A Zã Sõng 7 - KÃAB-PAALGÃ KOE-NOOGO

A Zezi ma-biis ka-tẽebo

¹ Rẽ poore, a Zezi dag n saagda Galile, bala, b dag n ka rat n saag Zude ye. Tɩ bõe, Zuif-rãmbã dag n baooda bãmb n na n kʋ.

² Rẽ tɩ zãnã kibsa, sẽn ya Zuif-rãmbã kibs dag n kolgame.

³ A Zezi ma-biisã yeela bãmb yaa: Yi ka n kẽng Zude tɩ f karen-biisã me paam n yã tʋʋm nins fo sẽn maandã.

⁴ Ned sã n dat tɩ nebã yã-a, a ka soosd n tʋmd a tʋʋmã ye. Fo sẽn maand bõn-kãensã, maan tɩ dũni neb bãng-fo.

⁵ Sɩda, a Zezi ma-biisã me dag n ka tẽed bãmb ye.

⁶ A Zezi yeela bãmb yaa: Ne maam, wakatã nan ka ta ye, la ne yãmba, wakat fãa zemsame.

⁷ Dũni wã ka tõe n kisg yãmb ye. B kisa maam, tɩ bõe, mam kɩta kaset tɩ b tʋʋmã yaa wẽnse.

⁸ Kẽng-y kibsã. Mam nan ka na n kẽng kibs kãngã ye, tɩ bõe, mam wakatã nan ka pid ye.

⁹ A Zezi sẽn gom ne bãmb woto n sa, a Zezi kell n paa Galile.

A Zezi kẽnga zãnã kibsa

¹⁰ A Zezi ma-bi-raopã sẽn kẽng kibsã, bãmb mengã me yaool n kẽngame. B soosame n kẽng tɩ nebã ka yã bãmb ye.

¹¹ Zuif-rãmbã dag n baooda a Zezi kibsã wakat n sokdẽ tɩ b bee yɛ?

¹² La vũn-vũn n dag n be kʋʋngã sʋk wʋsg bãmb poorẽ. Neb kẽer yetame tɩ bãmb yaa nin-sõngo, tɩ kẽer yetẽ tɩ ayo, bãmb kẽesda nebã moogo.

¹³ Ned baa a yen ka saagd n gom bãmb yellã vẽeneg ye, b sẽn zoet Zuif-rãmbã yĩnga.

¹⁴ Kibsã da zoe n taa pʋɩ-sʋka, t'a Zezi kẽng wẽnd-doogẽ wã, n sɩng n zãmsd nebã.

¹⁵ Linga Zuif-rãmbã, la b sokame yaa: Rao wã yɩɩ wãn n mi Wẽnnaam gʋls-sõamy wã n yaool n ka paam zãmsgo?

¹⁶ A Zezi leoka bãmb n yeele: Zãmsg ning mam sẽn zãmsd nebã ka yit mam nengẽ ye, a yita sẽn tʋm-a maamã nengẽ.

¹⁷ Ned ning fãa sẽn dat n tũ Wẽnnaam daabã na bãng zãms-kãng sã n yita bãmb nengẽ, wall mam goamã sã n yita mam meng nengẽ.

¹⁸ Ned ning goam sẽn yit a meng nengẽ baooda a meng waoogre. La ned ning sẽn baood sẽn tʋm-a yẽ wã waoogr yaa sɩd soaba, la ka-tɩrlem ka be yẽ pʋgẽ ye.

¹⁹ A Moyiis ka kõ yãmb tõogã sɩda? La yãmb ned baa a yen ka maand tõogã sẽn yetã ye. Yaa bõe tɩ yãmb baood n na n kʋ maam?

²⁰ Neb kʋʋngã leokame tɩ zĩn n tar a Zezi, la tɩ ãnna n baood n na n kʋ bãmba?

²¹ A Zezi leoka bãmb n yeele: Mam tʋma tʋʋmd a yen, la a yɛɛsa yãmb fãa.

²² A Moyiis n yeel yãmb tɩ y kẽes kom-dibli wã bãongo — bãongã ka sɩng ne a Moyiis ye, yaa yaab-rãmbã n sɩng-a, — la yãmb kẽesda kambã bãongo, baa ne vʋʋsg daare.

²³ Yãmb sã n tõe n kẽes ned bãong vʋʋsg daare, n da kɩɩs a Moyiis tõogã, bõe tɩ yãmb sũyã yĩigd ne maam, mam sẽn kõ yĩn-tõr laafɩ vʋʋsg daarã yĩnga?

²⁴ Da bʋ-y bʋʋdã tɩ zems ne nin sẽn yãtã ya, bʋ-y bʋ-tɩrga.

Dẽ yĩnga, a Zezi yaa Kiristã?

²⁵ Zeruzalɛm neb kẽer yeelame yaa: Ka rao kãngã la b sẽn baood n na n kʋ wã wɛ?

²⁶ Ad a sẽn yɛs nebã sʋk n gomd tɩ b ka yet-a tɩ bũmbu! Rẽ yĩnga, kãsem-dãmbã sɩd reegame tɩ yaa bãmb la Kiristã laa?

²⁷ Tõnd yaool n mii rao kãngã sẽn yitẽ. La Kirist sã n wa, ned baa a yen ka na n bãng b sẽn yitẽ ye.

