A Zã Sõng 4 - KÃAB-PAALGÃ KOE-NOOGO

Samari paga

¹ Zu-soabã bãngame tɩ Fariisẽ-dãmbã wʋmame tɩ bãmb paama karen-biis n yɩɩd a Zã, la b lisd-ba.

² Baoosgo, a Zezi dag n ka lisd nebã b toor ye, dag n yaa b karen-biisã.

³ Dẽ, bãmb yii Zude n na n kẽng Galile.

⁴ Yaool n dag n yaa tɩlɛ tɩ bãmb pɩʋʋg Samari soolem.

⁵ Dẽ, bãmb taa Samari tẽng a yembr sẽn boond tɩ Sɩkaar, pʋʋg ning a Zakob sẽn dag n kõ a bi-ribl a Zozɛfã sɛɛgẽ.

⁶ A Zakob bulgã dag n bee be. Kẽndã yaams yĩnga, a Zezi zĩnda bulgã noore. Dẽ tɩ yaa wĩnto-sʋk sẽne.

⁷ Samari pag a yen n wa n na n yãk koom. A Zezi kos-a lame t'a kõ-b koom tɩ b yũ.

⁸ Bala, bãmb karen-biisã dag n kẽnga tẽngã pʋgẽ n na n tɩ ra rɩɩbo.

⁹ Samari pagã yeela bãmb yaa: Yɩta a wãn tɩ yãmb sẽn ya Zuifã kot maam, koom n na n yũ? Tɩ mam yaool n ya Samari paga. — Sɩd me, Zuif-rãmbã dag n ka tar lagem-n-taar ne Samari rãmbã ye.—

¹⁰ A Zezi leok-a lame n yeele: Fo sã n dag n miẽ bũmb nins Wẽnnaam sẽn kõtã, la f mi ned ning sẽn kot-a foom koomã n na n yũ wã, yaa foom n dag n na n kos-a, la a dag n na n kõo foom ko-bundga.

¹¹ La pagã yeela bãmb yaa: M kẽem sõngo, yãmb ka tar baa fɩ n na n toog koomã bulgẽ wã ye, tɩ bulgã yaool n zulmẽ. Dẽ, yãmb na n yãa ko-bund-kãng yɛɛne?

¹² Yãmb yɩɩda tõnd yaab a Zakob, sẽn kõ-a tõnd bulgã laa? Bãmb meng yũu a koom, tɩ b kom-dibli ne b rũm-bãgã me yũ.

¹³ A Zezi leok-a lame n yeele: Ko-yũud na n leb n yõka ned ning fãa sẽn yũud ko-kãngã.

¹⁴ La ko-yũud kõn leb n yõk ned ning fãa sẽn na n yũ koom ning mam sẽn na n kõ-a wã ye, la koom ning mam sẽn na n kõ-a wã na n lebga ko-bundg sẽn na n buli, hal tɩ ta vɩɩm sẽn kõn sa wã pʋgẽ.

¹⁵ Pagã yeela bãmba: M kẽem sõngo, kõ-y maam ko-kãnga, tɩ ko-yũud da leb n yõk maam, tɩ m leb n wat ka n yãkd koomã ye.

¹⁶ A Zezi yeel-a lame t'a kẽng n tɩ bool a sɩdã, la a lebg n wa be.

¹⁷ La pagã leokame t'a ka tar sɩd ye. A Zezi yeel-a lame yaa: Fo maana neere, fo sẽn yeel tɩ f ka tar sɩdã.

¹⁸ Bala, fo talla sɩdb a nu, la fo sẽn tar a soab moasã wã ka fo sɩd ye. Fo togsa sɩd yellã pʋgẽ.

¹⁹ Pagã yeela bãmb yaa: M kẽem sõngo, mam neeme tɩ yãmb yaa Wẽnnaam no-rɛɛsa.

²⁰ Tõnd ba-rãmbã dag n pʋʋsda tãn-kãngã zugu. La yãmb Zuif-rãmbã yetame tɩ zĩig ning b sẽn tog n pʋʋsã yaa Zeruzalɛm.

²¹ A Zezi yeel-a lame yaa: Paga, tẽ mam goamã! Wakat n wat tɩ ka tãn-kãngã zug wall Zeruzalɛm la yãmb na n pʋʋs y ba wã ye.

²² Yãmb pʋʋsda y sẽn ka mi. Tõnd pʋʋsda d sẽn mi, bala, Wẽnnaam tũnuga Zuif-rãmbã n na n fãag nebã.

²³ La wakat watame — la yaa moasã — tɩ tõnd ba wã waoogdb sɩd-sɩdã na n waoog bãmb ne b sɩɩse la ne sɩda. Bala, yaa waoogdb a woto buud la tõnd ba wã baooda.

²⁴ Wẽnnaam yaa Sɩɩga, la yaa tɩlɛ tɩ neb nins sẽn pʋʋsd bãmbã na pʋʋs ne b sɩɩse, la ne sɩda.

²⁵ Pagã yeela bãmb yaa: Mam miime tɩ Mesi wã, soab ning b sẽn boond tɩ Kiristã na n waame. B sã n wa, b na n wilga tõnd bũmba fãa.

²⁶ A Zezi yeela yẽnda: Maam, soab ning sẽn gomd ne fooma, yaa maam la bãmba.

