A Zã Sõng 20 - KÃAB-PAALGÃ KOE-NOOGO

A Zezi vʋʋgre

¹ Dimaasã daar yibeoog pĩnda, a Maari Madelɛn kẽnga yaoogẽ wã, rẽ tɩ zĩigã ket n yaa libsgu. La a mikame tɩ b bilga kugrã n bas yaoogã.

² Yẽ zoeeme n tɩ yãnd a Sɩmo Pɩyɛɛr ne karen-biig a to wã a Zezi sẽn dag n nongã, n yeel-b tɩ yaa: B yiisa Zu-soabã yaoogẽ wã, la tõnd ka mi b sẽn tɩ bĩng-b zĩig ning ye.

³ A Pɩyɛɛr ne karen-biig a to wã yiime n na n kẽng yaoogẽ wã.

⁴ Bãmb b yiibã ra zoetame, la karen-biig a to wã zoee tao-tao n yɩɩg a Pɩyɛɛr, n deng-a n ta yaoogẽ wã.

⁵ A sulgame n gese, n yã pɛɛlã sẽn be be wã, la a yaool n ka kẽ ye.

⁶ A Sɩmo Pɩyɛɛr sẽn dag n pʋgd yẽ wã taame. A kẽe yaoogẽ wã, n mik tɩ pɛɛlã bee be.

⁷ Peend ning b sẽn dag n lud a Zezi zug ne-wã me dag n bee be, la a ka naag ne a taabã ye, la b gil-a lame n dɩgl toor.

⁸ Dẽ, karen-biig a to wã, sẽn deng-a n ta wã me kẽe yaoogẽ wã n yã bũmb nins sẽn be be wã, la a tẽeme.

⁹ Bala, a dag n nan ka wʋm Wẽnnaam gʋls-sõngã sẽn yet t'a Zezi tog n vʋʋgame wã võor ye.

¹⁰ La karen-biisã lebg n kuila b yiya.

A Zezi puka b meng ne a Maari Madelɛn

¹¹ A Maari yaool n dag n yasa yɩng yaoogã sɛɛgẽ n yãbda. A yãbdame, la a sulgame n na n ges yaoogã pʋgẽ,

¹² la a yãa malegs a yiib sẽn yer fu-peelse, n zĩ zĩig ning b sẽn dag n gãneg a Zezi wã. A yen dag n zĩi zugã zĩigẽ, t'a yen zĩ nao wã zĩigẽ.

¹³ Malegsã yeela pagã yaa: Paga, yaa wãn tɩ fo yãbda? La a leokame tɩ yaa b sẽn dɩk a Zu-soabã t'a ka mi b sẽn ning-b zĩig ningã yĩnga.

¹⁴ Pagã sẽn gomd a woto wã, a wẽnegame n yãnd a Zezi sẽn yɛs yĩngri, la a dag n ka mi tɩ yaa bãmb ye.

¹⁵ A Zezi yeel-a lame yaa: Paga, bõe tɩ fo yãbda? Ãnna la fo baooda? La pagã sẽn tẽed tɩ yaa tɩɩsã soab la sẽn gomd ne yẽ wã, a yeelame yaa: M kẽema, sã n yaa yãmb n dɩk-b bɩ y togs maam yãmb sẽn bĩng-b zĩig ning tɩ m na tɩ rɩk-ba.

¹⁶ A Zezi yeel-a lame yaa: Maari! A Maari wẽnemdame n yeel ne hebre goam tɩ rabuni, sẽn dat n togs tɩ karen-saamba.

¹⁷ A Zezi yeel-a lame yaa: Ra sɩɩs-m ye. Mam nan ka rʋ m ba nengẽ ye. Kẽng m ba-biisã nengẽ n tɩ yeel-b tɩ mam dʋʋda m ba sẽn ya yãmb ba wã nengẽ, mam Wẽnnaam sẽn ya yãmb Wẽnnaamã nengẽ.

¹⁸ A Maari Madelɛn waa n togsa karen-biisã t'a yãnda Zu-soabã, la tɩ b yeela yẽnda bõn-kãense.

A Zezi puka b meng ne b karen-biisã

¹⁹ Da-kãng sẽn ya dimaas daarã yʋngo, doog ning a Zezi karen-biisã sẽn dag n be wã noy dag n pagame, bãmb sẽn zoet Zuif-rãmbã yĩnga. A Zezi waame n yals bãmb sʋk n yeel-b yaa: Bɩ laafɩ zĩnd ne yãmba!

²⁰ A Zezi sẽn yeel woto, b wilga b karen-biisã b nusã ne b lʋgrã. Karen-biisã sẽn yãnd Zu-soabã, b kɩdmame.

²¹ A Zezi leb n yeel-b lame yaa: Bɩ laafɩ zĩnd ne yãmba! Mam me tʋmda yãmb wa m ba sẽn tʋm maamã.

²² Gom-kãens zugẽ, a Zezi fʋʋsa bãmb zug n yeel-ba: Reeg-y Sɩɩg-sõngo.

²³ Neb nins yãmb sẽn na n kõ sugrã na n paama sugri, la neb nins yãmb sẽn na tõdg sugrã kõn paam sugr ye.

A Toma ka-tẽebo

²⁴ Karen-biisã piig la a yiibã ned a yembre, a Toma b sẽn boond tɩ Didimã dag n ka be ne a taabã wakat ning a Zezi sẽn wa wã ye.

²⁵ Dẽ, karen-biis a taabã yeela yẽnda yaa: Tõnd yãnda Zu-soabã! La a yeela bãmb yaa: Mam sã n ka yãnd kutã bãn b nusẽ wã, mam sã n ka tʋm m nug-bil kutã bogdẽ wã, la m sã n ka tʋm m nug bãmb lʋgrẽ wã, mam kõn tol n tẽ ye.

²⁶ Rasem a nii rẽ zugẽ, a Zezi karen-biisã da leb n tigma taab roogẽ wã, la a Toma dag n bee ne bãmba. Kʋɩlemsã dag n pagame, la a Zezi waa n yalsa bãmb sʋk n yeel-b yaa: Bɩ laafɩ zĩnd ne yãmba!

²⁷ La b yeela a Toma yaa: Tẽeg f nug-bilã ka. Ges mam nusã. Tẽeg f nugã n tʋm mam lʋgrẽ wã me, la f tẽ n da yɩ ka-tẽeb soab ye.

²⁸ A Toma leoka bãmb n yeele: Mam Zu-soaba la mam Wẽnnaam!

²⁹ A Zezi yeela yẽnda yaa: Yaa fo sẽn yã maamã yĩng la fo tẽeda. Bark bee neb nins sẽn ka yã n yaool n tẽedã zutu.

Bũmb ning sẽn kɩt tɩ b gʋls sebrã

³⁰ Bõn-bãn wʋsg a taab la a Zezi maan b karen-biisã taoor tɩ ka gʋls seb-kãngã pʋgẽ ye.

³¹ La bãmbã sẽn gʋlsã, yaa tɩ yãmb na tẽ t'a Zezi yaa Kirist, Wẽnnaam Bi-ribla, la tɩ yãmb na paam vɩɩm bãmb yʋʋrã yĩnga, yãmb sẽn tẽ wã yĩnga.