Vẽnegre 11 - KÃAB-PAALGÃ KOE-NOOGO

Kaset dãmb a yiibu

¹ B kõo maam tãnwĩig sẽn wẽnd wa dasaar n yeel maam yaa: Yik n mak Wẽnnaam doogã ne tẽn-kugrã, la neb nins sẽn be beene n pʋʋsdẽ wã.

² La bas Wẽnnaam doogã samandã kɛɛng n da mak-a ye, tɩ bala, b kõ-a la bu-zẽmsã, la bãmb na n taba tẽn-sõngã kiis pis-naas la a yiibu.

³ Mam na n kõo m kaset dãmb a yiibã pĩnd-n-bãngr goam kũuni, tɩ b yeelg bot n togs bãngr goamã rasem tusr la kobs-yi la pis-yopoe.

⁴ Yaa bãmb la oliiv tɩɩs a yiibu la fɩtl-dogends a yiibã sẽn yas tẽngã Zu-soabã taoorã.

⁵ Ned sã n dat n nams-ba, bugum n yit bãmb noorẽ wã n dɩt b bɛɛbã. N-ye, ned sã n dat n nams-ba, yaa tɩlɛ tɩ kũum a woto kʋ-a.

⁶ Bãmb tara pãn-tõog n tõe n pag yĩngr tɩ saag ka ni dasem nins bãmb sẽn pĩnd n togsã tɛk ye, la b tara pãn-tõog n tõe n tek ko-rãmbã tɩ lebg zɩɩm, la b kɩt tɩ tood buud fãa paam nebã tẽng zugu, wakat ninga fãa b sẽn date.

⁷ Bãmb sã n wa kɩs b kasetã n sɛ, rũng ning sẽn yit bog-zulungẽ wã na n yika zabr ne bãmba, n tõog-ba, n kʋ-ba.

⁸ La b kũumã na n paa tẽn-kãseng ning b sẽn boond sɩɩg wɛɛngẽ tɩ Sodom la Eziptã pʋgẽ, vɩʋʋgẽ, zĩig ning meng b sẽn dag n ka bãmb Zu-soabã da-pɩk zugã.

⁹ Tẽns toay-toay neba, la buud toay-toay neba, la neb sẽn gomd goam buud toor-toore, la soolem toay-toay neb na n yãa bãmb kũumã rasem a tãab la pʋɩ-sʋka, la b kõn sak tɩ b rɩk-b n tɩ mum ye.

¹⁰ Dũni nebã na n maana sũ-noog ne bũmb ning sẽn paam kaset dãmb a yiibã, la b na n kɩdmame. Bãmb na n tʋma kũun n kõ taaba, bala Wẽnnaam no-rɛɛsdb a yiib kãens da namsa nebã sẽn be tẽngã zugã.

¹¹ La rasem a tãab la pʋɩ-sʋkã zugẽ, vɩɩm sɩɩg sẽn yi Wẽnnaam nengẽ kẽe bãmb pʋsẽ la b yikame n yals b nao zutu. Rabeem kãseng yõka neb nins sẽn yãt bãmbã.

¹² No-rɛɛsdb a yiibã wʋma koɛɛg sẽn yi arzãn n yeel-b yaa: Wa-y yĩngr ka! Bãmb kẽe sawadgẽ n zẽk n kẽng arzãna, la b bɛɛbã yãnda bãmba.

¹³ Wakat kãnga bala, tẽn-digimdg sẽn ya kãseng zĩndame, la tẽngã pʋɩɩr a yembr piig sʋk sirgame. Tẽn-digimdg kãng kʋʋ neb tus a yopoe, la rabeem yõka neb a taabã, la b kõo arzãn Wẽnnaamã waoogre.

¹⁴ Toog a yiib soabã loogame. Ad keta bilf tɩ toog a tãab soabã wa.

Baorg a yopoe soaba

¹⁵ Malɛk a yopoe soabã peeba baorgo. La koe-kãsems zĩnda arzãn n yeel yaa: Dũniyã soolem lebga tõnd Zu-soabã ne bãmb Kiristã n so. Bãmb na n dɩɩ naam zamaan o zamaana!

¹⁶ Kãsem-dãmb pisi la a naasã sẽn dag n zao b gɛyã zut Wẽnnaam taoorã wõgemdame n fõgen b nens tẽng n waoog Wẽnnaam n yeele:

¹⁷ Zu-soab a Wẽnnaam sẽn Tõeya fãa, sẽn be, la sẽn dag n be wã, tõnd pʋʋsd-y la barka, yãmb sẽn deeg y pãn-kãsengã la y sẽn zĩndig y naamã yĩnga.

¹⁸ Soolem toay-toayã rãmb ra yika b sũyã, la yãmb sũ-puugrã waame, la wakat taame tɩ y na n kao neb nins sẽn ki wã bʋʋdo, la y keo y no-rɛɛsdbã sẽn ya yãmb tʋmtʋmdbã ne y nin-tũusidsã la neb nins sẽn zoet yãmb yʋʋrã, nin-talse la nin-kãsemse, la y sãam neb nins sẽn sãamd tẽngã.

¹⁹ B paka Wẽnnaam roogã sẽn be arzãnã, la b yãa Wẽnnaam kãabg koglgã b roogã pʋga. Sa-yãgbo, la koeese, la sa-kelemse la tẽn-digimdg ne sapɩlem wʋsg zĩndame.