A Zã Sõng 6 - KÃAB-PAALGÃ KOE-NOOGO

A Zezi kɩtame tɩ bur lebg wʋsgo

¹ Rẽnda poore, a Zezi kẽnga Galile bɩ Tiberyaad ko-kãsengã rʋʋnde.

² Neb kʋʋng wʋsg dag n pʋgda bãmba, b sẽn yãt bõn-bãn nins a Zezi sẽn maand n maagd bãad-dãmbã yĩnga.

³ A Zezi dʋʋ tãngã n zĩnd be ne b karen-biisã.

⁴ Zuif-rãmbã kibs sẽn boond tɩ zʋʋg-n-basã dag n kolgame.

⁵ A Zezi zẽka b nenga, la b yãa neb kʋʋng wʋsg sẽn wat bãmb nengẽ, la b yeela a Filip yaa: Tõnd na n daa bur yɛɛne tɩ nin-kãensã paam rɩɩbo?

⁶ A Zezi goma a woto n na n mak a Filip n gese. Bala, b meng rag n mii b sẽn na n maan bũmb ninga.

⁷ A Filip leoka bãmb n yeel tɩ deniye kobsi bur ka tõe n sek tɩ ned fãa paam gɩrg ye.

⁸ A Zezi karen-biig a yembre, a Sɩmo Pɩyɛɛr ba-biig a Ãndre yeela bãmb yaa:

⁹ Bi-ribl bil n be ka n tar orz bur a nu ne zĩm a yiibu. La rẽnda yaa bõe ne neb sõor a woto?

¹⁰ A Zezi yeelame yaa: Kɩt-y tɩ nebã zĩndi. Mood n dag n be zĩ-kãng wʋsgo. Dẽ, nebã zĩndame, la raopã sõor tata tus a nu.

¹¹ A Zezi deega burã, n pʋʋs Wẽnnaam barka, n pʋɩ neb nins sẽn dag n be-b be wã. B maana a woto me ne zĩmã, tɩ ned fãa deeg a sẽn dat tɛka.

¹² Nebã sẽn dɩ n tɩge, a Zezi yeela b karen-biisã tɩ b wʋk rɩ-zersã sẽn kellã, tɩ bũmb baa a yen da pa n sãam ye.

¹³ Dẽ, b wʋka orz bur a nu wã pedsã, nebã sẽn dɩ tɩ kellã, n pids pet piig la a yiibu.

¹⁴ Nin-kãens sẽn yã bõn-bãn nins a Zezi sẽn maanã, b yeelame yaa: Sɩd yaa bãmb la Wẽnnaam no-rɛɛs ning sẽn da tog n wa-a dũni pʋgẽ wã.

¹⁵ A Zezi sẽn mi tɩ nebã na n waa n yõka bãmb n tɩ maan b rĩmã yĩnga, b yii be n leb n dʋ tãngã zug b yembre.

A Zezi kẽnda koom zugu

¹⁶ Zaabr sẽn ta, a Zezi karen-biisã sigame n ta ko-kãsengã noore.

¹⁷ Bãmb kẽe koom-koglgẽ n na n kẽng Kapɛrnawom, ko-kãsengã rʋʋnd a to wã. Zĩigã ra zoe n sobga zãnga, la a Zezi dag n ka wa b nengẽ ye.

¹⁸ Sobg n dag n fugd ne pãng hal wʋsgo, la ko-pɛmã dag n zẽkdame.

¹⁹ Karen-biisã sẽn dugs koglgã n zãag sẽn zems kɩlo a nu bɩ a yoobe, b yãnda a Zezi sẽn kẽnd ko-kãsengã zug n kolgd koom-koglgã. La rabeem yõk-b lame.

²⁰ La a Zezi yeel-b lame tɩ b ra maan dabeem tɩ yaa bãmba.

²¹ Karen-biisã dag n dat n dɩka a Zezi ne koom-koglgã, la tao-tao bala, koom-koglgã rʋʋga tẽnga. Bala, b taa b sẽn dag n dabdẽ wã.

Neb baoo a Zezi

²² Vẽkembeoogo, neb kʋʋngã sẽn dag n yals ko-kãsengã rʋʋndã tẽegame tɩ dag n yaa koom-koglg a yen tãa n dag n be be, la t'a Zezi dag n ka kẽ kogl-kãng ne b karen-biisã ye, la tɩ karen-biisã b yen-yen n looge.

²³ La koom-kogend a taab yii Tiberyaad n wa n yals zĩig sẽn pẽ ne zĩig ning a Zezi sẽn ning burã bark n kõ neb kʋʋngã tɩ b wãbã.

²⁴ La kʋʋngã sẽn yã t'a Zezi bɩ b karen-biisã ka be be wã, b mensã kẽe koom-kogendẽ wã n kẽng Kapɛrnawom n na n tɩ bao a Zezi.

