A Mark Sõng 4 - KÃAB-PAALGÃ KOE-NOOGO

Bõn-buud b sẽn fẽrg yel-bũndi

¹ A Zezi leb n sɩngame n na n zãms nebã mogrã noore. Neb kʋʋng wʋsg sẽn tigim taab bãmb nengẽ yĩnga, bãmb kẽe koom-koglg ninga sẽn be mogrã pʋgẽ wã n zĩndi. La kʋʋngã fãa zĩnda koomã noore.

² Bãmb wẽe yel-bũn n zãms nebã bũmb wʋsgo. Zãmsgã pʋgẽ b yeela nebã yaa:

³ Kelg-y-yã! Ned a yen n da kẽng n na n tɩ fẽrg bõn-buudu.

⁴ Fẽrgrã wakate, bõn-biis kẽer lʋɩɩ sor kɩrenga, la liuuli waa n dɩɩ bãmba.

⁵ La kẽer lʋɩɩ kug zĩiga, tom sẽn ka waoogẽ, la tao-tao bala, b yiime, tomã sẽn ka waoogã yĩnga.

⁶ La sõor sẽn zẽke, wĩntoogã yõog-b lame tɩ b ki, b sẽn ka paam yẽgã yĩnga.

⁷ La kẽer lʋɩɩ gõos sʋka, la gõosã yikame n dɩ-b tɩ b ka wom biis ye.

⁸ La kẽer lʋɩɩ zĩ-sõngẽ n yik n wom biisi. Kẽer womame tɩ ta bɛɛl pis-tãtã, tɩ kẽer ta pis-yoobyoobe, tɩ kẽer ta koabg-koabga.

⁹ Dẽ, a Zezi yeelame: Sẽn tar-a tʋb sẽn wʋmd bɩ a wʋm.

¹⁰ Bãmb sẽn wa n be kɛɛnga, neb nins sẽn tũ-b bãmbã ne karen-biis piig la a yiibã soka bãmb yel-bũnã võore.

¹¹ A Zezi yeela bãmba: Yaa yãmb la Wẽnnaam kɩt tɩ y bãng bãmb soolem bõn-solgdse, la ne neb nins sẽn ka be soolmã pʋgẽ wã, yel-kãens yaa soalem bala,

¹² “hal tɩ baa b sã n get sõama, b kõn yã ye, la b sã n wʋmd sõama, b kõn wʋm a võore, tɩ b ra wa n tek yam n kos sugr n paam ye.”

Yel-bũndã bilgri

¹³ A Zezi leb n sok-b lame yaa: Yãmb ka wʋmd yel-bũn-kãnga võor laa? Dẽ, yãmb na n maana a wãn n wʋm yel-bũnã fãa võore?

¹⁴ Bõn-bu-fẽrgdã fẽrga Wẽnnaam goama.

¹⁵ Neb kẽer wẽnda wa sor kɩrengã, zĩig ning Wẽnnaam goama sẽn fẽrgã. Bãmb sẽn wʋm koɛɛgã yee, la Sʋtãanã sẽn wat n yiis koɛɛg ning sẽn bʋd b sũurẽ wã.

¹⁶ Woto me, neb nins sẽn wʋm Wẽnnaam koɛɛgã n deeg-a tao-tao ne sũ-noogã wẽnda wa kugã zĩig bõn-buudã sẽn lʋɩẽ wã.

¹⁷ Bãmb ka tar yẽg ye, bãmb kaoosda bilf bala. La toog bɩ namsg sã n paam bãmba Wẽnnaam koɛɛgã yĩnga, tao-tao bala, b lʋɩtame.

¹⁸ Neb a taab wẽnda wa gõos zĩigã bõn-biisã sẽn lʋɩẽ wã. Bãmb yaa neb nins sẽn wʋmd Wẽnnaam koɛɛgã, tɩ yɩɩr ne dũniyã yɛlã,

¹⁹ la arzegs belgre, la bũmb a taab ratem kẽedẽ n dɩt Wẽnnaam koɛɛgã t'a ka womd biis ye.

²⁰ La neb a taab wẽnda wa zĩ-sõngã bõn-biisã sẽn lʋɩ a pʋgẽ wã. Bãmb dãmb yaa neb sẽn wʋmd Wẽnnaam koɛɛgã n deegdẽ n womd biisi. Kẽer womame tɩ ta bɛɛl pis-tãtã, tɩ kẽer ta pis-yoobyoobe, tɩ kẽer ta koabg-koabga.

