A Mark Sõng 8 - KÃAB-PAALGÃ KOE-NOOGO

A Zezi dɩlga neb tus a naase

¹ Ra-kãense, neb wʋsg sẽn leb n tigim taaba, la b ka tar rɩɩb sẽn na rɩ, a Zezi boola b karen-biisã n yeel-b yaa:

² Kʋʋngã nimbãaneg tara maam, bala, rasem a tãab moasã la b be ne maam n ka tar rɩɩb sẽn na rɩ ye.

³ Mam sã n kɩt tɩ b kuil ne kom, b na n tadga sorẽ, bala, kẽer sẽn yiẽ zãrame.

⁴ Bãmb karen-biisã sok-b lame yaa: Ned na n yɩɩ a wãn n paam bur weoogẽ ka tɩ sek bãmba fãa?

⁵ A Zezi soka bãmb yaa: Yãmb tara bur a wãna? Bãmb leokame t'a yopoe.

⁶ Dẽ, bãmb kɩtame tɩ kʋʋngã zĩnd tẽnga. Bãmb dɩka bur a yopoe wã, la b sẽn ning-a bark n sa, b kaoome n kõ b karen-biisã tɩ b pʋɩ nebã, la b pʋɩ-b lame.

⁷ La bãmb dag n tara zĩm-bõoneg bilfu. La a Zezi sẽn ning-a barka, b yeelame tɩ b pʋɩ rẽ me.

⁸ Nebã dɩɩme n tɩge. La karen-biisã wʋka bur-gɩrsã sẽn kellã peoog a yopoe n zã.

⁹ Sẽn dɩ-bã sõor kolga neb tus a naase. Dẽ poore, a Zezi kuils-b lame.

¹⁰ Tao-tao bala, bãmb ne b karen-biisã kẽe koom-koglgã n kẽng Dalmanuta.

Fariisẽ-dãmbã kosa bãnde

¹¹ Fariisẽ-dãmba waame n sɩng n gom ne a Zezi. La sẽn na yɩlẽ n mak a Zezi, b kosa bãmb tɩ b wa ne bãnd sẽn yit yĩngri.

¹² A Zezi wẽe sir-kãseng b sũurẽ n yeele: Bõe tɩ zamaan kãngã nebã baood bãnde? Mam yeta yãmb sɩd tɩ zamaan kãngã nebã kõn tol n paam bãnd ye.

¹³ Dẽ, a Zezi basa bãmb n kẽ koom koglg n kẽng ko-kãsengã rʋʋnde.

Fariisẽ-dãmbã ne Herood rã-bɩlle

¹⁴ B karen-biisã yĩmame n ka zɩ bur ye. Yaa bur a yen tãa bal la b dag n tar koglgã pʋgẽ.

¹⁵ A Zezi sagla bãmb woto: Gũus-y y mens neer ne Fariisẽ-dãmba la Herood rã-bɩlle.

¹⁶ B karen-biisã yẽsa ne taab n yeel tɩ yaa bãmb sẽn ka tar burã yĩng la a Zezi gom a woto wã.

¹⁷ A Zezi bãngame n sok-b yaa: Yaa a wãn tɩ yãmb yẽsd ne taab n yetẽ tɩ yaa yãmb sẽn ka tar burã yĩnga? Yãmb yam ket n nan ka vẽneg laa? Yãmb ket n nan ka wʋm laa? Yãmb yamã kɩdame laa?

¹⁸ Yãmb sẽn tar ninã y ka ne laa? “Yãmb sẽn tar tʋbã y ka wʋmd laa? Yãmb ka tol n tar pʋ-tẽer laa?”

¹⁹ Mam sẽn kao bur a nu n kõ neb tus a nu wã, yãmb wʋka bur-gɩrsã sẽn kellã peoog a wãna? Bãmb leokame tɩ piig la a yiibu.

²⁰ La mam sẽn kao bur a yopoe n kõ neb tus a naasã, yãmb wʋka bur-gɩrsã sẽn kellã peoog a wãna? Bãmb leokame t'a yopoe.

