Vẽnegre 10 - KÃAB-PAALGÃ KOE-NOOGO

Malɛk sẽn zãad seb-bil sẽn lake

¹ Mam yãa malɛk a to sẽn tar pãnga, sẽn yer sawadgo n yi arzãn n sigda, la saag-gomtɩʋʋg n da be yẽ zugẽ wã. A nengã da yaa wa wĩntoogo, la a naowã da yaa wa bugum.

² Yẽ ra zãada seb-bil sẽn lake. A tilga a rɩtg naoorã ko-kãsengã zugu, la a tilg a goabg naoorã tẽngã zugu.

³ A zẽka a koɛɛg n tãs ne pãng wa gɩgemd sẽn kelemde. Malɛkã sẽn kelmã, sa-kelems a yopoe wã gomame tɩ nebã wʋme.

⁴ Sa-kelems a yopoe wã sẽn gomã, mam dag n na n gʋlsame, la mam wʋma koɛɛg sẽn yi arzãn n yeel yaa: ning bũmb nins sa-kelems a yopoe wã sẽn togsã soagdga, la f ra gʋls-b ye.

⁵ La malɛk ning mam sẽn da yã t'a yas ko-kãsenga ne tẽngã zugã zẽka a nug rɩtg n tees yĩngri,

⁶ la a wẽena ne soab ning sẽn vɩ-a zamaan o zamaanã, sẽn naan-a yĩngr ne bũmb nins sẽn be be wã, la dũniyã ne bũmb nins sẽn be be wã la ko-kãsenga ne bũmb nins sẽn be a pʋgẽ wã, n wẽen n yeel tɩ b ka na n leb n kõ weer yɛs ye,

⁷ la tɩ daar ning malɛk a yopoe soabã sẽn wat n segl n na n peeb baorgã, wakat kãng la Wẽnnaam yel-solemdã na n paam pidsg wa b sẽn dag n togs b tʋmtʋmdbã sẽn ya bãmb no-rɛɛsdbã koe-noogã.

⁸ La koɛɛg ning sẽn yi arzãn tɩ mam wʋmã leb n goma ne maam n yeel yaa: Kẽng n tɩ reeg seb-bilã sẽn lakã, malɛk ning sẽn yas-a ko-kãsengã ne tẽngã zugã nugẽ.

⁹ Mam kẽnga malɛkã nengẽ n yeel-a t'a kõ maam seb-bilã. La a yeela maam yaa: Reeg-a n vele. A na n pidsa fo pʋgã ne toolem liga, la fo noorẽ wã, a na n yɩɩ noog wa sɩɩdo.

¹⁰ Mam deega seb-bilã malɛkã nugẽ n vele. A yɩɩ noog wa sɩɩd mam noorẽ wã, la mam sẽn vel-a wã, mam pʋgã pida ne toolem.

¹¹ Dẽ poore, b yeela maam yaa: Yaa tɩlɛ tɩ fo leb n togs bãngr goam yɛs n gom neb wʋsg yelle, la buud wʋsg yelle la goam buud wʋsg yelle la rĩm-dãmb wʋsg yelle.