Fɩtla la makdga

²¹ A Zezi leb n soka bãmb yaa: Rẽ yĩnga, b fõgenda fɩtɩl ne peoogo, wall b ning-a gãag tẽngre? B kõn dogl-a fɩtɩl doagendgã zug sɩda?

²² Tɩ bõe, bũmb ka be sẽn ludi, sẽn kõn puk ye, la bũmb ka be sẽn solge, sẽn kõn vẽneg ye.

²³ Bɩ sẽn tar-a tʋb sẽn wʋmd wʋme.

²⁴ Bãmb leb n yeela neba yaa: Gũus-y neer ne bũmb ning yãmb sẽn wʋmdã. Wẽnnaam na n maka ne makdg ninga yãmb sẽn tar n makd n kõt nebã n lebs yãmba, la b na n ningame tɩ sudgi.

²⁵ Bala, b na n kõo ned ning sẽn tar-a, la ned ning sẽn ka tar-a wã, b na n deega baa bũmb bilf ning a sẽn tarã.

Bõn-buud sẽn yit n bɩtẽ

²⁶ Bãmb leb n yeelame: Wẽnnaam soolem yaa wa rao sẽn bʋd bõn-biis a pʋʋgẽ.

²⁷ A gõe t'a ne me, wĩndg ne yʋngo, bõn-biisã bundame n yikdẽ, la yẽ ka mi sẽn yɩt to-to ye.

²⁸ Bõn-bulã yita b toore, n deng n ya vãado, n wa rɩk pʋse, n yaool n wom biis sẽn ya sõama.

²⁹ La biisã sã n bɩ zãnga, b tigsdame, bala, a tigsg wakat taame.

Siin-bila

³⁰ A Zezi leb n yeelame: Tõnd na n mamsa Wẽnnaam soolemã ne bõe, wall d bilg-a ne bõe yel-bũndi?

³¹ A wẽnda wa siin-bila. Yẽ yaa bilf n yɩɩd bõn-biisã fãa sẽn bʋt tẽngã.

³² La b sã n bʋd-a, a yikdame n lebg wok n yɩɩd zẽed buud a taabã fãa, n tãoodẽ tɩ liuuli tõe n tʋɩ b tʋgd a maasmẽ.

A Zezi zãmsa neb ne yel-bũna

³³ Yaa ne yel-bũn a woto buud wʋsg la a Zezi wilg nebã Wẽnnaam goamã, a wa sẽn zems b wʋmbo.

³⁴ A Zezi ka gom ne-ba, a sã n ka ne yel-bũn ye. La b sã n wa n be ne b karen-biisã bala, b bilgda bãmb bũmb fãa võore.

A Zezi kɩtame tɩ sobg yõke

³⁵ La baraar bala, zĩ-sobd sẽn ta, a Zezi yeela b karen-biisã yaa: Wa-y tɩ d kẽng mogrã rʋʋnde.

³⁶ La karen-biisã sẽn kuils nebã n sɛ, bãmb looga ne a Zezi ne koom-koglg ning b sẽn dag n be a pʋgẽ wã. La kogond a taab me tũu bãmba.

³⁷ Sob-kãseng yikame tɩ ko-pɛma kẽed koglgã pʋg hal t'a zoe n kolg pidbu.

³⁸ La a Zezi ra bee koglgã poorẽ n kʋgl zu-kʋk n gõe. La b neka bãmb n yeele: Karen-saamba, tõnd sẽn na n sãamã yell ka pak yãmb laa?

³⁹ A Zezi sẽn neke, b lenga sobgã, n yeel ko-kãsengã t'a bas bʋʋr la a sĩndi! La sobgã yõkame tɩ zĩigã lebg sɩddd.

⁴⁰ Dẽ, a Zezi sok-b lame: Yaa bõe tɩ yãmb zoet rabeem a woto? Yaa a wãn tɩ yãmb ka tar tẽebo?

⁴¹ Dabeem kãseng yõk-b lame, la b soka taab tɩ nin-kãnga yaa bõe neda, tɩ hal baa sobgã ne ko-kãsengã sakd bãmba?