A Zã Sõng 1 - KÃAB-PAALGÃ KOE-NOOGO

Gomdã rɩka yĩnga

¹ Hal sɩngr wẽndẽ, gomdã dag n beeme, la gomdã dag n bee ne Wẽnnaam, la gomdã yaa Wẽnnaam.

² Bãmb dag n bee ne Wẽnnaam hal sɩngr wẽndẽ.

³ B naana bũmb fãa ne bãmba, la bũmb ka be sẽn naane, tɩ ka yɩ ne bãmb ye.

⁴ Vɩɩm dag n bee bãmb pʋgẽ, la vɩɩmã dag n yaa vẽenem ninsaalbã yĩnga.

⁵ Vẽenemã yãga lik pʋgẽ, la likã ka reeg-a ye.

⁶ Dao a yembr la Wẽnnaam tʋm t'a wa. A yʋʋr la a Zã.

⁷ Dao kãng waame n ya kaset kɩta, n na n kɩs vẽenemã kaseto, tɩ neba fãa tõe n tẽ yẽ yĩnga.

⁸ Dag n ka yẽ la vẽenemã ye, la a waame n na n kɩs vẽenemã kaseto.

⁹ Vẽen-kãng yaa sɩd vẽenem, n wa dũni pʋgẽ n vẽnegd ned fãa.

¹⁰ Gomdã dag n bee dũni pʋgẽ. B naana dũni wã ne bãmba, la dũni ka bãng bãmb ye.

¹¹ Bãmb waa b meng nebẽ, la b nebã ka reeg bãmb ye.

¹² La b kõo neb nins fãa sẽn deeg bãmba, la neb nins sẽn tẽed bãmb yʋʋrã noor tɩ b lebg Wẽnnaam kamba.

¹³ Ka kamb b sẽn dog ne zɩɩm, wall ne yĩng ratem, wall ne ninsaal datem ye, yaa Wẽnnaam sẽn doge.

¹⁴ B kɩtame tɩ gomdã rɩk yĩng n zĩnd tõnd sʋka. Tõnd gesa bãmb ziiri, Bi-ribl sẽn ka to ziir a sẽn deeg a ba wã nengẽ, la b pida ne bark la sɩda.

¹⁵ A Zã kɩsa bãmb kaset n yeele: Yaa soab ning mam sẽn gom a yell n yeel tɩ ned ning sẽn pʋgend maam n watẽ wã yɩɩda maam, bala, b renga maam n beẽ wã.

¹⁶ La tõnd fãa paama bãmb yalẽ wã, n deegd bãmb barkã n paasd wakat fãa.

¹⁷ Bala, b tũnuga a Moyiis n kõ tõogã, la barkã ne sɩdã tũnuga a Zezi Kirist n wa.

¹⁸ Ned baa a yen nan ka yã Wẽnnaam ye. Wẽnnaam sẽn ya Bi-ribl yend sẽn ka to, n be ba a Wẽnnaam nengẽ kɩtame tɩ nebã bãng bãmba.

A Zãmbatiis kaseto

¹⁹ Ad kaset ning a Zã sẽn kɩs wakat ning Zuif-rãmbã sẽn tʋm maan-kʋʋdb ne Levit-rãmb tɩ b yi Zeruzalɛm n wa n sok yẽnda a sẽn yaa a soabã.

²⁰ Yẽ vẽnegame n togs n ka kɩɩs ye. A vẽnegame n togs tɩ yẽ ka Kiristã ye.

²¹ B leb n sok-a lame tɩ rẽ wã, yẽ yaa ãnna? Yẽ yaa a Eli? T'a leok tɩ yẽ ka a Eli ye. La b sok-a lame tɩ la yaa yẽ la Wẽnnaam no-rɛɛsã? T'a leok tɩ ayo.

²² La b leb n yeelame yaa: Foo la ãnna, tɩ tõnd tõe n tɩ leok neb nins sẽn tʋm-b tõndã? Fo mengã yetame tɩ fo yaa ãnna?

²³ A Zã yeelame yaa: “Mam yaa soab ning sẽn kelemd we-rasempʋɩɩgẽ n yetẽ tɩ b rems Zu-soabã sor tɩ yɩ tɩrgã koɛɛga,” wa Wẽnnaam no-rɛɛs a Ezayi sẽn yeelã.

²⁴ B sẽn dag n tʋm b rãmbã yaa Fariisẽ-dãmba.

²⁵ B sok-a lame yaa: Bõe yĩng tɩ fo lisd neba, fo sã n ka Kirist bɩ a Eli bɩ Wẽnnaam no-rɛɛsã?

²⁶ A Zã leokame n yeele: Maam, mam lisda yãmb koomẽ. La yãmb sʋkã, ned a yen n be be yãmb sẽn ka mi ye.

²⁷ Soab kãng pʋgenda maam, la mam ka zems tɩ lood bãmb neooda loets ye.

²⁸ Gom-kãens goma Betani, Zʋrdẽ rʋʋnde, zĩig ning a Zã sẽn dag n lisd nebã.

