A Zã Sõng 11 - KÃAB-PAALGÃ KOE-NOOGO

A Lazaar kũum

¹ Dao a yembr n lʋɩ bãaga. A yʋʋr la a Lazaar, n be Betani. A Maari ne a ma-bi-poak a Mart dag n vɩɩ tẽn-kãnga.

² Yaa Maari kãng n dag n kiig tɩdar kaam a Zezi zug la a yẽes bãmb nao ne a zoobdã. Yaa yẽ tão a Lazaar n lʋɩ ka-keemã.

³ Ma-bi-pogs a yiibã tʋmame tɩ b tɩ yeel a Zezi yaa: Zu-soaba, ad ned ning yãmb sẽn nongã bẽedame.

⁴ A Zezi sẽn wʋm woto, b yeelame tɩ bã-kãngã ka kũum bãag ye, yaa Wẽnnaam waoogr yĩnga, la tɩ Wẽnnaam bi-riblã me na n tũnuga rẽnda n paam waoogre.

⁵ La a Zezi yaool n dag n nonga a Mart ne a ma-bi-poakã, la a Lazaare.

⁶ A Zezi sẽn wʋm t'a Lazaar ka laafɩ, b kell n paa zĩig ning b sẽn dag n be wã rasem a yiib yɛsa.

⁷ Rẽ poore, b yeela b karen-biisã tɩ b wa tɩ b leb Zude.

⁸ Karen-biisã yeela a Zezi yaa: Karen-saamba, nindaarẽ ka bal la Zuif-rãmbã dag n dat n lob yãmb ne kuga, tɩ yãmb le lebd be?

⁹ A Zezi leokame n yeele: Yibeoog tɩ ta zaabr ka lɛɛr-dãmb piig la a yiibu? Ned sã n kẽnd wĩndga, a ka lagsd ye, bala, a nee dũni kãngã vẽenemã.

¹⁰ La ned sã n kẽnd yʋngo, a lagsdame, bala, vẽenem ka be yẽ pʋgẽ ye.

¹¹ A Zezi sẽn gom a woto n sa, b yeela b karen-biisã yaa: Tõnd zoa a Lazaar gũsame, la mam na n kẽng n tɩ nek-a lame.

¹² Karen-biisã yeela bãmb yaa: A sã n gũsame, rẽnda a na n paama a menga.

¹³ A Zezi dag n gomda a Lazaar kũumã yelle, la b karen-biisã dag n tẽedame tɩ yaa gõeem meng-menga.

¹⁴ Dẽ, a Zezi yeel-b-la vẽeneg yaa: A Lazaar maana kaalem.

¹⁵ La mam sũur nooma m sẽn ka zĩnd be wã yĩnga, tɩ yãmb tõe n tẽ. Wa-y tɩ d kẽng a nengẽ.

¹⁶ Dẽ, a Toma b sẽn boond tɩ Didim yeela karen-biis a taabã yaa: Wa-y tɩ d me tũ bãmb n tɩ naag n ki.

A Zezi yaa vʋʋgr la vɩɩm

¹⁷ A Zezi sẽn na n ta wã, rẽ tɩ b sẽn mum a Lazaar yaa tɩ rab-naaslẽ.

¹⁸ Betani yaool n dag n pẽe ne Zeruzalɛm sẽn zems kɩlo a tãab bala.

¹⁹ Zuif-rãmb wʋsg waa a Maari ne a Mart nengẽ n na n bels-ba, b tão wã kũum yĩnga.

²⁰ A Mart sẽn wʋm t'a Zezi watame, a yiime n seg bãmba, la a Maari paa yir n zĩẽ.

²¹ A Mart yeela a Zezi yaa: Zu-soaba, yãmb sã n dag n beẽ ka, mam tão wã dag n ka na n ki ye.

²² La baa ne moasã, mam miime tɩ Wẽnnaam na n kõo yãmb bũmb ning fãa yãmb sẽn na kos bãmba.

²³ A Zezi yeel-a lame t'a tão wã na n vʋʋgame.

²⁴ A Mart leoka bãmb n yeele: Mam miime t'a na n vʋʋga vʋʋgrã wakate, yaoolem daarã.

²⁵ A Zezi yeel-a lame yaa: Yaa maam la vʋʋgrã soaba, la vɩɩm. Ned ning fãa sẽn tẽed maam na vɩɩmde, baa a sã n zoe n kiime.

²⁶ La ned ning fãa sẽn vɩ n tẽed maam kõn tol n ki ye. Dẽ yĩnga, fo tẽeda yõwã?

²⁷ A Mart yeela a Zezi yaa: N-ye, Zu-soaba, mam tẽedame tɩ yãmb yaa Kirist, Wẽnnaam bi-riblã, soab sẽn tog n wa-a dũni pʋgẽ wã.

A Zezi yãbame

²⁸ A Mart sẽn gom woto n sa, a loogame. La a boola a ma-bi-poak a Maari n soos n yeel-a tɩ Karen-saamb waame la b boond-a lame.

²⁹ A Maari sẽn wʋm a woto, a yika tao-tao n babs a Zezi,

³⁰ bala, a Zezi dag n nan n ka kẽ tẽngã pʋgẽ ye, b rag n ket n bee zĩig ning a Mart sẽn seg bãmbã.

³¹ Zuif-rãmb nins sẽn dag n be yir n belsd a Maari wã sẽn yã t'a yika tao-tao n yi wã, b pʋg-a lame, n tẽed t'a kẽnda yaoogẽ wã n na n tɩ yãbe.

