A Zã Sõng 16 - KÃAB-PAALGÃ KOE-NOOGO

¹ Mam goma ne yãmb a woto tɩ bũmb da wa kɩt tɩ yãmb lʋɩ ye.

² B na n diga yãmb n yiis karen-dotẽ wã, la wakat pʋs n watame tɩ ned ning fãa sẽn na n kʋ-a yãmb na tẽ tɩ yẽ maanda Wẽnnaam tʋʋmde.

³ B na n maana a woto, tɩ bõe, b ka bãng m baaba, wall maam ye.

⁴ Mam goma ne yãmb a woto, tɩ wakat sã n wa ta, bɩ yãmb tẽeg tɩ mam dag n yeela yãmba. Mam ka yeel yãmb ada hal sɩngrẽ ye, tɩ bõe, mam dag n bee ne yãmba.

Sɩɩg-sõng tʋʋma

⁵ Moasã, mam lebda sẽn tʋm-a maamã nengẽ, la yãmb ned baa a yen ka sokd maam tɩ mam dabda yɛɛne ye.

⁶ La mam sẽn gom ne yãmb bõn-kãng yellã yĩnga, sũ-sãoong n pid yãmba.

⁷ Baoosgo, mam yeta yãmb sɩd tɩ mam loogr n são yãmb yĩnga. Bala, mam sã n ka kẽnge, sõangdã ka na n wa yãmb nengẽ ye. La mam sã n kẽnge, mam na n tʋm-b lame n kõ-yã.

⁸ La b sã n wa, b na n kɩtame tɩ dũni neb sak n deeg yel-wẽnã yelle, la tɩrlem yelle, la bʋʋd yelle.

⁹ B na n sak n deega yel-wẽnã yellã, tɩ bõe, b ka tẽed maam ye.

¹⁰ B na n deega tɩrlmã yellã, tɩ bõe, mam dabda m baaba nengẽ, la tɩ yãmb ka na n leb n yã maam yɛs ye.

¹¹ B na n deega bʋʋdã yellã, tɩ bõe, dũni-kãngã naabã bʋʋd kaoome.

¹² Bũmb wʋsg la mam ket n tar n na n togs yãmba, la yãmb ka tõe n wʋm-b moasã ye.

¹³ La sɩd Sɩɩgã sã n wa, b na n tɛɛ yãmb sɩdã fãa pʋgẽ. Bala, b ka na n gom b sẽn dat ye, b na n togsa yãmb bũmb nins b sẽn wʋme, la b na n togsa yãmb bũmb sẽn be taoor n watẽ.

¹⁴ Bãmb na n waooga maam, tɩ bõe, b na n dɩka bũmb nins sẽn ya mam deng n togs yãmba.

¹⁵ M ba sẽn tar fãa yaa maam n so. Dẽ n kɩt tɩ mam yeel tɩ sɩd Sɩɩgã na n dɩka bũmb nins sẽn ya mam dend n togs yãmbã.

Sũ-sãoong na n lebga sũ-noogo

¹⁶ Sã n yɩ bilfu, yãmb ka na n leb n yã maam ye, la sã n leb n yɩ bilf n paase, yãmb na n le yãa maam, [tɩ bõe, mam dabda m ba nengẽ.]

¹⁷ Dẽ, bãmb karen-biisã yeela taab yaa: Bãmb sẽn yeel tɩ sã n yɩ bilfu tõnd ka na n leb n yã bãmba, la sã n leb n yɩ bilf n paase tõnd na n leb n yãa bãmbã, n leb n yeel tɩ b dabda b ba nengẽ wã, a võorã yaa bõe?

¹⁸ Dẽ, karen-biisã yeelame yaa: Bõe gomd la b sẽn gomdã? “Sã n yɩ bilfu?” Tõnd ka mi b sẽn gomd bũmb ning yell ye.

¹⁹ A Zezi sẽn dag n mi tɩ b karen-biisã na n soka bãmbã, b yeel-b lame yaa: Yãmb sogsda taab ne mam sẽn yeel tɩ bilf sã n paase yãmb ka na leb n yã maam ye, la sã n leb n yɩ bilf n paase, yãmb na n leb n yãa maamã.

²⁰ Sɩd-sɩdã, mam yeta yãmb tɩ yãmb na n yãbame n wiisi, la dũni neb sũy na n yɩɩ noogo. Yãmb na n yãa sũ-sãoongo, la yãmb sũ-sãoongã na n tekame n lebg sũ-noogo.

²¹ Pag rogem sã n ta, sũ-sãams n tar-a, tɩ bõe, a wakatã taame. La a sã n dog biigã n sa, a ka leb n tẽr a toogã ye, a sũur sẽn noom ne ned sẽn dogã yĩngã.

²² Moasã, yãmb tara sũ-sãamse, la mam na n leb n yãa yãmba, y sũyã na n yɩɩ noodo, la ned baa a yen kõn yiis yãmb sũ-noogã ye.

²³ Da-kãng daare, yãmb kõn leb n sok maam bũmb baa a yembr yell ye. Sɩd-sɩdã, mam yeta yãmb tɩ bũmb ning yãmb sẽn na n kos m baaba, b na n kõo yãmb mam yʋʋrã yĩnga.

²⁴ Hal tɩ ta moasã, yãmb nan ka kos bũmb ne mam yʋʋr ye. Kos-y tɩ y na n deegame, tɩ y sũ-noogã tõe n pid zãnga.

A Zezi tõoga dũniyã

²⁵ Mam goma ne yãmb a woto ne yel-bũna. Wakat n wat tɩ mam ka na n leb n gom ne yãmb ne yel-bũn ye, la mam na n togsa yãmb m ba wã yell vẽenega.

²⁶ Badaare, yãmb na n kosa ne mam yʋʋre, la mam ka yet tɩ m na n bõosa m ba yãmb yĩng ye.

²⁷ Bala, m ba wã meng nonga yãmba, tɩ bõe, yãmb nonga maam, la y tẽeme tɩ mam yii Wẽnnaam nengẽ.

²⁸ Mam yii Wẽnnaam nengẽ n wa dũni pʋgẽ. Moasã, mam yita dũni wã, la mam dabda m ba nengẽ.

²⁹ Bãmb karen-biisã yeela bãmb yaa: Ges-y-yã, yãmb gomda ne tõnd vẽeneg moasã, n ka leb n gomd baa fɩ yell ne yel-bũn ye.

³⁰ Moasã, tõnd miime tɩ yãmb mii bũmb fãa, la tɩ yãmb ka baood tɩ ned sok yãmb ye. Yaa rẽnda yĩng la tõnd sẽn tẽed tɩ yãmb yii Wẽnnaam nengẽ wã.

³¹ A Zezi leoka bãmb n yeele: Yãmb tẽeda moasã?

³² Ad wakat n wate, la a zoe n waame, tɩ b na n sãeeg yãmb fãa yembr-yembre, la yãmb na n basa maam m yembre. La mam ka m yembr ye, bala, m baaba bee ne maam.

³³ Mam goma ne yãmb a woto tɩ yãmb tõe n paam sũur laafɩ mam pʋgẽ. Yãmb na n paama namsg dũni pʋgẽ. La bɩ y keng y sũyã, tɩ mam tõoga dũni wã.