²¹ La a Zezi sok-b lame yaa: Yãmb ket n ka wʋm laa?

A Zezi maaga zoang Betsayida

²² Bãmb kẽnga Betsayida, la b waa ne zoang a Zezi nengẽ n kos bãmb tɩ b sɩɩs-a.

²³ Bãmb gãda zoangã nug n tɛ-a n yi tẽngã, n tʋbs kolkood n ning a ninã, n tik-a ne b nusi, n sok-a a sã n yãta bũmbu.

²⁴ Zoangã gesame la a leok tɩ yẽ nee nebã, la b wẽnda wa tɩɩse, la b kẽndame.

²⁵ A Zezi leb n tika yẽ ninã ne b nusã yɛsa. La zoangã sẽn ges kũii, a ninã pukame t'a ne vẽenega.

²⁶ Dẽ, a Zezi kuilsa yẽ a yiri, n yeel-a t'a da kẽ tẽngã pʋgẽ ye.

A Pɩyɛɛr kaseto

²⁷ A Zezi ne b karen-biisã kẽnga tẽns sẽn pẽ tẽng sẽn boond tɩ Filip Sezaare. La b sẽn be sorẽ, a Zezi soka b karen-biisã tɩ nebã yetame tɩ bãmb a Zezi yaa ãnna?

²⁸ B leokame tɩ kẽer yetame t'a Zãmbatiis, tɩ kẽer yetẽ t'a Eli, tɩ kẽer me yetẽ tɩ Wẽnnaam no-rɛɛsdbã ned a yembre.

²⁹ La a Zezi sok-b lame yaa: La yãmba, yãmb yetame tɩ mam yaa ãnna? A Pɩyɛɛr leoka bãmb n yeel tɩ b yaa Kiristã.

³⁰ A Zezi sagla bãmb neer tɩ b ra togs ned yõwã ye.

A Zezi pĩnd n goma b kũum la b vʋʋgr yelle

³¹ Dẽ, a Zezi sɩngame n zãms b karen-biisã n yeel tɩ yaa tɩlɛ tɩ Ninsaal Bi-riblã nams wʋsgo, la tɩ tẽngã nin-kẽembã ne maan-kʋʋdbã kãsem-dãmbã, ne tõog karen-saam-dãmbã na n zãgsa bãmba, la tɩ b na n kʋʋ bãmba, la tɩ ra-yɩt-n-daarã, bãmb na n vʋʋgame.

³² Bãmb wilga bõn-kãens vẽenega. La a Pɩyɛɛr boola bãmb kɛɛnga, n sɩng n zab bãmba.

³³ A Zezi leb n wẽnegame n ges b karen-biisã, n leng a Pɩyɛɛr n yeele: Sʋtãana, leb mam poorẽ, bala, fo tagsgã ka Wẽnnaam tagsg ye, yaa ninsaalb rẽnda.

³⁴ Dẽ, bãmb boola b karen-biisã ne neb kʋʋngã n yeel-b yaa: Ned sã n dat n tũ maam, bɩ a kɩɩs a mengã raabo, n dɩk a ra-pɩk n tũ maam.

³⁵ Bala, ned ning fãa sẽn dat n gũ a vɩɩm, a vɩɩmã na sãam, la ned ning fãa sẽn na bas a vɩɩm mam yĩnga la koe-noogã yĩnga, a na põse.

³⁶ La ned sã n paam dũni bũmb fãa n yaool n bas n ki, bõe yõod la a paam a pʋgẽ?

³⁷ Ninsaal na n teka a vɩɩmã ne bõe?

³⁸ Mam yelle la mam goamã sã n ya yãnd ne nina zamaan kãngã nebã sẽn ya yoaadbã la yel-wẽn maandbã sʋka, yẽ me yell na n yɩɩ yãnd ne maam a Ninsaal Bi-riblã, wakat ning mam sẽn na n wa ne m ba wã naam la ne maleg-sõmyã.