Bur sẽn kõt vɩɩm

²⁵ B yãnda a Zezi ko-kãsengã rʋʋnd a to wã, n sok-b yaa: Karen-saamba, yãmb waa ka rabʋre?

²⁶ A Zezi leoka bãmb n yeele: Mam yeta yãmb sɩd-sɩd tɩ yãmb sẽn baood maamã, ka bõn-bãnã yãmb sẽn yã wã yĩng ye, la yaa yãmb sẽn wãb burã n tɩgã yĩnga.

²⁷ Da tʋm-y dɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga: Ninsaal Bi-riblã n na n kõ-a yãmba. Bala, yaa yẽnda la m ba a Wẽnnaam kõ noore.

²⁸ Nebã soka a Zezi yaa: Bõe la tõnd na n maan n tʋm Wẽnnaam tʋʋmdã?

²⁹ A Zezi leoka bãmb n yeele: Wẽnnaam tʋʋmde, yaa tɩ yãmb tẽ a soab ning bãmb sẽn tʋmã.

³⁰ La b yeela a Zezi yaa: Bõe bõn-bãnd la yãmb maand tɩ tõnd na n yã n tẽ yãmba? Bõe tʋʋm la yãmb tʋmda?

³¹ Tõnd ba-rãmbã dɩɩ man we-rasempʋɩɩgã pʋgẽ wa b sẽn gʋls n yeel tɩ: “A Moyiis kõo bãmb bur sẽn yit arzãn tɩ b wãbe.”

³² A Zezi yeela bãmb yaa: Mam yeta yãmb sɩd-sɩd tɩ ka a Moyiis n kõ yãmb bur sẽn yi arzãnã ye, la yaa m baaba n kõt yãmb bur sɩd-sɩd sẽn yi arzãnã.

³³ Bala, Wẽnnaam burã, yaa soab ning sẽn yit-a arzãn n sigda, n kõt dũni neb vɩɩmã.

³⁴ La nebã yeela a Zezi yaa: Zu-soaba, kõt-y tõnd bur kãng daar fãa.

³⁵ A Zezi yeela bãmb yaa: Maam la bur sẽn kõt vɩɩmã. Kom kõn leb n yõk ned ning sẽn wat-a mam nengẽ ye, la ko-yũud kõn leb n yõk ned ning sẽn tẽed-a maamã abada.

³⁶ La mam yeela yãmb tɩ yãmb yãa maam la y ka tẽed ye.

³⁷ Neb nins fãa m ba sẽn kõt maamã na n waa mam nengẽ, la mam kõn dig ned baa a yen sẽn wat mam nengẽ ye.

³⁸ Bala, mam sẽn yi arzãn n sigã, ka tɩ maan m sẽn dat ye, la yaa tɩ maan sẽn tʋm-a maamã raabo.

³⁹ La sẽn tʋm-a maamã raab la woto: yaa tɩ m da bas ned baa a yen bãmb sẽn kõ maamã tɩ menem ye, la mam na n vʋʋg-a-la yaoolem daarã.

⁴⁰ Sɩd me, ad m baaba raabo: yaa tɩ ned ning fãa sẽn yã Bi-riblã n tẽ bãmb na paam vɩɩm sẽn kõn sa. La mam na n vʋʋg-a-la yaoolem daarã.

⁴¹ Zuif-rãmbã dag n yẽgemda ne taab a Zezi poorẽ, bala, a Zezi yeelame tɩ bãmb la bur sẽn yi arzãn n sigã.

⁴² Nebã yeelame yaa: Ka yẽnda la a Zezi wɛɛ, a Zozɛf bi-riblã, tɩ tõnd mi a ba ne a ma wã laa? La yaa a wãn t'a yetẽ tɩ yẽ yii arzãn n sigi?

⁴³ A Zezi leoka bãmb n yeele: Da yẽgem-y ne taab ye.

⁴⁴ Ned baa a yen ka tõe n wa mam nengẽ, tɩ sã n ka m ba, sẽn tʋm-a maamã n tak a soab n wa-ne ye. La mam na n vʋʋg-a-la yaoolem daarã.

⁴⁵ A Gʋlsa Wẽnnaam no-rɛɛsdbã sɛbẽ tɩ: “B fãa na n deega zãmsg Wẽnnaam nengẽ.” Ned ning fãa sẽn wʋm m ba koɛɛg la a reeg bãmb zãmsgã wata mam nengẽ.

⁴⁶ Ka rat n yeel tɩ ned n zoe n yã d baaba ye, sã n ka soab ning sẽn yi-a Wẽnnaam nengẽ wã. Soab kãng yẽ yãa d ba wã.

⁴⁷ Mam yeta yãmb sɩd-sɩd tɩ ned ning sẽn tẽedã tara vɩɩm sẽn kõn sa.

⁴⁸ Mam yaa bur sẽn kõt vɩɩm.

