A Zã Sõng 9 - KÃAB-PAALGÃ KOE-NOOGO

A Zezi maaga ned sẽn dog ne zondo

¹ A Zezi sẽn loogda, b yãa dao a yen sẽn dog ne zondo.

² Bãmb karen-biisã soka bãmb yaa: Karen-saamba, yaa ãnna soab n maan yel-wẽnd tɩ rao wã rog ne zondo? Yaa yẽ meng bii, bɩ yaa a ba-rãmbã?

³ A Zezi leokame n yeele: Ka tɩ yaa yẽnda bɩ a ba-rãmbã n maan yel-wẽnd ye, la yaa tɩ Wẽnnaam tʋʋmã na tũnug yẽnda n puki.

⁴ Tõnd tog n tʋma sẽn tʋm-a maamã tʋʋma, wĩndg sẽn ket n be. Yʋng n wat tɩ ned baa a yen ka tõe n tʋm ye.

⁵ Mam sẽn be dũni pʋgẽ wakate, maam la dũni wã vẽenem.

⁶ A Zezi sẽn gom woto n sa, b tʋbsa tẽnga, n kalem tãndã ne kolkoodã tɩ lebg begdo, n dɩk n bɛ zoangã nini

⁷ n yeel-a t'a kẽng Siloe bãkẽ wã n tɩ widg a nenga — Siloe dat n yeelame t'a soab b sẽn tʋme–. Zoangã kẽnga be n tɩ widg a nengã, la a sẽn lebg n watẽ wã, a ra neeme.

⁸ A yags-rãmbã ne neb nins sẽn dag n yã t'a yaa bõasã yetame yaa: Ka rao ning sẽn dag n zĩ n bõosdẽ wã la woto?

⁹ Neb kẽer yetame tɩ yaa yẽnda, tɩ kẽer yetẽ tɩ ayo, tɩ yaa a wẽnego. La yẽ mengã ra yetame tɩ yaa yẽnda vã.

¹⁰ Dẽ, b sok-a lame t'a ninã maana a wãn n puki?

¹¹ A leokame n yeele: Dao ning b sẽn boond t'a Zezi wã n bui tom n bɛ mam ninã, la b yeel maam tɩ m kẽng Siloe bãkẽ wã n tɩ widg m nenga. Mam kẽngame n tɩ widg m nenga, la m ninã pukame.

¹² La nebã soka rao wã yaa: Rao-kãng bee yɛ? La a leokame t'a ka mi ye.

Fariisẽ-dãmbã sokda rao wã sẽn paam maagrã

¹³ Nebã talla ned ning sẽn dag n ya-a zoangã n kẽng Fariisẽ-dãmbã nengẽ.

¹⁴ Yaool n dag n yaa Zuif-rãmbã vʋʋsg daar la a Zezi bui tomã n puk rao wã ninã.

¹⁵ Fariisẽ-dãmbã me soka daowã a ninã sẽn maan to-to n puki. La a yeela bãmb tɩ sẽn maag-a yẽ wã bɛɛ yẽ ninã ne tãndo, tɩ yẽ tɩ widg a nenga, la yẽ neeme.

¹⁶ Fariisẽ-dãmbã sẽn wʋm woto, kẽer yeelame tɩ rao-kãngã ka yit Wẽnnaam nengẽ ye. Bala, a ka sakd vʋʋsg daar tõodã ye. Neb a taab yeelame tɩ yel-wẽn maand tõe n yɩɩ a wãn n maan bõn-bãn a woto?

¹⁷ La welgr kẽe bãmb sʋka. B leb n soka zoangã yaa: Fo kaset yaa bõe ne ned ning sẽn puk-a fo ninã? A leokame t'a yaa Wẽnnaam no-rɛɛsa.

¹⁸ Sẽn deng b sẽn na n bool daowã ba-rãmba, Zuif-rãmbã ka tẽ tɩ rao wã dag n yɩɩ zoang t'a ninã yaool n puk ye.

¹⁹ B soka a ba-rãmbã yaa: Yaa yãmb bi-ribl la woto, tɩ yãmb yet t'a roga ne zondã? Maana a wãn t'a yãtẽ moasã?

²⁰ A ba-rãmbã leokame n yeele: Tõnd miime t'a yaa tõnd bi-ribla, la t'a roga ne zondo.