²⁹ Vẽkembeoogo, a Zã yãa a Zezi sẽn wat yẽ nengẽ, n yeele: Ad Wẽnnaam Pe-bilã, sẽn yiisd-a dũni yel-wẽnã.

³⁰ Yaa bãmb yell la mam dag n gom ne yãmb n yeel tɩ dao n pʋgend maam, la b yɩɩda maam, bala, b renga maam n beẽ wã.

³¹ La mam dag n ka mi bãmb ye, la mam waa n lisda nebã koomẽ tɩ bãmb tõe n vẽneg b meng ne Israyɛll nebã.

³² A Zã leb n kɩsa kaset n yeele: Mam yãa Sɩɩg-sõng sẽn yi arzãn n sig wa wall n pa bãmb zugu.

³³ La mam dag n ka mi bãmb ye. La sẽn tʋm-a maam tɩ m wa n lis nebã koomẽ wã yeela maam tɩ mam sẽn na n yã ned ning tɩ Sɩɩg-sõng sig n pa a soab zugã, bɩ m bãng tɩ yaa yẽnda n lisd nebã Sɩɩg-sõng pʋgẽ wã.

³⁴ Maam, mam yãame, la mam kɩsa kaset tɩ yaa bãmb la Wẽnnaam Bi-riblã.

Pipi karen-biisi

³⁵ Vẽkembeoogo, a Zã ra leb n bee be ne a karen-biis a yiibu.

³⁶ A dag n geta a Zezi sẽn loogd n yeele: Ad Wẽnnaam Pe-bilã.

³⁷ Karen-biis a yiibã wʋma gom-kãense, la b pʋgla a Zezi.

³⁸ A Zezi wẽnegame n mik tɩ b pʋgda bãmba, la b sok-b lame tɩ b baooda bõe? B leoka a Zezi n yeele: Rabbi, sẽn dat n yeel tɩ karen-saamba, yãmb yir yaa yɛ?

³⁹ A Zezi yeela bãmb yaa: Wa-y tɩ y na yã. B kẽngame n tɩ yã zĩig ning a Zezi sẽn be wã, la b paa ne bãmb da-kãnga. Dag n yaa zaabr wakat a naas sẽne.

⁴⁰ Neb a yiibã sẽn wʋm a Zã goam n pʋgl a Zezi wã, a yembr bãmb sʋk la a Ãndre, a Sɩmo Pɩyɛɛr ba-biiga.

⁴¹ A Ãndre reng n yãnda a meng ba-biig a Sɩmo n yeel-a: Tõnd yãa Mesi, sẽn dat n togs tɩ “Kiristã.”

⁴² A talla a Sɩmo n wa a Zezi nengẽ. A Zezi ges-a lame n yeele: Foo la a Sɩmo, a Zonaas bi-ribla. B na n boonda foom t'a Sefas, sẽn dat n yeel tɩ Pɩyɛɛr (wall kugri).

A Zezi boola a Filip ne a Natanayɛl

⁴³ Vẽkembeoogo, a Zezi yãka yam n na n kẽng Galile. Bãmb yãnda a Filip n yeel-a t'a tũ bãmba.

⁴⁴ A Filip dag n yaa Betsayida sẽn yaa a Ãndre ne a Pɩyɛɛr tẽngã neda.

⁴⁵ A Filip yãnda a Natanayɛl n yeel-a yaa: Dao ning a Moyiis tõogã ne Wẽnnaam no-rɛɛsdbã sẽn gom a yellã, tõnd yãa-a lame. Yaa Nazarɛt dao a Zezi, a Zozɛf bi-riblã.

⁴⁶ A Natanayɛl soka yẽ yaa: Dẽ yĩnga, bõn-sõng tõe n yii Nazarɛt sɩda?

⁴⁷ A Filip yeel-a lame t'a wa n gese. A Zezi yãa a Natanayɛl sẽn wat bãmb nengẽ, n gom a yell n yeele: Ad Israyɛll ned sɩda, zãmb sẽn ka be a pʋgẽ ye.

⁴⁸ A Natanayɛl soka bãmb yaa: Yãmb bãnga maam yɛɛne? A Zezi leok-a lame n yeele: Sẽn deng a Filip sẽn na n bool foomã, fo sẽn dag n be kankangã tẽngrã, mam yãa foom.

⁴⁹ Dẽ, a Natanayɛl yeelame yaa: Karen-saamba, yãmb la Wẽnnaam Bi-riblã! Yãmb la Israyɛll Rĩmã!

⁵⁰ A Zezi leok-a lame n yeele: Mam sẽn yeel tɩ mam yãa foom kankangã tẽngrã yĩnga, fo tẽedame. La fo na n yãa bõn-kãsems sẽn yɩɩd a woto.

⁵¹ Sɩd-sɩda, mam yeta yãmb tɩ yãmb na n yãa arzãn sẽn pake, la Wẽnnaam malegs sẽn dʋʋd la b sigd ninsaal Bi-riblã zugẽ.