⁴⁹ Yãmb yaab-rãmbã dɩɩ mann we-rasempʋɩɩgẽ wã, la b kiime.

⁵⁰ Bur ning sẽn yit-a yĩngrã yell la woto: Ned ning sẽn dɩt-a kõn ki ye.

⁵¹ Maam, mam yaa bur-vɩɩg sẽn yi arzãn n sigi. Ned sã n dɩ bur kãngã, a na n vɩɩmda wakat sẽn kõn sa. La bur ning mam sẽn na n kõ dũni wã vɩɩm yĩngã, yaa mam yĩngã.

⁵² Gom-kãng poorẽ, Zuif-rãmbã wẽe no-koeemd ne taab wʋsg n yeele: Nin-kãngã na n yɩɩ wãn n kõ tõnd a yĩngã tɩ d wãbe?

⁵³ A Zezi yeela bãmb yaa: Mam yeta yãmb sɩd-sɩd tɩ yãmb sã n ka wãb Ninsaal Bi-riblã nemdo,la yãmb sã n ka yũ a zɩɩmã, yãmb ka tar vɩɩm y pʋsẽ ye.

⁵⁴ Ned ning sẽn wãbd mam nemd la a yũud mam zɩɩm tara vɩɩm sẽn kõn sa, la mam na n vʋʋg-a-la yaoolem daarã.

⁵⁵ Bala, mam nemdã yaa rɩɩb sɩd-sɩda, la mam zɩɩmã yaa bõn-yũudl sɩd-sɩda.

⁵⁶ Sẽn wãbd-a mam nemd la a yũud mam zɩɩmã paada mam pʋgẽ, tɩ mam paad yẽ pʋgẽ.

⁵⁷ A wa m ba wã sẽn vɩ, n tʋm maam, tɩ mam vɩ d ba wã maasem yĩngã, woto me, ned ning sẽn dɩt maam na n vɩɩ mam maasem yĩnga.

⁵⁸ Ada la bur sẽn yi arzãn n sigi. A ka wẽnd bur ning yãmb ba-rãmbã sẽn wãbã ye: Bãmb kiime. Sẽn dɩt-a bur kãngã wã na n vɩɩmda wakat sẽn kõn sa.

⁵⁹ Yaa woto la a Zezi gom wakat ning b sẽn dag n zãmsd nebã Kapɛrnawom karen-doogẽ wã.

Vɩɩm sẽn kõn sa goama

⁶⁰ A Zezi karen-biisã sẽn wʋm bãmb goamã, wʋsg yeelame yaa: Zãms-kãngã deegr yaa toogo. Ãnna n tõe n sak-a?

⁶¹ A Zezi sẽn mi b yamẽ tɩ b karen-biisã yẽgemda gomdã poorẽ, b yeela bãmb yaa: Yõwã tuka yãmb sũur laa?

⁶² La yãmb sã n yã Ninsaal Bi-riblã t'a zẽkd n lebd a sẽn dag n beẽ wã, na n yɩɩ a wãna?

⁶³ Yaa Sɩɩg-sõng n kõt vɩɩm. Yĩngã ka sõngd ne baa fɩ. Goam nins mam sẽn togs yãmbã wata ne Sɩɩg-sõng la vɩɩm.

⁶⁴ La neb kẽer n be yãmb sʋkã n ka tẽed ye. Bala, hal sɩngr wẽndẽ bala, a Zezi dag n mii neb nins sẽn ka tẽed bãmba, la ned ning sẽn na n zãmb-a bãmb n yõk n kõ wã.

⁶⁵ A Zezi gomame n paas n yeele: Dẽ n kɩt tɩ mam yeel yãmb tɩ ned baa a yen ka tõe n wa mam nengẽ, tɩ sã n ka m ba n kõ-a tõogr ye.

⁶⁶ Sẽn sɩng ne wakat kãnga, bãmb karen-biis wʋsg leba poorẽ, n bas n ka leb n tũud a Zezi ye.

⁶⁷ Dẽ, a Zezi yeela b karen-biis piig la a yiibã yaa: La yãmb yẽ, yãmb ka rat n loog laa?

⁶⁸ A Sɩmo Pɩyɛɛr leoka bãmb n yeele: Zu-soaba, tõnd na n kẽnga ãnna soab nengẽ? Yãmb tara vɩɩm sẽn kõn sa wã goama.

⁶⁹ La tõnd tẽeme, la tõnd bãngame tɩ yãmb yaa sõmblem soab sẽn yi Wẽnnaam nengẽ.

⁷⁰ A Zezi leoka bãmb n yeele: Ka maam n tũus yãmb piig la a yiibã wɛ? La yãmb ned a ye n ya zĩna.

⁷¹ Bãmb dag n gomda a Sɩmo Iskaryo biig a Zudas yelle. Bala, yaa yẽnda, bãmb piig la a yiibã sʋk ned ning sẽn da na n zãmb-a bãmbã.