Vẽnegre 13 - KÃAB-PAALGÃ KOE-NOOGO

Rũms a yiibu

¹ Dẽ poore, mam yãa rũng sẽn yi ko-kãsengẽ wã n tar yɩɩl piiga la zut a yopoe, la maanf-rãmb piig n dag n be a yɩɩla zutu, la Wẽnnaam tʋʋsg yʋy n dag n gʋls a zutẽ wã.

² Rũngã mam sẽn yã wã ra wẽndã wa ãbga, t'a naowã wẽnd wa wʋrs naowã, t'a noorã wẽnd wa gɩgemd noore. Bõninnã kõo rũngã a pãngã la a geerã la a pãn-tõogã.

³ La mam yãa rũngã zug a yen sẽn pogle, n ya wa a na n kiime, la a poglgã sẽn da tog n kʋ-a wã maagame. Neba fãa sẽn be tẽng zugã yɛɛsame la b tũu rũngã.

⁴ B wõgemda bõninnã taoore a sẽn kõ rũngã pãn-tõogã yĩnga. B wõgemda rũngã taoore, n yeele: Ãnnã n wẽnd rũngã, la ãnna n tõe n zab ne-a?

⁵ B kõo rũngã noor t'a gom wilg-m-meng goama la Wẽnnaam paoogr goama. La b kõo yẽ pãn-tõog t'a tʋm kiis pis-naas la a yiibu.

⁶ Rũngã yaaga a noor n na n gom n paoog Wẽnnaam, n paoog bãmb yʋʋrã la b sɛk-roogã, la neb nins sẽn be arzãnã.

⁷ La b kõo yẽ noor t'a yik zabr ne Wẽnnaam nin-tũusdsã n tõog-ba. B kõo yẽ pãn-tõog t'a tõog buud fãa, la tẽng fãa neba, la goam buud fãa neba la soolem fãa.

⁸ La neba fãa sẽn be tẽng zugu, tɩ b yʋy ka gʋls vɩɩm sebr sẽn ya Pe-bil ning b sẽn kʋ hal dũni naaneg wakatã sebrã pʋgẽ wã wõgemda rũngã taoore.

⁹ Ned sã n tar tʋb bɩ a kelge!

¹⁰ Ned sã n tog n kẽ yembdo, a na n kẽ yembdo. Ned sã n kʋ ne zabr sʋʋga, yaa tɩlɛ tɩ b kʋ-a ne zabr sʋʋga. Wẽnnaam nin-tũusdsã modgr la b tẽebã la woto.

¹¹ Dẽ poore, mam yãa rũng a to sẽn yi tẽnga pʋgẽ. A ra tara yɩɩl a yiib sẽn wẽnd wa pe-bil yɩɩla, la a ra gomda wa bõninnã.

¹² Yẽ da tʋmda ne pipi rũngã pãn-tõogã fãa a nifẽ, la a kɩtame tɩ tẽngã ne nebã sẽn be a zugã wõgemded pipi rũngã sẽn da paam sãmpog-kʋʋdg tɩ maagã taoore.

¹³ Rũng a yiib-n-soabã maana bãn-kãsemse, hal n kɩtdẽ tɩ bugum yit yĩngr n sigd tẽngã zug nebã nifẽ.

¹⁴ Ne bãn b sẽn kõ-a noor t'a maan pipi rũngã taoorã, a belga nebã sẽn be tẽng zugã, n yeel-b tɩ b maan rũng ning sẽn paam poglg ne zabr sʋʋg n kell n põsã bõn-naandga.

¹⁵ B kõo rũng a yiib-n-soabã pãn-tõog t'a kɩt tɩ pipi rũngã bõn-naandgã paam sɩɩga, sẽn na yɩl la bõn-naandgã gome la a kɩt tɩ b kʋ neb nins fãa sẽn kõn wõgemd rũngã bõn-naandgã taoorã.

¹⁶ La a kɩtame tɩ neba fãa, nin-tals la nin-kãsemse, arzegs rãmb la naong rãmba, yemse ne burkĩmb reeg bãnd b nug-rɩtgo wall b rĩyã zutu,

¹⁷ la tɩ ned baa a yen ra tõog n da wall a koose, t'a ka tar bãndã, rũngã yʋʋre, wall a yʋʋrã geel-bilã ye.

¹⁸ Yam la woto. Bɩ ned ning sẽn tar yam geelg rũngã yʋʋr geelg sõore. Bala, yaa ninsaal yʋʋr geelg sõore, la a yʋʋrã geelg sõor yaa 666.