²¹ La sẽn yɩ to-to t'a yãt moasã wã, tõnd ka mi ye. Tõnd ka mi ned ning sẽn puk-a a ninã me ye. Sok-y-yã-a t'a yʋʋmã seka a sẽn na gom a mengã yelle.

²² Rao wã ba-rãmbã goma a woto, tɩ bõe, b rag n zoeta Zuif-rãmbã. Bala, Zuif-rãmbã dag n seda ne taab n yeel tɩ ned sã n yeel t'a Zezi yaa Kiristã, bɩ b rig-a n yiis karen-doogẽ wã.

²³ Rẽnda n kɩt t'a ba-rãmbã yeel t'a yʋʋmã waoogame la b sok-a wã.

²⁴ Fariisẽ-dãmbã leb n boola rao ning sẽn dag n yaa-a zoangã n yeel-a: Togs sɩd Wẽnnaam waoogr yĩnga. Tõnd yẽ miime tɩ rao-kãngã yaa yel-wẽn maanda.

²⁵ A leokame n yeele: A sã n yaa yel-wẽn maanda, mam ka mi ye. Bũmb a yen la mam mi: yaa tɩ mam dag n yaa zoanga, la tɩ moasã mam neeme.

²⁶ B soka yẽnda yaa: A maana foom bõe? A puka fo ninã wãn-wãna?

²⁷ Sẽn dag n yaa-a zoangã leoka bãmb n yeele: Mam zoe n togsa yãmba, la yãmb ka kelg maam ye. Bõe tɩ yãmb dat tɩ mam leb n togs yãmb yɛs tɩ y kelge? Yãmb me dat n lebga bãmb karen-biis laa?

²⁸ Fariisẽ-dãmbã tʋʋ rao wã n yeel-a yaa: Foo la bãmb karen-biiga. Tõnd yẽ yaa a Moyiis karen-biisi.

²⁹ Tõnd miime tɩ Wẽnnaam goma ne a Moyiis, la yõwã soaba, tõnd ka mi a sẽn yitẽ ye.

³⁰ Rao wã leoka bãmb yaa: Sẽn lingd maam yaa tɩ yãmb ka mi a sẽn yitẽ ye. B puka mam nini.

³¹ Tõnd miime tɩ Wẽnnaam ka leokd yel-wẽn maandb pʋʋsg ye. La ned sã n waoogd Wẽnnaam la a tũud bãmb daabã, Wẽnnaam leokda yẽnda soaba.

³² Ned nan ka wʋm tɩ ned n puk zoang sẽn dog ne zond nin ye.

³³ Dao-kãngã sã n dag n ka yitẽ Wẽnnaam nengẽ, a dag n kõn tõog n maan baa fɩ.

³⁴ B leok-a lame n yeele: Fo yĩngã tõr bee yel-wẽn pʋgẽ, hal f rogem wakat tɩ ta moasã, tɩ fo wa yɛs n na n zãms tõndo? La b rig-a lame n yiis yɩnga.

Sɩɩg zondo

³⁵ A Zezi wʋmame tɩ b riga rao wã n yiis karen-doogẽ wã. A Zezi yãnd-a lame n yeel-a yaa: Dẽ yĩnga, fo tẽeda Ninsaal Bi-riblã?

³⁶ A leokame n yeele: Zu-soaba, bãmb yaa ãnna, tɩ mam na tẽ bãmba?

³⁷ A Zezi yeel-a lame tɩ: Fo yãa-a lame, yaa sẽn gomd-a ne foomã, yaa yẽnda.

³⁸ Dẽ, dao wã yeelame yaa: Zu-soaba, mam tẽedame. La a wõgemdame n waoog bãmba.

³⁹ Dẽ poore, a Zezi yeela rao wã yaa: Mam waa dũni kãngã pʋgẽ bʋʋd yĩnga, tɩ neb nins sẽn ka yãtã na yã, tɩ neb nins sẽn yãtã na lebg zoense.

⁴⁰ Fariisẽ-dãmb kẽer sẽn dag n be be ne a Zezi, n wʋm gom-kãensã soka bãmb yaa: Dẽ yĩnga, tõnd me yaa zoense?

⁴¹ A Zezi leoka bãmb n yeele: Yãmb sã n dag n yaẽ zoense, yãmb yel-wẽnã dag n kõn beẽ yãmb pʋsẽ ye. Moasã, yãmb yetame tɩ y yãtame. Woto, yãmb yel-wẽnã paada ne-yã.