²⁸ Dẽ, a Zezi zẽka b koɛɛg wakat ning b sẽn zãmsd nebã wẽnd-doogẽ wã n yeele: Yãmb mii maam, la y mii mam sẽn yitẽ. Baoosgo, mam ka wa m toor ye. La sẽn tʋm-a maamã yaa sɩd soaba, la yãmb ka mi-b ye.

²⁹ Mam mii bãmba, bala, yaa bãmb yʋʋr yĩng la mam sẽn be ka wã, la yaa bãmb n tʋm maam.

³⁰ Nebã da rat n yõka a Zezi, la ned baa a yen ka sɩɩs bãmb ye, bãmb wakatã sẽn dag n nan ka ta wã yĩnga.

³¹ Neb kʋʋngã sʋka, wʋsg tẽe a Zezi n yetẽ: Dẽ yĩnga, Kirist sã n wa, b na n maana bõn-bãn n yɩɩd dao kãngã sẽn maandã sɩda?

B tʋma gũudb a Zezi nengẽ

³² Fariisẽ-dãmbã wʋma neb kʋʋngã sẽn dag n gomd a Zezi yell vũn-vũnã. Dẽ, maan-kʋʋdbã kãsem-dãmba ne Fariisẽ-dãmbã tʋma gũudb tɩ b tɩ yõk a Zezi.

³³ A Zezi yeel-b lame yaa: Mam ket n bee ne yãmb wakat bilf yĩng bala, la m na n leba sẽn tʋm-a maamã nengẽ.

³⁴ Yãmb na n baoo maam, la y ka na n yã maam ye, la mam sẽn na n zĩnd zĩig ningã, yãmb ka tõe n wa be ye.

³⁵ Zuif-rãmbã goma ne taab n yeele: A na n kẽe yɛ tɩ tõnd da yã-a? A na n kẽnga Zuif-rãmb nins sẽn sãeeg n be Gɛrk-rãmbã sʋka nengẽ n tɩ zãms Gɛrk-rãmbã bi?

³⁶ A sẽn yeel tɩ tõnd na n baoo-a lame n ka yã, la tɩ tõnd ka tõe n wa zĩig ning a sẽn na n zĩndẽ wã, gom kãng võor yaa bõe?

Kʋɩls koom sẽn kõt vɩɩm

³⁷ Kibsã yaoolem daare, daar ning sẽn ya-a kãseng n yɩɩdã, a Zezi yalsa yĩngr n zẽk b koɛɛg n yeele: Bɩ Ko-yũud sẽn tar ned ning wa mam nengẽ n yũ.

³⁸ Kʋɩlse, b koom sẽn kõt vɩɩm na n yii ned ning sẽn tẽed maamã pʋgẽ, wa Wẽnnaam gʋls-sõamyã sẽn yetã.

³⁹ A Zezi dag n goma Sɩɩg-sõngã neb nins sẽn tẽed bãmbã sẽn na n deegã yelle. Bala, b dag n nan ka kõ nebã Sɩɩg-sõngã ye, a Zezi sẽn dag n nan ka paam waoogrã yĩnga.

Welgr kẽe nebã sʋka

⁴⁰ Nebã sẽn wʋm gom kãensã, neb n zĩnd kʋʋngã sʋk n yeel tɩ dao kãngã sɩd yaa Wẽnnaam no-rɛɛsa.

⁴¹ Kẽer da yetame tɩ dao-kãngã yaa Kiristã. La neb a taab yetame yaa: Dẽ yĩnga, sɩd yaa Galile la Kiristã tog n yi sɩda?

⁴² Wẽnnaam gʋls-sõamyã ka yeel tɩ “Kiristã na n yɩɩ a Daviid yagenga, n dog Betlehɛm sẽn yaa a Daviid tẽngã” sɩda?

⁴³ Dẽ, welgr zĩnda nebã sʋk a Zezi poorẽ.

⁴⁴ Neb kẽer bãmb sʋk dag n dat n yõka a Zezi, la ned baa a yembr ka sɩɩs bãmb ye.

Ned nan ka gom wa rao-kãngã ye

⁴⁵ Gũudbã leba maan-kʋʋdbã kãsem-dãmbã ne Fariisẽ-dãmbã nengẽ, la b sok-b lame tɩ yaa bõe tɩ b ka tall a Zezi n wa?

⁴⁶ Gũudbã leokame n yeele: Ned nan ka gom wa rao-kãngã ye.

⁴⁷ Tɩ Fariisẽ-dãmbã le sok-ba: A tõog n belga yãmb me n tõog laa?

⁴⁸ Dẽ yĩnga, naab bɩ Fariisẽ baa a yen tãa beeme n tẽ bãmb sɩda?

⁴⁹ La neb kʋʋngã sẽn ka mi tõogã, b yaa neba, kãab-wẽng sẽn be b zutu.

⁵⁰ Bãmb ned a yembre, a Nikodɛm, sẽn dag n wa-a a Zezi nengẽ pĩndã yeel-b lame yaa:

⁵¹ Dẽ yĩnga, tõnd tõodã kaooda ned bʋʋd tɩ d ka reng n kelg-a, la d bãng bũmb ning a sẽn maanã sɩda?

⁵² B leoka yẽnda n yeele: Fo me yaa Galile ned laa? Vɛɛs sõama n gese, la f na yã tɩ Wẽnnaam no-rɛɛs ka yit Galile ye. [

⁵³ Rẽ poore, ned fãa kuila a yiri.