A Mark Sõng 15 - KÃAB-PAALGÃ KOE-NOOGO

A Pilat kaoo a Zezi bʋʋdo

¹ Yibeoog pĩnda, maan-kʋʋdbã kãsem-dãmb tigma ne kãsem-dãmbã la tõog karen-saam-dãmbã, la kaoreng yɛl bʋ-bʋʋdbã fãa. Bãmb sẽba a Zezi n tall-b n tɩ kɩs a Pilat.

² A Pilat soka a Zezi: Yãmb yaa Zuif-rãmbã rĩma? A Zezi leoka yẽ a woto: Yãmb n yeele.

³ Maan-kʋʋdbã kãsem-dãmbã rõda bãmb ne bũmb wʋsgo.

⁴ A Pilat leb n soka bãmb yaa: Yãmb ka leokd tɩ bũmb laa? Ges-y bũmb nins fãa b sẽn dõt yãmbã.

⁵ La a Zezi ka tol n leok tɩ bũmb ye. La rẽ yɛɛsa a Pilat.

B kaoo a Zezi bʋʋd tɩ b toga kʋʋbo

⁶ Kibs fãa, a Pilat dag n yiisda bi-bɛɛg a yen, nebã sẽn kos a soabã n base.

⁷ La ned a yen sẽn boond t'a Barabas dag n bee bi-bees roogẽ ne tẽn-dãmbdba, tɩ bõe, tẽn-dãmbg wakate, b kʋʋ neda.

⁸ Kʋʋngã rʋʋme n tɩ kos a Pilat bũmb ning a sẽn mi n maand n kõt bãmbã.

⁹ A Pilat soka bãmb b sã n datame t'a bas Zuif-rãmbã dĩmã n kõ-ba.

¹⁰ Bala, yẽ bãngame tɩ yaa sũ-kiir yĩng la maan-kʋʋdbã kãsem-dãmbã yõk a Zezi n wa n kɩs yẽnda.

¹¹ La maan-kʋʋdbã kãsem-dãmbã kɩtame tɩ nebã kos tɩ b yiis a Barabas n base.

¹² A Pilat leb n gomame n sok bãmb tɩ b ratame tɩ yẽ maan a soab ning bãmb sẽn boond tɩ Zuif-rãmbã dĩmã bõe?

¹³ Bãmb leb n kelmame n yeele: Ka-y bãmb da-pɩk zugu.

¹⁴ A Pilat soka bãmba: B maana bõe sẽn ya wẽnga? La nebã leb n kelma ne pãng n yɩɩd pĩnda: Ka-y bãmb da-pɩk zugu.

¹⁵ A Pilat sẽn dat n noog neba sũur yĩnga, a yiisa a Barabas n base. La yẽ sẽn kɩt tɩ b pãb a Zezi ne kalwaase, yẽ rɩka bãmb n kõ nebã tɩ b ka-b da-pɩk zugu.

¹⁶ Sodaasã talla a Zezi n kẽng zaka pʋgẽ, sẽn dat n togs tɩ sodaasã zakẽ, la bãmb tigma sodaasã fãa sẽn be zĩ-kãngã.

¹⁷ B yeelga a Zezi fu-miuugu, la b kala gõos wa maanfo n fõgen bãmb zugu.

¹⁸ Dẽ, sodaasã sɩngame n pʋʋs bãmb n yeele: Zuif-rãmbã dĩma, tõnd pʋʋsda yãmba.

¹⁹ La bãmb wẽe a Zezi zug ne tãnwĩiga, n tʋbs bãmb kolkoodo, la b yĩgimdame n wõgemd bãmb taoore.

²⁰ Bãmb sẽn yaal a Zezi a woto n sɛ, b pidga fu-miuugã n lebs a Zezi futã n yeelg-ba, la b talla bãmb n na n tɩ ka da-pɩk zugu.

B kaa a Zezi da-pɩk zugu

²¹ Bãmb modga ned a yen sẽn yi weoogẽ n loogdẽ t'a tʋk a Zezi da-pɩkã. A yʋʋr la a Sɩmo, n ya Sirɛn neda. Yẽ yaa a Alegsãndr ne a Rufus ba.

²² Bãmb talla a Zezi n kẽng zĩig ning sẽn boond tɩ Golgota, sẽn dat n togs tɩ zu-wang zĩiga.

²³ Bãmb kõo a Zezi rãam sẽn kalem ne miir la a Zezi ka yũ ye.

²⁴ Bãmb kaa a Zezi da-pɩk zugu, la b pʋɩɩ bãmb futã n maan bãnde, n na n bãng ned kam fãa sẽn na n paam fuug ninga.