²⁷ Karen-biisã taa wakat kãnga, la a yɛɛsa bãmb tɩ yã a Zezi sẽn gomd ne paga, la bãmb ned baa a yen ka sok bãmb b sẽn kot pagã bũmb ninga, wall b sẽn gomd ne-a bũmb ning yell ye.

²⁸ Dẽ, pagã basa a yʋʋrã be, n kẽng tẽngã pʋgẽ n tɩ yeel nebã yaa:

²⁹ Wa-y n ges-y rao sẽn togs maam bũmb nins fãa mam sẽn maanã! Dẽ yĩnga, ka na n yɩ Kiristã?

³⁰ Nebã yii tẽngã n kẽng a Zezi nengẽ.

³¹ Wakat kãnga, a Zezi karen-biisã dag n bõosda bãmb n yetẽ tɩ: Karen-saamba, dɩ-y-yã.

³² La a Zezi leoka bãmb yaa: Mam tara rɩɩb yãmb sẽn ka mi, n dɩtẽ.

³³ Dẽ, karen-biisã goma ne taab n yeel tɩ daar ninga ned n tall rɩɩb n wa n kõ-ba.

³⁴ A Zezi yeela bãmb yaa: Mam rɩɩba, yaa tɩ maan sẽn tʋm-a maamã raabo, la m baas tʋʋmd ning b sẽn kõ maam tɩ m maanã.

³⁵ Yãmb ka mi n yetẽ tɩ keta kiis a naas tɩ tigsg wakat ta wɛ? Ad-y, mam yeta yãmb tɩ y zẽk y nens n ges pʋtã sẽn pelg n dat tigsgã.

³⁶ Sẽn tigsd-a wã zoe n deegda a tʋʋm yaoodo, la a tigsda koodã wakat sẽn kõn sa yĩnga. Woto, sẽn bʋt-a wã ne sẽn tigsd-a wã naagda taab n kɩdme.

³⁷ Yel-bũnd ning sẽn yet tɩ ned a yen n bʋt tɩ ned a to tigsã, yaa sɩda.

³⁸ Mam tʋma yãmb tɩ y tʋg n tigs pʋʋg yãmb sẽn ka tʋmẽ ye. Neb a taab n tʋme, tɩ yãmb wa n kẽ n dɩt a yõodo.

³⁹ Samari tẽn-kãng neb wʋsg tẽe a Zezi, pagã kaset yĩnga, a sẽn yeel t'a Zezi togsa yẽnda bũmb nins fãa yẽ sẽn maanã yĩnga.

⁴⁰ La Samari nebã sẽn yã a Zezi, b kos-b lame tɩ b pa ne bãmba. La a Zezi paa be rasem a yiibu.

⁴¹ Neb nins sẽn tẽ a Zezi b goamã yĩngã sõor n yɩɩda, la b yeela pagã yaa:

⁴² Ka leb n ya fo goamã yĩng la tõnd sẽn tẽed a Zezi wã ye. Bala, tõnd mensã wʋma b goamã, la tõnd miime tɩ sɩd yaa bãmb la dũni fãagdã.

A Zezi maaga rĩm tʋmtʋmd biiga

⁴³ Dasem a yiib kãens zugẽ, a Zezi yii be n na n kẽng Galile,

⁴⁴ bala, bãmb mengã dag n kɩsa kaset tɩ Wẽnnaam no-rɛɛs ka paamd waoogr a meng ba-yirẽ ye.

⁴⁵ Bãmb sẽn ta Galile, Galile nebã reega bãmba, b sẽn dag n yã bũmb nins fãa bãmb sẽn maan Zeruzalɛm, kibsã wakatã yĩngã. Bala, bãmb me dag n kẽnga kibsã.

⁴⁶ Dẽ, a Zezi leba Galile Kana, tẽng ning bãmb sẽn dag n tek koom tɩ lebg divẽ wã. Rĩma tʋmtʋmd kãseng a yembr n dag n be Kapɛrnawom, t'a bi-ribl ka keem ye.

⁴⁷ A wʋmame t'a Zezi yii Zude n wa Galile, la a kẽnga bãmb nengẽ n tɩ bõos-b tɩ b wa n maag a biigã sẽn dag n kolg kũum.

⁴⁸ A Zezi yeel-a lame yaa: Dẽ, yãmb sã n ka yãt bõn-bãn la bõn-yɛɛsdse, yãmb ka na n tẽ ye.

⁴⁹ Rĩmã tʋmtʋmd kãsengã yeela a Zezi tɩ b wa tao-tao t'a bi-bilfã da wa ki ye.

⁵⁰ A Zezi yeel-a lame t'a kẽng t'a biigã sãoogame. Daowã tẽe gomd ning a Zezi sẽn yeelã, la a loogame.

⁵¹ A sẽn be sorẽ n kuiisẽ, a tʋmtʋmdbã seg-a lame n yeel-a t'a biigã sãoogame.

⁵² Tʋmtʋmd-kãsengã soka bãmb n na n bãng wakat ning biigã sẽn sɩng n sãoogã. La b yeel-a lame tɩ yaa zaame wĩnto-sʋk sẽn loog lɛɛr a yembr la a yĩn-wɩngrã sig-yã.

⁵³ Biigã baaba bãngame tɩ yaa wakat kãng bal la a Zezi yeel yẽnda t'a bi-riblã sãoogame wã. La yẽ ne a yirã rãmb fãa tẽe a Zezi.

⁵⁴ A Zezi leb n maana bõn-bãn kãnga, a yiib soaba, b sẽn yi Zude n wa Galile wã poorẽ.