³² A Maari sẽn ta zĩig ning a Zezi sẽn be wã, n yãnd bãmba, a wõgemda bãmb taoor n yeel bãmba: Zu-soaba, yãmb sã n dag n zĩndẽ ka, mam tão wã dag n ka na n ki ye.

³³ A Zezi sẽn yã t'a Maari yãbdame, la tɩ Zuif-rãmb nins sẽn tũ yẽ wã me yãbdame, bãmb yĩngã sidgame, la b sũurã bõdmame.

³⁴ A Zezi sokame ya: Yãmb ning-a-la yɛ? La b leoka a Zezi n yeele: Zu-soaba, wa n ges-y-yã.

³⁵ A Zezi yãbame.

³⁶ Dẽ, Zuif-rãmbã yeelame yaa: Ges-y-yã a sẽn dag n nong-a to-to!

³⁷ Bãmb neb kẽer yeelame yaa: Bãmb sẽn puk zoangã ninã, bãmb dag n ka tõe n maan tɩ rao-kãngã ka ki laa?

A Lazaar vʋʋgre

³⁸ A Zezi yĩngã leb n sidgame, la b kẽnga yaoogẽ wã. Dag n yaa tãn-yokẽ, tɩ b bilim kugr n yẽd a noorã.

³⁹ A Zezi yeelame tɩ b lak kugrã. Kiidã tão a Mart yeela a Zezi yaa: Zu-soaba, a zoe n lebga yũugu, bala, a kũumã rasem a naas la rũnna.

⁴⁰ A Zezi yeel-a lame yaa: Mam ka yeel foom tɩ fo sã n tẽ, fo na n yãa Wẽnnaam ziir sɩda?

⁴¹ Dẽ, nebã laka kugrã, la a Zezi nak n gesa yĩngr n yeele: M ba, mam pʋʋsda yãmb barka, y sẽn leok mam kosgã yĩnga.

⁴² Mam yẽ miime tɩ yãmb leokda mam kosg wakat fãa, la yaa neb kʋʋngã sẽn be ka wã yĩng la mam gomda, tɩ b na tẽ tɩ yaa yãmb n tʋm maam.

⁴³ A Zezi sẽn gom woto n sɛ, b goma ne pãng n yeele: Lazaar, wa yi ka!

⁴⁴ La sẽn dag n ki-a wã yiime, la a nao wã ne a nusã vila ne pɛɛla, la a nengã dag n luda ne peende. A Zezi yeela nebã tɩ b lood a pɛɛlã, la b bas-a t'a looge.

Kãsem-dãmbã baooda sor n na n kʋ a Zezi

⁴⁵ Zuif-rãmb nins sẽn dag n wa a Maari nengẽ, n yã bũmb nins a Zezi sẽn maanã, wʋsg tẽe bãmba.

⁴⁶ La neb kẽer kẽngame n tɩ yã Fariisẽ-dãmbã n togs-b bũmb ning a Zezi sẽn maanã.

⁴⁷ Dẽ, maan-kʋʋdbã kãsem-dãmba, la Faariisẽ-dãmbã tigsa kaorengã yɛl bʋ-bʋʋdbã n yeele: Tõnd na n maana a wãna? Rao wã maanda bõn-bãn wʋsgo.

⁴⁸ Tõnd sã n bas-a t'a ket n maandẽ, nebã fãa na n tẽe-a lame, la Rome dãmbã na n waa n sãama tõnd wẽnd-doogã ne d soolmã.

⁴⁹ Bãmb ned a yembre, a Kayif, sẽn dag n ya-a maan-kʋʋd kãsem yʋʋm kãngã yeel-b lame yaa: Yãmb ka wʋmd yellã baa fɩ.

⁵⁰ Yãmb ka ne tɩ ned a yen sã n ki nebã fãa yĩng tɩ soolmã tõr da sãam n são?

⁵¹ Mik ka ne a mengã yam la a gom a woto ye. A sẽn dag n ya maan-kʋʋd kãsem yʋʋm kãngã, a togsa bãngr gomd n wilg t'a Zezi tog n kii bãmb soolmã yĩnga.

⁵² La ka bãmb soolmã yĩng bal ye, la yaa sẽn na yɩlẽ me n tigim Wẽnnaam kambã sẽn sãeegã, tɩ b lebg yĩng a yembre.

⁵³ Sẽn sɩng ne da-kãnga, Zuif-rãmbã yãka yam tɩ kʋ a Zezi.

⁵⁴ Dẽ, a Zezi da ka leb n pukd b meng n kẽnd Zuif-rãmbã sʋk ye. La bãmb yii be n kẽng zĩig sẽn pẽ ne we-rasempʋɩɩgã, tẽng b sẽn boond tɩ Efrayim pʋgẽ. Bãmb zĩnda be ne b karen-biisã.

⁵⁵ Zuif-rãmbã zʋʋg-n-bas kibsa dag n kolgame, la tẽngã neb wʋsg kẽnga Zeruzalɛm, sẽn deng kibsã, n na n tɩ yɩlg b mense.

⁵⁶ B dag n baooda a Zezi la b yet taab wẽnd-doogẽ wã yaa: Yãmb tagsg yaa bõe ne b yellã? B na n kell n paame n ka wa kibsã?

⁵⁷ Mik maan-kʋʋdbã kãsem-dãmbã ne Fariisẽ-dãmbã dag n yeela nebã tɩ ned sã n bãng a Zezi zĩiga, bɩ a wa n wilg tɩ b tɩ yõk-ba.