²⁵ Yaa sõ-bɩɩmd wakat la b ka bãmb da-pɩkã zugu.

²⁶ Gʋlsem ning sẽn wilgd b sẽn dõd bãmb ne bũmb ningã yeta a woto: Zuif-rãmbã rĩma.

²⁷ Bãmb kaa fãadb a yiib da-pɩgs zut ne a Zezi: A yembr b rɩtgo, a to wã b goabga. [

²⁸ Woto, gʋls-sõng sẽn yet tɩ b lagma bãmb ne wẽng maandbã paama pidsgu.]

²⁹ Neb nins sẽn loogd be wã tʋʋ bãmba, n gõms b zut n yeele: N-faa! Yãmb sẽn tõe n sãam wẽnd-doogã n lebs n me-a rasem a tãabã,

³⁰ bɩ y fãag y meng n wa n sig da-pɩkã zugu.

³¹ Maan-kʋʋdbã kãsem-dãmbã ne tõog karen-saam-dãmbã me goma ne taab n yaal bãmb n yeele: B fãaga neb a taaba, n yaool n ka tõe n fãag b meng ye.

³² Bɩ Kirist sẽn ya Israyɛl dĩmã sig da-pɩkã zug moasã tɩ d yã n tẽ. La neb nins b sẽn ka da-pɩgs zut ne bãmbã me goma bãmb wẽnga.

³³ Sẽn ta wĩnto-sʋka, dũni gill fãa lebga lik bida hal tɩ ta wẽn-kaoore.

³⁴ La wẽn-kaoor wakate, a Zezi zẽka b koɛɛg n kelem n yeele: Eloyi! Eloyi! Lama sabaktani? Sẽn dat n togs tɩ: “Mam Wẽnnaam! Mam Wẽnnaam! Yaa bõe tɩ yãmb bas maam?”

³⁵ Neb kẽer sẽn dag n be be wã sẽn wʋm a woto, b yeelame: Gese, bãmb boonda a Eli.

³⁶ La bãmb ned a yembr wudgame n dɩk needg n los miismẽ, n yaag n sel tãnwĩig n kõ bãmb tɩ b yũ, la a yeele: Bas-y tɩ d ges a Eli sã n na wa n sik bãmba.

³⁷ La a Zezi zẽka b koɛɛg n kelem ne pãnga, la b kiime.

³⁸ Wẽnd-doogã fu-lilldig sɩnga yĩngr n kẽeg n tãag tẽnga.

³⁹ Sodaas koabg naabã sẽn dag n yas t'a neng tees a Zezi wã, a sẽn yã b kũuma sẽn yɩ to-to wã, a yeelame: Hakɩɩka, rao-kãngã yaa Wẽnnaam Bi-ribla.

⁴⁰ Pagb me n dag n be be n yas yɩɩg n getẽ. A Maari sẽn yit Magdala, ne a Maari sẽn ya a Zak-bil ne a Zoze ma, la a Salome da bee bãmb sʋka.

⁴¹ Bãmb dag n tũuda a Zezi n sõngd bãmb wakat ninga b sẽn dag n be Galile. Pagb a taab wʋsg da tũu a Zezi n wa Zeruzalɛm.

A Zezi mumbu

⁴² Dag n yaa seglg daare, sẽn dat n togs tɩ daar ninga sẽn deng vʋʋsg daarã. La wĩndgã sẽn kolg lʋɩɩs yĩnga,

⁴³ a Zozɛf sẽn yit Arimate waame. Yẽ yaa kaorengã yɛl bʋ-bʋʋd neba fãa sẽn waoogda, la a me rag n gũuda Wẽnnaam soolem waoongo. Yẽ maana raood n kẽng a Pilat nengẽ n tɩ kos a Zezi kũumã.

⁴⁴ A Pilat sẽn wʋm t'a Zezi zoe n kiime, a yɛɛsame, la a kɩtame tɩ b bool sodaas koabg naabã t'a wa, t'a sok-a n na n bãng b sã n kii sẽn kaoose.

⁴⁵ Sodaas koabg naabã sẽn wilg yẽ yellã sẽn yɩ to-to wã, a kõo a Zozɛf a Zezi kũumã.

⁴⁶ La a Zozɛf raa lẽ peen-peelse, n sik a Zezi kũumã da-pɩkã zugu, n vil-b ne pɛɛlã n gãneg-b yaoog sẽn tuk kugr zug pʋgẽ, la a bilma kugr n lud yaoogã noore.

⁴⁷ A Maari sẽn yit Magdala ne a Zoze ma a Maari ra geta zĩig ninga b sẽn gãneg bãmbã.