A Zã Sõng 3 - KÃAB-PAALGÃ KOE-NOOGO

A Zezi ne a Nikodɛm

¹ Rao a yen n dag n be Fariisẽ-dãmba sʋka, n ya Zuif-rãmbã naaba, t'a yʋʋr boondẽ t'a Nikodɛm.

² Yẽ waa a Zezi nengẽ ne yʋng n yeel-b yaa: Karen-saamba, tõnd miime tɩ yãmb yaa karen-saamb Wẽnnaam sẽn tʋme. Bala, ned ka tõe n maan bõn-bãn nins yãmb sẽn maandã, tɩ sã n ka Wẽnnaam n be ne-a ye.

³ A Zezi leok-a lame n yeele: Mam yeta foom sɩd-sɩd tɩ ned sã n ka paam tɩ b leb n dog-a, a ka tõe n yã Wẽnnaam soolmã ye.

⁴ A Nikodɛm yeela bãmba: Ned sẽn kʋʋl na n yɩɩ a wãn n leb n doge? A tõe n leb n kẽe a ma pʋgẽ yɛs n dog sɩda?

⁵ A Zezi leoka yẽnda n yeele: Mam yeta foom sɩd-sɩd tɩ ned sã n ka rog ne koom la ne Sɩɩg-sõngo, a ka tõe n kẽ Wẽnnaam soolmẽ wã ye.

⁶ Bũmb ning yĩng sẽn dog yaa yĩnga, la bũmb ning Sɩɩg-sõng sẽn dog yaa sɩɩga.

⁷ Da sak tɩ mam sẽn yeel tɩ fo tog n leb n dogame wã yɛɛs foom ye.

⁸ Sobg fugd n teesd a sẽn datẽ. Fo wʋmda a rãamdã, la fo ka mi a sẽn yitẽ, la a sẽn dabdẽ me ye. Yaa woto me ne ned ning Sɩɩg-sõng sẽn doge.

⁹ A Nikodɛm leb n gomame n yeele: Bõn-kãng tõe n yɩɩ a wãn n yɩ?

¹⁰ Fo yaa Israyɛll karen-saam-kãsenga, la fo ka mi rẽnda?

¹¹ Mam yeta foom sɩd-sɩda, tɩ tõnd yeta d sẽn mi, la tõnd kɩta bũmb nins d sẽn yã kaseto, la yãmb ka tẽ tõnd kasetã ye.

¹² Mam sã n gom ne yãmb dũni bũmb yɛl tɩ yãmb ka tẽeda, yãmb na n yɩɩ a wãn n tẽ, mam sã n gom ne yãmb saasẽ yɛl yelle?

¹³ Ned baa a yen ka dʋ saasẽ ye, sã n ka sẽn yi-a arzãn n wa wã: yaa Ninsaal Bi-riblã.

¹⁴ A wa a Moyiis sẽn zẽk waafã ne ra-yak we-rasempʋɩɩgẽ wã, na n yɩɩ tɩlɛ tɩ b zẽk Ninsaal Bi-riblã me,

¹⁵ tɩ ned ning fãa sẽn na tẽ bãmb na paam vɩɩm sẽn kõn sa.

¹⁶ Bala, Wẽnnaam nonga dũni wã hal wʋsgo, n kõ b Bi-ribl yen tãa wã, tɩ ned ning fãa sẽn na tẽ n bãmb kõn sãam ye, la a na paam vɩɩm sẽn kõn sa.

¹⁷ Sɩd me, Wẽnnaam ka tʋm b Bi-riblã dũni ka tɩ b kao nebã bʋʋd n sɩbg-b ye, la yaa tɩ nebã na paam fãagr bãmb maasem yĩnga.

¹⁸ B ka na n kao ned ning sẽn tẽedã bʋʋd n sɩbg-a ye. La ned ning sẽn ka tẽedã, a sɩbgr zoe n beeme, a sẽn ka tẽ Wẽnnaam Bi-ribl yen tãa wã yʋʋrã yĩnga.

¹⁹ Bũmb ning sẽn wat ne sɩbgrã la a woto: vẽenem waa dũni pʋgẽ, la ninsaalbã nonga likã n yɩɩd vẽenemã, b tʋʋmã sẽn ya wẽnsã yĩnga.

²⁰ Bala, ned ning fãa sẽn maand wẽng kisa vẽenem, n ka wat vẽenemẽ wã ye, tɩ vẽenemã na n wa n wilg t'a tʋʋmã ka sõama ye.

²¹ La ned ning sẽn maand sɩd wata vẽenemẽ, tɩ nebã tõe n bãng t'a tʋʋmã tʋmda Wẽnnaam sakr pʋgẽ.

A Zezi ne a Zã

²² Rẽ poore, a Zezi kẽnga Zude soolmẽ ne b karen-biisã, n pa be rasem bilf ne bãmba, la b lisd neba.

²³ A Zã me dag n bee Eno, zĩig sẽn pẽ ne Salim n lisd neba, bala, koom dag n bee be wʋsgo. Nebã dag n kẽnda be t'a lisd-ba.

²⁴ Bala, b dag nan ka sui a Zã bi-bees doogẽ ye.

²⁵ La a Zã karen-biis kẽer wẽe no-koeemd ne Zuif a yembr yɩlg-m-mengã poorẽ.

²⁶ B kẽnga a Zã nengẽ n tɩ yeel-a: Karen-saamba, ned ning sẽn dag n be ne yãmb Zʋrdẽ rʋʋndã, tɩ yãmb kɩs a kasetã, ad a lisda neba, la nebã fãa dabda a nengẽ.

²⁷ A Zã leokame n yeele: Ninsaal ka tõe n deeg bũmb baa fʋɩ, tɩ sã n ka sẽn yi arzãn n kõ-a ye.

²⁸ Yãmb mens yaa kaset dãmb tɩ mam yeelame tɩ mam ka Kiristã ye, la tɩ yaa bãmb n tʋm maam tɩ m deng b taoore.

²⁹ Yaa pag sɩd n so-a. La pʋg-sɩdã zoa bee ne-a n kelgd-a, la a sã n wʋm pʋg-sɩdã koɛɛga, a sũur yaa noogo. Sũ-no-kãng la mam dẽndã, la a pida moasã.

³⁰ Bãmb tʋʋmd nebã sʋk tog n tara paoosg tɩ mam dẽndã tar boogre.

Kaset soab sẽn yit yĩngri

³¹ Sẽn yi-a yĩngr n wa wã yɩɩda nebã fãa. Sẽn yaa-a tẽng zug ka ned yaa tẽng bũmbu, la a gomda tẽng bũmb yɛla. Sẽn yi-a arzãnã yɩɩda nebã fãa.

³² Bãmb togsda bũmb nins b sẽn yã la b wʋme, la ned baa a yen tãa ka tẽed bãmb kasetã ye.

³³ Ned sã n deeg bãmb kasetã, a soabã wilgdame tɩ Wẽnnaam yeta sɩda.

³⁴ Soab ning Wẽnnaam sẽn tʋmã togsda Wẽnnaam goama, bala, Wẽnnaam kõta a soab bãmb Sɩɩgã tɩ seke.

³⁵ Ba wã nonga Bi-riblã, n dɩk bũmba fãa n ning a nugẽ.

³⁶ Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.