Vẽnegre 12 - KÃAB-PAALGÃ KOE-NOOGO

Pag ne bõninna

¹ Bõn-bãnd sẽn ya kãseng puka arzãna. Yaa pag sẽn pil wĩntoog wa fuugu, n tab kiuugã ne a nao, la a fõgen maanf sẽn maan ne ãds piig la a yiibu.

² Pagã ra tʋtame, la a kʋmda rogem kʋnkʋma, rogmã toog sẽn namsd-a yĩnga.

³ Bõn-bãnd a to puka arzãna: Ad yaa bõnin-kãseng sẽn ya miuugu, n tar zut a yopoe ne yɩɩl piiga, la maanf-rãmb n da fõg a zut a yopoe wã.

⁴ Yẽ zʋʋrã rag n kãagda ãdsã sẽn be yĩngrã, yembr taab fãa sʋk n lobd tẽng zugu. Bõninã yik n yalsa pag ning sẽn dat n dogã taoore, tɩ pagã sẽn dog yee, bɩ yẽ vel a biigã.

⁵ Pagã roga bi-ribla, rao sẽn na n zã kut dasaar n soog soolem fãa. La b zẽka pagã biig t'a kẽng Wẽnnaam nengẽ, la b geerẽ wã.

⁶ La pagã zoee n kẽnga weoogẽ, zĩig ninga Wẽnnaam sẽn dag n segl a yĩngã, tɩ b tõe n dɩlg-a be rasem tusr la kobs yi la pis yoobe.

⁷ Zab-kãseng zĩnda arzãna. Malegs naab a Misɛl ne a malegsã zaba ne bõninnã. Bõninnã me ne a malegsã zabame,

⁸ la b ka tõog ye. La zĩig ka leb n zĩnd arzãn yẽ yĩng ye.

⁹ B riga bõnin-kãsengã, wag-kʋdrã b sẽn boond tɩ rõatã la a Sʋtãana, soab ning sẽn belgd tẽngã zĩig ning fãa neb sẽn be wã nebã. B tusa yẽnda ne a malegsã n lob tẽng zugu.

¹⁰ Dẽ, mam wʋma koe-kãseng arzãn pʋgẽ sẽn yeel yaa: Moasã, fãagre, la pãnga, la tõnd Wẽnnaamã naam la bãmb Kiristã noor waame. Bala, b luba tõnd ba-biisã rõatã, soab ning sẽn dag n dõt bãmb Wẽnnaam taoor wĩndg la yʋngã.

¹¹ D ba-biisã tõoga rõatã ne Pe-bilã zɩɩm pãnga, la ne kasetã bãmb sẽn kɩtã pãnga, la bãmb ka nong b vɩɩmã, hal n zoe kũum ye.

¹² Yaa woto yĩnga, bɩ arzãna la yãmb dãmb sẽn be beene wã maan sũ-noogo! Toog na n paama tẽngã ne ko-kãsengã. Bala, Sʋtãana sig n waa yãmb nengẽ ne sũ-puugri, a sẽn bãng t'a wakatã sẽn ketã ka waoogã yĩnga.

¹³ Bõninnã sẽn yã tɩ b loba yẽnda tẽng zugã, a babsa pag ning sẽn dog-a bi-riblã.

¹⁴ La b kõo pagã panantug-kẽeng pɩgs a yiib t'a yɩk n kẽng weoogẽ wã, a zĩigẽ wã, zĩig ning b sẽn na n dɩlg-a wakat a yembre, la wakat dãmba, la wakat pʋɩ-sʋkã, tɩ waafã ra yã-a ye.

¹⁵ La waafã kɩtame tɩ koom yi a noorẽ wã, n ya wa mogr koom ne pʋgl pagã, sẽn na yɩl tɩ koomã kãag pagã.

¹⁶ La tẽngã sõnga pagã, n yaag a noor n vel koomã bõninnã sẽn yiis a noorẽ wã.

¹⁷ Bõninnã sũur puuga ne pagã, la a kẽngame n tɩ yik zabr ne pagã yagensã sẽn kellã, neb nins sẽn sakd Wẽnnaam tõodã la sẽn tall-b a Zezi kasetã.

¹⁸ La bõninnã yik n yalsa ko-kãsengã bĩisr zugu.