A Mark Sõng 13 - KÃAB-PAALGÃ KOE-NOOGO

Bãn sẽn wilgd wakat saabo

¹ A Zezi sẽn yit wẽnd-doogẽ wã, bãmb karen-biig a yembr yeela bãmb yaa: Karen-saamba, ges-y kugã neerlem la rotã bedrem!

² A Zezi leoka yẽnda: Fo nee ro-kãsems kãensã? Kugr baa a yen kõn pa a to zug b sẽn kõn leeb n lub ye.

³ A Zezi zĩnda oliiv tɩɩs tãngã sẽn be wẽnd-doogã neng taoorã zugu. Bãmb sẽn ya b yen tɩ neb a taab ka be ne bãmba, a Pɩyɛɛr ne a Zak la a Zã la Ãndre kosa a Zezi a woto:

⁴ Wilg-y tõnd bõn-kãng sẽn na n wa wakat ninga, la bãnd sẽn na n wilg bõn-kãens fãa saab wakate.

⁵ La a Zezi sɩngame n yeel bãmba: Gũus-y y mens neer tɩ ned da tõog n tudg yãmb ye.

⁶ Bala, neb wʋsg na n dɩka mam yʋʋr n wa n yeel tɩ bãmb yaa maam, la b na n tudga neb wʋsgo.

⁷ Yãmb sã n wʋm zabr rãamde, la y wʋm zabr kibare, bɩ y ra yɛɛs ye, tɩ bõe, yaa tɩlɛ tɩ bõn-kãens fãa zĩndi, la rẽ nan ka wakat saab nand ye.

⁸ Tẽng a ye rãmb na n yika zabr ne tẽng a to rãmba, tɩ soolem a ye rãmb yik ne soolem a to rãmba. La tẽn-digimdg na n zĩnda zĩig-zĩiga, la kom na n zĩndame. Bõn-kãens fãa na n yɩɩ wa rogem toog sɩngr bala.

⁹ Gũus-y y mense. Neb na n yõga yãmb n kẽng bʋʋd zĩisẽ, la b na n pãba yãmb karen-dot pʋse. Neb na n yõga yãmb n kẽng Gʋvɛrneer dãmba la rĩm-dãmb taoor mam yĩnga, tɩ bãmb paam n wʋm kasetã.

¹⁰ Yaa tɩlɛ tɩ koe-noogã reng n moon tẽnsã fãa pʋse.

¹¹ La b sã n yõg yãmb n kẽnd bʋʋdã zĩigẽ, bɩ y ra maan yɩɩr ne yãmb sẽn na n tɩ yeel tɩ bũmb ning ye. Togs-y bũmb ning Wẽnnaam sẽn na n wilg yãmb wakat kãngã, bala, ka yãmb n na n gom ye, yaa Sɩɩg-sõngo.

¹² Ned na n zãmba a ba-biig tɩ b kʋ-a. Kamb na n yika ne b ba-rãmb la b ma-rãmba, n kɩt tɩ b kʋ-ba.

¹³ Neb na n kisga yãmb mam yʋʋrã yĩnga, la ned ninga fãa sẽn na yals kãenkãe hal tɩ wakat ta na paam fãagre.

¹⁴ Yãmb sã n wa n yã “sãoong bõn-wẽngã” t'a be zĩig ning sẽn ka zems t'a beẽ wã — bɩ sẽn karemd-a wã wʋm a võor sõama — bɩ neb nins sẽn be Zude soolmẽ wã zoe n dʋ tãensã.

¹⁵ Bɩ ned ning sẽn be a roog zug ra sig n kẽ a roogẽ n na n dɩk bũmb ye.

¹⁶ La bɩ ned ning sẽn be a pʋʋgẽ ra lebg n tɩ rɩk a fuug ye.

¹⁷ Pagb nins sẽn tʋta la sẽn yẽsemd kamb na yã toog da-kãens daare.

¹⁸ Pʋʋs-y tɩ bõn-kãens ra yɩ waood wẽnd ye.

¹⁹ Tɩ bõe, tood nins sẽn na n zĩnd da-kãens daarã, sẽn sɩng ne Wẽnnaam sẽn naan dũni hal tɩ ta moasã, a buud nan ka zĩnd ye, la tood a woto buud kõn leb n zĩnd ye, abada.

²⁰ Zu-soabã sã n da ka boogẽ da-kãens sõore, ned baa a yen dag n kõn põs ye. La nin-tũusdsã bãmb sẽn tũusã yĩnga, bãmb booga da-kãens sõore.

²¹ Dẽ, ned sã n yeel yãmb tɩ Kirist bee ka, wall b bee ka sẽne, bɩ y ra tẽ-a ye.

²² Tɩ bõe, neb sẽn yagd zĩrĩ tɩ b yaa Kirist, la neb sẽn yagd zĩrĩ tɩ bãmb yaa Wẽnnaam no-rɛɛsdb na n yikame n maan bãna la bõn-yɛɛsdse, tɩ b sã n tõe, bɩ b tudg nin-tũusdsã.

²³ Gũus-y y mense. Mam pĩnd n togsa yãmb bũmba fãa.

Ninsaal Bi-riblã waoongo

²⁴ Wakat kãnga, to-kãng zugẽ, wĩntoogã na n sobgame la kiuugã kõn kõ a vẽenem yɛs ye.

²⁵ Ãdsã na n yii yĩngr n dʋʋge, la saasẽ pãens rãmbã na n digimdame.

²⁶ Dẽ poore, nebã na n yãa “Ninsaal Bi-riblã sẽn wat ne sawato,” ne pãn-kãsenga, la naam.

²⁷ La bãmb na n tʋma b malegsã, n tigs b nin-tũusdsã sẽn be dũni kɩrems a naasã, hal dũni tɛk tɩ ta yĩngr tɛka.

²⁸ Ges-y kankang n paam zãmsgo: a sã n tão wil-poal n tobdẽ, yãmb miime tɩ sig-noor kolgdame.

²⁹ Woto me, yãmb sã n yã tɩ bõn-kãens maandẽ, bɩ y bãng tɩ Ninsaal Bi-riblã waoong kolgame, la b waame n sa.

³⁰ Mam yeta yãmb sɩda, tɩ zamaan kãngã kõn looge, hal tɩ bõn-kãens fãa paam pidsgu.

³¹ Yĩngr la tẽng na looge, la mam goamã kõn tol n loog ye, abada.

³² Sã n yaa ne da-kãng daare la a wakatã, ned baa a yen ka mi ye: Malegs sẽn be arzãn ka mi, bi-riblã me ka mi. Yaa m ba bal n mi.

³³ Gũus-y neere. Neend-y, tɩ bõe, yãmb ka mi wakat ninga ra-kãng sẽn na n wa ye.

³⁴ A na n yɩɩ wa rao sẽn togd sore, n bas a yir ne a tʋmtʋmdbã, n wilg ned kam fãa a tʋʋmde la a yeel zag-no-gũudã t'a gũ.

³⁵ Woto yĩnga, neend-y, tɩ yãmb ka mi wakat ning yirã soab sẽn na n wa wã ye. Tõe n yɩɩ zĩ-sobdo, wall yʋʋn-sʋka, wall no-kɛleng wakate, wall yibeoogo.

³⁶ Maan-y rabeem tɩ b ra ling n wa n mik tɩ yãmb gõeeme ye.

³⁷ Bũmb ning mam sẽn yet yãmbã, mam yet-a-la neba fãa: Neend-y-yã.