A Zã Sõng 19 - KÃAB-PAALGÃ KOE-NOOGO

¹ Dẽ, a Pilat kɩtame tɩ b tall a Zezi n tɩ pãb-b ne kalwaase.

² Sodaasã wʋga maanf ne gõos n fõgen a Zezi zugu, la b yeelg bãmb ne fu-bed miuugu,

³ n yaool n kolg bãmb n yetẽ yaa: Zuif-rãmbã dĩma, tõnd pʋʋsda yãmba. La b dag n laanda bãmb pegse.

⁴ A Pilate leb n yiime n yeel Zuif-rãmbã yaa: Ad-y, mam yiisda rao wã yɩnga, tɩ yãmb na bãng tɩ mam ka yã bũmb baa a yembr ne-a sẽn sekd m na yeel t'a toga kʋʋb ye.

⁵ Dẽ, a Zezi yii yɩng ne gõos maanfã, la fu-bed-miuugã, la a Pilat yeela nebã yaa: Ad daowã!

⁶ Maan-kʋʋdbã kãsem-dãmbã ne gũudbã sẽn yã a Zezi, b kaasame n yeele: Ka-a da-pɩk zugu! Ka-a da-pɩk zugu. A Pilat yeel-b lame yaa: Deeg-y-yã-a n ka-a y toore, bala, mam ka yã bũmb ne-a sẽn sek m na yeel t'a toga kʋʋb ye.

⁷ Zuif-rãmbã leoka a Pilat n yeele: Tõnd tara tõogo, la ne tõogã, a segda kʋʋbo, tɩ bõe, a maana a meng Wẽnnaam Bi-ribla.

⁸ A Pilat sẽn wʋm gom-kãnga, a rabeemã paasame.

⁹ A leb n kẽe zakẽ wã n sok a Zezi tɩ b yaa yɛ neda? La a Zezi ka leok-a ye. Dẽ, a Pilat yeela bãmb yaa:

¹⁰ Maam la fo sĩnd n ka gomd-ne? Fo ka mi tɩ mam tara noor tɩ kɩt tɩ b bas foom, la m tar noor tɩ kɩt tɩ b ka foom da-pɩk zug laa?

¹¹ A Zezi leokame n yeele: Sã n ka noorã sẽn yi yĩngrã, yãmb da ka tarẽ noor tɩ maan maam baa fɩ. Rẽnda n kɩt tɩ ned ning sẽn tall maam n wa n kõ yãmbã yel-wẽnd yɩɩd yãmb dẽndã.

¹² Sẽn sɩng ne wakat kãnga, a Pilat baoome n na n bas a Zezi. La Zuif-rãmbã kaasame n yeele: Yãmb sã n bas rao wã, rẽnd yãmb ka Sezaar zoa ye. Ned ning fãa sẽn maand a meng rĩm wilgdame t'a kisa Sezaar.

¹³ A Pilat sẽn wʋm gom-kãensã, a talla a Zezi n yi yɩnga, n zĩnd bʋʋdã zĩigẽ, b sẽn boond tɩ kug sẽn gãneg zĩiga, la Gabata ne hebre goama.

¹⁴ Dag n yaa zʋʋg-n-basã kibs seglg daare, sẽn kolg wĩnto-sʋka. A Pilat yeela Zuif-rãmbã yaa: Ad-y y rĩma!

¹⁵ La b kaasame n yeele: Kʋ-y-yã-a! Kʋ-y-yã-a! Ka-y-yã-a da-pɩk zugu! A Pilat yeel-b lame yaa: M ka y dĩmã da-pɩk zugu? Maan-kʋʋdbã kãsem-dãmb leokame n yeele: Tõnd ka tar dĩm a to, tɩ ka Sezaar ye.

¹⁶ Dẽ, a Pilat kõ-b-la a Zezi tɩ b tɩ ka da-pɩk zugu. Dẽ, b deega a Zezi [n tall n looge.]

B kaa a Zezi da-pɩk zugu

¹⁷ A Zezi tʋka b ra-pɩkã n yi tẽngã, n tees zĩig sẽn boond tɩ zu-wang zĩiga, la Golgota ne hebre goama.

¹⁸ Yaa be la b ka a Zezi ne neb a yiib a taaba, da-pɩgs zutu, a yen goabga la a yen dɩtgo, t'a Zezi be sʋka.

¹⁹ A Pilat gʋlsa da-peok zug n tabl da-pɩkã. A gʋlsa be tɩ: Nazarɛt dao a Zezi, Zuif-rãmbã dĩma.

²⁰ Zuif-rãmbã wʋsg karma gʋlsmã, tɩ bõe, zĩig ning b sẽn ka a Zezi da-pɩk zugã pẽe ne tẽngã. B dag n gʋlsa gomdã ne Hebre, la Latẽ, la Gɛrk.

²¹ Maan-kʋʋdbã kãsem-dãmbã yeela a Pilat yaa: Da gʋls-y tɩ Zuif-rãmbã dĩm ye, gʋls-y t'a yeelame t'a yaa Zuif-rãmbã dĩma.

