A Matiye Sõng 11 - KÃAB-PAALGÃ KOE-NOOGO

A Zãmbatiis tʋma neb a Zezi nengẽ

¹ A Zezi sẽn wilg bãmb karen-biisã piig la a yiibã b tʋʋmã n sɛ, b meng yii be n kẽng n tɩ zãms nebã la b moon koe-noogã b tẽnsã pʋse.

² A Zã zĩnda bi-bees roogẽ n wʋm tɩ b gomd a Zezi tʋʋmã yelle. Dẽ, yẽ tʋma a karen-biis tɩ b tɩ sok a Zezi woto:

³ Yãmb la sẽn tog n wa-a wã bii, bɩ d tog n gũ a to?

⁴ A Zezi leok-b lame n yeele: Kẽng-y n tɩ togs-y-yã a Zã bũmb nins yãmb sẽn wʋmd la y yãtã:

⁵ zoens nin pugsdame, wobs kẽndame, yĩn-gãong bãas sẽn tar b rãmbã yĩns lebgda yɩlma, wʋms wʋmdame, kũum vʋʋgdame, la koe-noogã moonda naong rãmb sʋka.

⁶ Bark bee ned ning mam sẽn kõn yɩ kug-lakdg a yĩngã zugu.

⁷ La a Zã karen-biisã sẽn looge, a Zezi sɩngame n gom ne neb kʋʋngã a Zã yell n yeele: Bõe la yãmb kẽng n tɩ ges we-rasempʋɩɩgẽ wã? Tãnwĩig sobg sẽn miimda?

⁸ La yaa bõe la yãmb tɩ gese? Dao sẽn yeelg waoogr futu? Neb nins sẽn yer fu-bʋgs sẽn ya neebã bee rĩm-dãmb zagsẽ.

⁹ Dẽ, bõe la yãmb kẽng n tɩ gese? Wẽnnaam no-rɛɛsa? Mam yeta yãmb tɩ n-ye. La yaa ned sẽn yɩɩd Wẽnnaam no-rɛɛsa.

¹⁰ Bala, yaa rao-kãng kibar la b sẽn dag n gʋls n yeel a woto wã: “Ade, mam tʋmda m koe-toagsda, t'a reng fo taoore, n lʋɩ taoor n maneg f sorã.”

¹¹ Sɩd-sɩda, mam yeta yãmb tɩ pagb sẽn dog b rãmbã sʋka, ned ka zĩnd sẽn ya kãseng n yɩɩd a Zãmbatiis ye. Baoosgo, soab ning sẽn ya-a yao-zʋʋg arzãn soolmẽ wã yaa kãseng n yɩɩd yẽnda.

¹² Hal a Zãmbatiis wakat tɩ ta moasã, yaa ne pãng la nebã kẽed arzãn soolmẽ. La yaa pãens rãmbã n tõogd n paamd-a.

¹³ Wẽnnaam no-rɛɛsdbã fãa ne tõogã togsa pĩnd-n-bãngr goam soolmã wɛɛngẽ hal tɩ ta a Zã wakate.

¹⁴ La yãmb sã n na n sak n deege, yẽ yaa Eli ning sẽn dag n tog n wa-a wã.

¹⁵ Sẽn tar-a tʋb bɩ a wʋme.

¹⁶ Mam na n mamsa zamaan-kãngã nebã ne ãnna rãmba? Bãmb wẽnda wa kamb sẽn zĩ raagẽ n boond taab n yetẽ:

¹⁷ “Tõnd peeba wɩɩs la yãmb ka sao ye. Tõnd yɩɩla kʋʋr yɩɩl la yãmb ka wiis ye.”

¹⁸ Bala a Zã waame n ka rɩt la a ka yũud ye, tɩ b yet tɩ sɩ-wẽng n tar-a.

¹⁹ Ninsaal Bi-riblã sẽn wa, b rɩtame la b yũuda, tɩ nebã yetẽ tɩ b yaa yão-be-neda, la rã-yũuda, la yaood-dɛɛgdb ne yel-wẽn maandb zoa. Yam biis n wilgd t'a yaa tɩrga.

A Zezi lenga tẽns kẽere

²⁰ Dẽ poore, a Zezi sɩngame n leng tẽns nins bãmb sẽn maan bõn-bãn wʋsg b pʋsẽ wã, bãmb sẽn ka tek yam n kos sugrã yĩng n yeele:

²¹ Korazin, fo na paam toogo! Betsayida, fo na paam toogo! Bala bõn-bãn nins sẽn maan yãmb pʋsẽ wã sã n dag n maanẽ Tɩɩr ne Sɩdõ sẽn ya tẽn-wẽnsã pʋse, bãmb dag n na tekẽ yam hal daar zãr n pil bot n zĩnd tompeglmẽ n kos sugri.

²² Yaa woto yĩng la mam yet yãmb tɩ bʋʋdã daare, Tɩɩr ne Sɩdõ nebã sɩbgrã toolem kõn ta yãmb ye.

²³ La foom, Kapɛrnawom, b na n zẽka foom hal tɩ f ta arzãna? Ayo, b na n sika foom hal tɩ ta kɩɩm-kulgu. Bala bõn-bãn nins sẽn maan fo pʋgẽ wã sã n dag n maanẽ Sodom pʋgẽ, a rag n na ketẽ tɩ ta rũnna.

²⁴ Yaa woto yĩng la mam yet yãmb tɩ bʋʋdã daare, Sodom sɩbgrã toolem ka na n ta foom ye.

Vʋʋsg sẽn yɛ-bã yĩnga

²⁵ Wakat kãnga, a Zezi gomame n yeele: M ba sẽn ya arzãn la tẽng Zu-soabã, mam pẽgda yãmba, yãmb sẽn solg bõn-kãens ne yam-dãmba la yẽesem-dãmba, n yaool n vẽneg kom-bõonegã ne-bã yĩnga.

²⁶ N-ye, m ba, yãmb sẽn dat tɩ ya a woto wã yĩnga.

²⁷ M ba ninga bũmb fãa mam nugẽ, la ned ba a yen ka mi Bi-riblã, sã n ka ba wã bala. La ned ba a yen ka mi ba wã, sã n ka Bi-riblã bala, la a sẽn dat n vẽneg bãmb ne ned ningã.

²⁸ Yãmb fãa, zɩɩb sẽn zɩsg tɩ y yɛ wã, wa-y mam nengẽ, la m na n kɩtame tɩ y vʋʋse.

²⁹ Rɩk-y mam yubl-balgr n pidi, la y sak mam zãmsgo, bala mam yaa nin-bʋgsga la sũ-mar soaba, la yãmb na paam vʋʋsgo.

³⁰ Bala yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.