A Zã Sõng 12 - KÃAB-PAALGÃ KOE-NOOGO

A Maari kiiga a Zezi kaam

¹ Zʋʋg-n-basã kibs sẽn ket tɩ rasem a yoobe, a Zezi waa Betani, tẽng ning a Lazaar bãmb sẽn vʋʋg-a t'a yi n bas kũumã sẽn be wã.

² La b segla rɩɩb be bãmb yĩnga. A Mart dag n pʋɩta rɩɩbã, la a Lazaar dag n naaga ne neb nins sẽn zĩ ne a Zezi n dɩtẽ wã.

³ A Maari dɩka tɩdar sẽn maan ne naar halaale, n tat litr pʋɩ-sʋka, t'a ligd ya wʋsgo, n waal a Zezi nao wã, n yẽes-b ne a zoobdo. La doogã fãa lebga tɩdarã yũugu.

⁴ A Zezi karen-biig a yembre, a Zudas Iskaryo, soab ning sẽn na n zãmb-a bãmbã yeelame yaa:

⁵ Bõe tɩ b ka koos tɩdarã deniye kobs-tã n kõ naong rãmba?

⁶ A sẽn gom woto wã, ka t'a kʋmda naong rãmbã ye. Yaa t'a dag n yaa wagdre, la yẽ sẽn zãad ligdã korgã, b sã n ning bũmb be fãa, a vaagd-a lame.

⁷ La a Zezi yeelame yaa: Bas-y pagã t'a bĩng tɩdar-kãngã mam mumb yĩnga.

⁸ Naong rãmbã bee ne yãmb wakat fãa, la yãmb kõn paam tɩ mam be ne yãmb wakat fãa ye.

B baoome tɩ kʋ a Lazaare

⁹ Zuif-rãmbã wʋsg wʋmame t'a Zezi bee Betani, la neb kʋʋng waa be. B sẽn wa wã, ka a Zezi yĩng bal ye, la yaa tɩ yã a Lazaar a Zezi sẽn vʋʋg t'a yi kũum sʋkã.

¹⁰ Maan-kʋʋdbã kãsem-dãmb yẽsa ne taab n na n kell n kʋ a Lazaar me,

¹¹ bala, Zuif-rãmbã wʋsg basda bãmba n tẽed a Zezi, a Lazaar yĩnga.

A Zezi kẽeda Zeruzalɛm ne naam

¹² Vẽkembeoogo, neb kʋʋng wʋsgã sẽn wa Zeruzalɛm kibsã yĩngã wʋmame t'a Zezi kẽeda Zeruzalɛm.

¹³ B kaoo koms vãad n yi n seg bãmba, n kelemdẽ n yetẽ tɩ: Hozaana, bark bee ned ning sẽn wat ne Zu-soabã yʋʋre, Israyɛll Rĩmã zugu.

¹⁴ A Zezi yãa bõn-bila, n zomb-a wa b sẽn gʋlsã. B gʋlsame n yeele:

¹⁵ Siyõ neba, da maan-y rabeem ye. Ad yãmb Rĩma zomba bõan-bil n watẽ.

¹⁶ Bãmb karen-biisã ka wʋm ada võor sɩngrẽ wã ye. La a Zezi sẽn wa n paam waoogrã, karen-biisã yaool n tẽegame tɩ b dag n gʋlsa yel-kãens yell a Zezi wɛɛngẽ, la tɩ nebã pidsa sẽn gʋlsã.

¹⁷ Neb kʋʋngã sẽn dag n be ne a Zezi wakat ning bãmb sẽn bool a Lazaar yaoogẽ wã, n vʋʋg-a t'a yi kũumẽ wã kɩsa a Zezi kaseto.

¹⁸ Rẽ n kɩt tɩ nebã yi n seg bãmbã, bala, b wʋmame t'a Zezi maana bõn-bãn kãnga.

¹⁹ Dẽ, Fariisẽ-dãmbã yeela taab yaa: Yãmb neeme tɩ y ka tõogd baa bilf ye. Nebã fãa pʋgda bãmba.

Gɛrk-rãmb dat n yãa a Zezi

²⁰ Gɛrk-rãmb n dag n be neb nins sẽn wa Zeruzalɛm n na n pʋʋs Wẽnnaam kibsã wakatã sʋka.

²¹ Bãmb kolga Galile Betsayida ned a Filip n kos-a n yeele: Kãsma, tõnd dat n yãa a Zezi.

²² A Filip kẽngame n tɩ togs a Ãndre, la bãmb b yiibã kẽngame n tɩ togs a Zezi.

²³ A Zezi leoka bãmb a woto: Wakat taame tɩ Ninsaal Bi-riblã tog n paam waoogre.

²⁴ Mam yeta yãmb sɩd-sɩd tɩ ka-buug sã n ka kẽ tãndẽ n pa be n ki, a paada a yembre. La a sã n ki, a womda biis wʋsgo.

²⁵ Ned ning sẽn nong a vɩɩm menesd-a lame. La ned ning sẽn na kisg a vɩɩm dũni kãngã pʋgẽ, a na n bĩng-a lame wakat sẽn kõn sa wã yĩnga.

²⁶ Ned sã n dat n tʋm mam yĩnga, a tog n tũu maam. La mam sẽn be zĩig ninga, mam tʋmtʋmd me na n bee be. Ned sã n tʋmd mam yĩnga, m ba na n waooga a soaba.