²² A Pilat leokame n yeele: Bũmb ning mam sẽn gʋlse, mam gʋlsame.

²³ Sodaasã sẽn ka a Zezi n sa, b wʋka bãmb futã n pʋɩ zĩis a naase, tɩ sodaag fãa dɩk pʋɩɩr a yembre. B rɩka a Zezi fu-wokã me. A ka tar sẽnesem ye, yaa peen yend bala, yĩngr tɩ ta tẽngre. B goma ne taab n yeele:

²⁴ Wa-y tɩ d da pãrs fuugã ye. D maan bãnde, tɩ bãndã wilg ned ning sẽn na n soog-a fuugã. Yɩɩ woto tɩ Wẽnnaam gʋls-sõngã pidsi. A yeelame: B pʋɩɩ mam futã ne taaba, la b maana bãnd mam fu-wokã yĩnga. Ad bũmb ning sodaasã sẽn maanã.

²⁵ A Zezi ma wã ne a ma-bi-poaka, a Kolopas pag a Maari ne a Maari Madelɛn dag n yɛsa da-pɩkã sɛɛgẽ.

²⁶ A Zezi sẽn yã b ma wã, la karen-biig ning bãmb sẽn nongã, t'a yɛs b ma wã sɛɛgẽ, b yeela b ma yaa: Paga, ad f bi-ribla.

²⁷ La b yeela karen-biigã yaa: Ad f ma. La sẽn sɩng ne wakat kãnga, karen-biigã deega a Zezi ma wã a zakẽ.

²⁸ Rẽ poore, a Zezi sẽn mi tɩ bũmb fãa zoe n maan n saame wã, b yeelame tɩ ko-yũud n tar bãmba, tɩ Wẽnnaam gʋls-sõngã pidsi.

²⁹ Laok n dag n dɩg be n pid ne divẽ miisga. B rɩka neoodg n los divẽ miisgẽ wã, n vil kãnkãre, n zẽk n tees a Zezi noorã.

³⁰ La a Zezi sẽn fõos divẽ miisgã n sa, b yeelame yaa: Bũmb fãa maan n saame. La b sulga b zugu, la b kiime.

B kõsa a Zezi lʋgre

³¹ Dag n yaa zʋʋg-n-basã kibs seglg daare. La Zuif-rãmbã sẽn ka rat n bas nebã tɩ b pa ra-pɩgsã zut bãmb vʋʋsg daarã yĩnga, “Vʋʋsg da-kãng dag n yaa da-kãsenga,” b kosa a Pilat t'a kɩt tɩ b kao b gɛy wã la b sigs-ba.

³² Dẽ, sodaasã waame, n kao pipi ned ning sẽn dag n ka da-pɩk zug a Zezi sɛɛgẽ wã gɛy, la b kao ned a to wã me gɛya.

³³ B sẽn ta a Zezi, n mik tɩ b zoe n kiime wã, b ka kao bãmb gɛyã ye.

³⁴ La sodaag a yembr kõsa bãmb lʋgr ne kãnde, la tao-tao bala, koom ne zɩɩm n yi be.

³⁵ Ned ning sẽn yã bõn-kãngã kɩsa a kaseto, la a kasetã yaa sɩda. La a miime t'a togsa sɩda, tɩ yãmb me na tẽ.

³⁶ Yɩɩ woto tɩ Wẽnnaam gʋls-sõngã pidsi. A yeelame yaa: Bãmb kõbr baa a yembr ka na n kaoog ye.

³⁷ Wẽnnaam gʋls-sõngã yeela zĩig a to yaa: Bãmb na n gesa ned ning bãmb sẽn kõsã.

A Zezi mumbu

³⁸ Rẽ poore, Arimate dao a Zozɛf sẽn dag n soos n ya a Zezi karen-biiga, a sẽn zoet Zuif-rãmbã yĩngã kosa a Pilat noor n na n dɩk a Zezi kũumã. La a Pilat kõ-a-la noore. Dẽ, a waa n sika kũumã n tall n looge.

³⁹ A Nikodɛm, sẽn dag n wa-a a Zezi nengẽ ne yʋngã me talla miir ne alowɛs sẽn kalem taaba, sẽn tar yũ-noogo, sẽn tat kɩlo pis-naas la a nu n wa.

⁴⁰ Dẽ, b dɩka a Zezi kũuma, n ning-a bõn-yũugã, n vil ne pɛɛla, wa sẽn zems Zuif-rãmbã sẽn minim n mumd kũum to-to wã.

⁴¹ La tɩɩs zĩig n dag n be zĩig ning b sẽn ka a Zezi da-pɩkã zugã, la zĩigã pʋgẽ, yao-paall n dag n be be b sẽn da nan ka mum ned a pʋgẽ ye.

⁴² Yɩɩ be la b gãneg a Zezi kũumã, Zuif-rãmbã seglg yĩnga, tɩ bõe, yaoogã dag n pẽeme.