b noorẽ wã n na n sɩbg soolem dãmbã. Bãmb na n zãa kut dasaar n dɩlg-ba. Bãmb na n taba bũmb nins sẽn be Wẽnnaam sẽn Tõeya fãa wã sũ-puugr sẽn ya kãsenga divẽ wẽkr koglgã pʋgẽ wã.

¹⁶ Bãmb tara yʋʋr sẽn gʋls b fuugã zug la b geerã zugu: rĩm-dãmb Rĩma, la zu-soben-dãmb Zu-soaba.

¹⁷ Mam yãa malɛk sẽn yas wĩntoogã pʋgẽ. Yẽ zẽka a koɛɛg ne pãng n yeel bõn-yɩgdɩ wã fãa sẽn yɩgd yĩngrã yaa: wa-y n tigm-y taab Wẽnnaam kibs kãsengã yĩnga,

¹⁸ tɩ y tõe n dɩ rĩm-dãmb nemdo, sodaas nanams nemdo, pãens rãmbã nemdo, wed-moos ne b rʋʋdbã nemdo, neb fãa nemdo, burkĩmb la yemse, nin-tals ne nin-kãsemse.

¹⁹ Mam yãa rũngã ne dũni rĩm-dãmbã ne b sodaasã sẽn tigim taab n na n zab ne soab ning sẽn zao-a wed-pɛɛlgã, la ne a sodaasã.

²⁰ La b yõga rũngã ne zãmb no-rɛɛs ning sẽn dag n maan bõn-yɛɛsds rũngã taoor n belg neb nins sẽn deeg rũngã bãndã la b wõgemded yẽ bõn-naandgã taoorã. B loba bãmb b yiiba fãa vɩɩs bugum mogr sẽn dɩt kidbr pʋgẽ.

²¹ La sʋʋg ning sẽn dag n yit soab ning sẽn zao wed-moaagã zugã noorẽ wã kʋʋ neb a taabã. La bõn-yɩgdɩ wã fãa rɩɩ bãmb nemdã n tɩge.