Yaa tɩlɛ tɩ b zẽk Ninsaal Bi-riblã

²⁷ Moas-moasã wã, sũ-bõdem n tar maam. La mam na n yeelame tɩ bõe? Mam na n kosa m ba tɩ b kɩt tɩ m põs to-kãngã? La hal tɩ ta moasã, yaa rẽnda yĩng la mam wa-yã.

²⁸ M ba, waoog-y y yʋʋrã! Dẽ, koɛɛg zĩnda yĩngr n yeele: Mam waooga m yʋʋrã, la m na n le waoog-a lame yɛsa.

²⁹ Neb kʋʋngã sẽn dag n yas be, n wʋm koɛɛgã dag n yetame tɩ yaa sa-tãsga. Neb a taab dag n yetame tɩ malɛk n gom ne a Zezi.

³⁰ A Zezi leb n gomame n yeele: Ka mam yĩng la koɛɛgã sẽn gom tɩ yãmb wʋmã ye, yaa yãmb yĩnga.

³¹ Moasã yaa dũni kãngã bʋʋd wakate. Moasã, b na n yiisa dũni kãngã naabã n bas yɩnga.

³² La b sã n wa n zẽk maam tɩ m bas tẽn-gãongã, mam na n taka nebã fãa tɩ b wa m nengẽ.

³³ A Zezi goma a woto n na n wilg kũum ninga buud bãmb sẽn na n ki wã.

³⁴ Kʋʋngã leoka bãmb n yeele: A Moyiis tõogã wilga tõnd tɩ Kiristã paada wakat sẽn kõn sa. Bõe tɩ yãmb yetẽ tɩ yaa tɩlɛ tɩ b zẽk Ninsaal Bi-ribla? Ninsaal Bi-ribl kãng yaa ãnna?

³⁵ A Zezi yeel-b lame yaa: Vẽenemã ket n bee yãmb sʋk wakat bilf yĩnga. Yãmb sẽn tar vẽenemã wakate, bɩ y kẽne, tɩ lik bida da wa n ling yãmb ye. Sẽn kẽnd-a lik bida pʋgẽ ka mi a sẽn dabdẽ ye.

³⁶ Wakat ning yãmb sẽn tar vẽenemã, bɩ y tẽ-a, tɩ y na lebg vẽenem kamba. A Zezi yeela rẽnda, la b loog n zãag ne nebã n tɩ soonde.

Zuif-rãmbã ka-tẽebo

³⁷ Baa ne a Zezi sẽn maan bõn-bãn wʋsg a woto nebã taoorã, b ka tẽ bãmb ye,

³⁸ tɩ gomd ning Wẽnnaam no-rɛɛs a Ezayi sẽn yeelã pidi. A yeelame yaa: Zu-soaba, ãnna n tẽ koɛɛg ning tõnd sẽn moonã? La Zu-soabã pãng puka ne ãnna?

³⁹ Sẽn paase, b ka tõe n tẽ ye, tɩ bõe, a Ezayi leb n yeela a woto:

⁴⁰ Wẽnnaam luda b ninã, la b keng b sũyã, tɩ b da wa n yã ne b ninã, tɩ b da tags n wʋm a võore, la tɩ b da wa n tek yam, tɩ mam maag-b ye.

⁴¹ Yaa woto la a Ezayi gom wakat ning a sẽn yãnd a Zezi ziirã n gom bãmb yellã.

⁴² Baoosgo, baa nanamsã sʋka, wʋsg tẽe a Zezi, la Fariisẽ-dãmbã yĩnga, b ka sak n togs tɩ b tẽedame ye, tɩ b da wa n dig-b n yiis karen-doogẽ wã ye.

⁴³ Bala, b dag n nonga ninsaalbã waoogr n yɩɩd Wẽnnaam sẽn na n waoog bãmbã.

A Zezi goamã kaoo nebã bʋʋdo

⁴⁴ A Zezi zẽka b koɛɛg n yeele: Sẽn tẽed-a maam ka tẽed maam ye, yaa sẽn tʋm-a maamã la a tẽeda,

⁴⁵ la sẽn yãt-a maam yãta sẽn tʋm-a maamã.

⁴⁶ Mam sẽn ya vẽenemã, mam waa dũni pʋgẽ, tɩ ned ning fãa sẽn tẽed maam kõn pa lik pʋgẽ ye.

⁴⁷ Ned sã n wʋm mam goamã n ka reege, ka maam n bʋʋd a soabã bʋʋd ye: Bala, mam sẽn wa wã, ka tɩ bʋ dũni nebã bʋʋd ye, la yaa tɩ fãag-ba.

⁴⁸ Sẽn tõdg-a maam la a ka reegd mam goamã, a tara a bʋ-kaooda: goam nins mam sẽn goma n na n kao yẽ bʋʋd yaoolem daare.

⁴⁹ Bala, mam goamã ka yit mam nengẽ ye. La m ba, sẽn tʋm-a maamã, bãmb b toor n wilg maam m sẽn tog n yeel la m gome.

⁵⁰ La mam miime tɩ bãmb noorã yaa vɩɩm sẽn kõn sa. Woto, bũmb nins mam sẽn gomdã, yaa wa m ba sẽn yeel maamã.