A Zã Sõng 10 - KÃAB-PAALGÃ KOE-NOOGO

Pe-kɩɩm ne a piisi

¹ Mam yeta yãmb sɩd-sɩd tɩ ned ning sẽn ka tũud piisã yãgr noor n kẽedẽ, n gãndgd zĩig a to n kẽedẽ, a yaa wagdr la fãada.

² La ned ning sẽn tũud-a yãgrã noor n kẽedẽ wã, yẽ soab la piisã pe-kɩɩma.

³ Zag-no-gũudã pakda yãgrã noor n kõ-a, la piisã wʋmda a koɛɛgã. A sẽn so piis ninsã, a boonda ned fãa ne a yʋʋre, n tall-b n yi yɩnga.

⁴ A sã n yiis piis nins a sẽn so wã zãnga, a lʋɩta b taoore, la piisã pʋgd-a lame, b sẽn mi a koɛɛgã yĩnga.

⁵ Piisã kõn tol n pʋg sãan ye, la b na n zoe n zãaga ne-a, tɩ bõe, b ka mi sãambã koees ye.

⁶ A Zezi wẽe yel-bũn kãngã, la b ka wʋm a võor ye.

A Zezi yaa pe-kɩɩm-sõngo

⁷ A Zezi leb n yeela bãmb yaa: Mam yeta yãmb sɩd-sɩd tɩ yaa maam la piisã zag-noore.

⁸ Neb nins fãa sẽn deng maam n wa wã yaa wagda la fãadba. La piisã ka kelg-b ye.

⁹ Maam la zag-noorã. Sẽn tũ-a maam n kẽ na n paama fãagre. A na n kẽedame la yita, la a na n paama yamdo.

¹⁰ Wagdr sã n wa n watẽ, yaa tɩ zu, n kʋ, la a sãame. La mam waame tɩ piisã na paam vɩɩm, la tɩ b na paam-a sõama.

¹¹ Maam la pe-kɩɩm-sõngã. Pe-kɩɩm-sõng gẽnegda a yõor a piis yĩnga.

¹² La ned ning b sẽn dɩk t'a gũud piisã, n ka pe-kɩɩmã la a ka so piisã, a sã n yã we-baag sẽn wata, a basda piisã n zoe. We-baagã kẽeda piisã n yõg-ba, la a sãeeg-ba.

¹³ A sẽn zoetã, yaa tɩ yaa yaood yĩng la a gũud piisã, la b yellã ka pak-a ye. Maam la pe-kɩɩm-sõngã.

¹⁴ Mam mii m piisã, la m piisã mii maam,

¹⁵ wa m ba wã sẽn mi maam tɩ mam me mi m ba wã, la mam kõta m vɩɩmã m piisã yĩnga.

¹⁶ Mam tara piis a taab sẽn ket n nan ka be yãg-kãngã pʋgẽ ye. Kal mam tall bãmb me n wa. B na n wʋma mam koɛɛga, na n yɩɩ bãgr a yembre, la pe-kɩɩm yɛnga.

¹⁷ M baaba nonga maam, tɩ bõe, mam kɩta m vɩɩma n na n leb n deeg-a.

¹⁸ Ned ka yiisd mam vɩɩmã ye, la yaa maam n kɩt-a m toore. Mam tara pãn-tõog tɩ kɩs-a, la m tara pãn-tõog me tɩ leb n deeg-a yɛsa. Noor ning m ba sẽn yeel maamã la woto.

¹⁹ Gom-kãens yĩnga, welgr leb n kẽe Zuif-rãmbã sʋka.

²⁰ Wʋsg bãmb sʋkã yeelame yaa: Zĩn n tar a Zezi! A yaa gãeenga! Bõe tɩ yãmb kelgd-a?

²¹ Neb a taab yeelame yaa: Gom-kãensã ka ned zĩn sẽn tar goam ye. Dẽ yĩnga, zĩn tõe n puka zoens nini?

Zuif-rãmbã zãgsa a Zezi

²² Wakat kãng tɩ b dag n maanda bark ningr kibs Zeruzalɛm. Dag n yaa waood wẽnde.

²³ A Zezi dag n bee a Salomo zãndẽ wã n kẽnda.

²⁴ Zuif-rãmbã gũbga bãmba n yeele: Hal tɩ ta dabʋr la yãmb na n bas tõnd tɩ d yamã gõodẽ? Yãmb sã n yaa Kiristã, bɩ y togs tõnd vẽenega.

²⁵ A Zezi leoka bãmb n yeele: Mam togsa yãmba, la yãmb ka tẽed ye. Tʋʋm nins mam sẽn maand ne m ba wã yʋʋrã kɩta mam kaseto.

²⁶ La yãmb ka tẽed ye, tɩ bõe, yãmb ka mam piis ye.

²⁷ Mam piisã wʋmda mam koɛɛga. Mam mi-b lame, la b pʋgda maam.

²⁸ Mam kõt-b-la vɩɩm sẽn kõn sa. B kõn tol n sãam ye, la ned baa a yen kõn yiis-b mam nugẽ ye.

²⁹ Mam ba sẽn kõ-a maam piisã yɩɩda fãa, la ned baa a yen ka tõe n yiis-b m baaba nugẽ ye.

³⁰ Maam ne m ba, tõnd yaa yembre.

³¹ Zuif-rãmbã leb n wʋka kug n na n lob a Zezi.

³² A Zezi leb n goma ne bãmb n yeele: Mam wilga yãmb tʋʋm sõamy wʋsg sẽn yit m ba nengẽ tɩ y yãnde. Tʋʋm-sõng bʋg poorẽ la yãmb dat n lob maam kugã?

³³ Zuif-rãmbã leoka bãmb n yeele: Ka tʋʋm-sõng yĩng la tõnd dat n lob yãmb kug ye, yaa Wẽnnaam tʋʋsg yĩnga. Sẽn paase, yãmb sẽn ya ninsaalã, yãmb geenda y meng wa Wẽnnaam.

³⁴ A Zezi leoka bãmb yaa: B ka gʋls yãmb tõogã sebr pʋgẽ tɩ: “Mam yetame tɩ yãmb yaa wẽnnaam dãmb” sɩda?

³⁵ Sã n yaa tɩ tõogã boola Wẽnnaam sẽn gom ne neb ninsã tɩ wẽnnaam dãmba — tõnd d miime tɩ ned ka tõe n sãam Wẽnnaam gʋls-sõngã ye —,

³⁶ yãmb yeta ned ning d ba wã sẽn welg toor la b tʋm-a wã t'a tʋʋsda Wẽnnaam, mam sẽn yeel tɩ m yaa Wẽnnaam bi-riblã yĩnga.

³⁷ Mam sã n ka tʋmd m ba wã tʋʋmd bɩ y ra tẽ maam ye.

³⁸ La mam sã n tʋmdame, baa yãmb sã n ka tẽed maam me, bɩ y tẽ tʋʋm-kãense, tɩ y tõe n bãng la y reeg tɩ d ba wã bee mam pʋgẽ, tɩ mam be bãmb pʋgẽ.

³⁹ Nebã leb n baoome n na n yõk a Zezi, la a Zezi põsg-b lame.

⁴⁰ A Zezi leb n leba Zʋrdẽ rʋʋndã, zĩig ning a Zã sẽn deng n lis nebã, la b paa be.

⁴¹ Neb wʋsg waa bãmb nengẽ n yetẽ: A Zã ka maan bõn-bãnd baa a yembr ye. La bũmb nins fãa a Zã sẽn togs ne rao-kãngã yellã yaa sɩda.

⁴² Neb wʋsg tẽe bãmb beene.