A Mark Sõng 7 - KÃAB-PAALGÃ KOE-NOOGO

Bũmb nins sẽn maand ned t'a lebg rẽgdo

¹ Fariisẽ-dãmbã ne tõog karen-saam-dãmbã kẽer sẽn yi Zeruzalɛm tigma taab n gũbg a Zezi.

² Bãmb yãa a Zezi karen-biisã kẽer sẽn dɩt rɩɩb ne nus-rẽgdo, sẽn dat n togs tɩ sẽn ka nudg ye.

³ Fariisẽ-dãmbã ne Zuif-rãmbã fãa yaool n ka rɩt tɩ b ka reng n nudg b nusã neer wa sẽn zems b yaab-rãmbã miningã ye.

⁴ La bãmb sã n yi raagẽ n wa, b sã n ka waase b ka rɩt ye. La b tara minind a taab b sẽn sakda, a wa wama la yʋya la zũud laas needgo.

⁵ Fariisẽ-dãmbã ne tõog karen-saam-dãmbã soka a Zezi tɩ yaa bõe yĩng tɩ bãmb karen-biisã ka sakd b yaab-rãmbã miningu, n dɩt ne nus-rẽgdo?

⁶ A Zezi leoka bãmb yaa: Zãmb-dãmba, a Ezayi sɩd togsa bãngr goam ne yãmb yelle, a sẽn gʋls n yeele: “Nin-kãensã waoogda maam ne b nobɩms bala, la b sũyã zãra ne maam.

⁷ La bãmb sẽn waoogd maamã yaa zaalem, bala, bãmb zãmsa nebã kaoreng sẽn ya ninsaalb tõod bala.”

⁸ Yãmb basda Wẽnnaam tõod n sakd ninsaalb minindu.

⁹ A Zezi kẽnga taoor n yeele: Yãmb tara sɩlem n maandẽ n basd Wẽnnaam tõodã kɛɛnga n sakd y mens minindu.

¹⁰ Bala, a Moyiis ra yeelame: “Waoog f ba la f ma, la ned sã n paoog a ba bɩ a ma bɩ b kʋ-a.”

¹¹ La ne yãmba, ned sã n yeel a ba bɩ a ma: “Mam sẽn da na n sõng yãmb ne bũmb ningã, a lebga korbã, sẽn dat n togs tɩ kũun Wẽnnaam yĩnga,” a ka yell ye.

¹² Yãmb ka le sakd t'a maan baa fʋɩ a ba bɩ a ma yĩng ye.

¹³ Woto, yãmb minindã yãmb sẽn karemd nebã kɩtdame tɩ Wẽnnaam goamã lebg zaalem. La yãmb maanda bũmb a woto buud wʋsgo.

¹⁴ Dẽ poore, bãmb leb n boola neb kʋʋngã n yeel-ba: Yãmb fãa, kelg-y maam la y bãnge.

¹⁵ Bũmb ka be n kẽed ninsaal pʋgẽ n tõe n kɩt t'a lebg rẽgd ye. Yaa bũmb ning sẽn yit ninsaal pʋgẽ wã n kɩtd t'a lebg rẽgdo. [

¹⁶ Sẽn tar-a tʋb sẽn wʋmda, bɩ a wʋm.]

¹⁷ Bãmb sẽn bas nebã n kẽ roogẽ, b karen-biisã soka bãmb yel-bũn kãng võore.

¹⁸ La a Zezi yeel-b lame yaa: Yãmb me yam ka vẽneg laa? Yãmb ka wʋmd tɩ bũmb sẽn be yɩng n kẽed ninsaal pʋgẽ ka tõe n kɩt t'a lebg rẽgd laa?

¹⁹ Bala, bõn-kãng ka kẽed yẽ sũurã pʋgẽ ye, a kẽeda a pʋgẽ tɩ b yaool n tɩ yiis-a n bas we-kɛɛnga. (A Zezi goma a woto n na n wilg tɩ rɩɩb fãa yaa sẽn na rɩ.)

²⁰ Bãmb leb n yeelame: Yaa bũmb ning sẽn yit ninsaal pʋgẽ wã n kɩtd t'a lebg rẽgdo.

²¹ Bala, yaa pʋgẽ, ninsaalb sũyã pʋs la bõn-wẽnsã yita: tags-wẽnse, tʋʋm-dẽgdo,

²² wagdem, nin-kʋʋre, yoobo, yão-beedo, pʋ-toogo, sɩlem, rãmbgo, sũ-kiiri, nin-tʋʋre, tɩtaam la yalem-tagsgo.

²³ Bõn-wẽn kãens fãa yita ninsaal pʋgẽ n kɩtdẽ t'a lebg rẽgdo.

Siiri Fenisi pag tẽebo

²⁴ A Zezi basa zĩ-kãnga n kẽng Tɩɩr soolmẽ. Bãmb kẽe roogẽ n ka rat tɩ ned bãng ye, la b ka tõog n soond ye.

²⁵ Bala, zĩn-dẽgd n dag n tar pag a yembr bi-pugla, la pagã wʋma a Zezi kibare, n wa n wõgemd bãmb taoore.

²⁶ Yẽ yaa Gɛrk sẽn yit Siiri Fenisi. Yẽ kosa bãmb tɩ b rig zĩnã sẽn tar a biigã.

²⁷ A Zezi yeela yẽnda: Bas tɩ kambã rɩ n tɩg nanda, bala, a ka zems tɩ b rɩk kamb rɩɩb n kõ ba-bi ye.

²⁸ Yẽ leoka bãmb yaa: Zu-soaba, yaa sɩda, la ba-bi sẽn be taabl tẽngr rɩta kambã rɩ-zersã.

²⁹ Dẽ, bãmb yeel-a lame yaa: Gom-kãnga yĩng bɩ f kẽnge. Zĩnã yiime n bas f bi-puglã.

³⁰ La yẽ sẽn ta yiri, a mikame tɩ zĩnã yii n basa a bi-puglã t'a gãe a gãagẽ.

A Zezi maaga rao sẽn ya bidg la wʋnga

³¹ A Zezi basa Tɩɩr soolem n leb n tũ Sɩdõ n pɩʋʋg Dekapol n kẽng Galile mog-kãsengã sẽne.

³² B waa ne wʋng sẽn ya bidg bãmb nengẽ n kos-b tɩ b tik-a ne b nusi.

³³ Bãmb peega yẽnda kʋʋngã sʋk n yi kɛɛnga, n ning b nus-bi a tʋbã pʋsẽ, la b tʋbsame, n tẽk a zelemdã ne kolkoodã,

³⁴ n yaool n nak n ges yĩngr n wẽ sir n yeele: “Effata,” sẽn dat n togs tɩ yoke.

³⁵ Tao-tao bala, a tʋba yoosame, la a zelemdã lakame t'a gomd sõama.

³⁶ A Zezi sagla bãmb tɩ b ra togs ned ye. La bãmb sã n sagendẽ, b moondame n yɩɩd pĩnda.

³⁷ Nebã yɛɛsa hal wʋsg n yetẽ: Bãmb maanda bũmb fãa neere. Bãmb kɩtdame tɩ baa wʋms wʋmdẽ, tɩ mugs gomda.