A Mark Sõng 12 - KÃAB-PAALGÃ KOE-NOOGO

Nasaar sib pʋʋg koaadb yel-bũndi

¹ Dẽ poore, a Zezi sɩngame n tão bãmb yel-bũnd n yeele: Dao a yen n da sel a nasaar sib tɩɩse, n wẽ yãgr n gũbg-a, n tuk divẽ wẽkr boko la a me gãosgo. La yẽ gũnug-a-la ne sib koaadba la a bas n tog sore.

² La bõn-bɩʋʋng sẽn ta, yẽ tʋma tʋmtʋmd sib koaadbã nengẽ t'a tɩ reeg a pʋɩɩr n wa n kõ-a.

³ La bãmb yõka yẽnda n pãbe, n dig-a t'a lebg a nug-zaala.

⁴ La yẽ leb n tʋma tʋmtʋmd a to bãmb nengẽ, la b pãba yẽ zugã n yaal-a.

⁵ Yẽ tʋma a tãab soaba, la b kʋʋ yẽnda. La yẽ tʋma neb a taab wʋsgo, la b pãba kẽere, n kʋ kẽere.

⁶ Nin-yend tãa n da ket yẽ sẽn tõe n tʋme: A bi-ribl nongre. Yẽ yaool n tʋma yẽnda n tagsdẽ: B na n waooga mam biigã.

⁷ La sib koaadb kãens yẽsa ne taab n yeele: Yaa yõwã n na n soog a ba wã paoongã. Wa-y tɩ d kʋ-a tɩ paoongã lebg tõnd dẽnda.

⁸ La bãmb yõka yẽnda n kʋ, n yiis-a nasaar sibã pʋʋgẽ n lob kɛɛnga.

⁹ Woto wã, nasaar sib pʋʋgã soab na n maana bõe? Yẽ na n waame n kʋ sib koaadb kãense, la a rɩk pʋʋgã n gũnug koaadb a taaba.

¹⁰ Yãmb nan ka karem gʋls-sõmyã koe-kãngã laa? Kugr ninga tãn-metbã sẽn zãgsã lebga roogã pãng kugri, a soakã zĩigẽ wã.

¹¹ Yaa Zu-soabã n kɩt t'a yɩ a woto, la a yaa bõn-kãseng tõnd nifẽ.

¹² Maan-kʋʋdbã kãsem-dãmbã ne tõog karen-saam-dãmbã la kãsem-dãmbã da rat n yõka a Zezi, la b zoee kʋʋngã. B bãngame tɩ yaa bãmb yell la a Zezi gom yel-bũndã pʋgẽ. La b basa a Zezi n looge.

Zemsame tɩ yao Sezaar yõor yaoodo?

¹³ Bãmb tʋma Fariisẽ-dãmba kẽer ne Herood poorẽ dãmb kẽer tɩ b tɩ maan sɩlem n kɩt t'a Zezi gom n yõk b meng n kõ-ba.

¹⁴ B waa n yeela a Zezi a woto: Karen-saamba, tõnd miime tɩ yãmb yaa sɩd soaba, la tɩ yãmb ka zoet ned baa a yen: Bala, yãmb ka tũusd neb ye. La yãmb zãmsda nebã Wẽnnaam sorã ne sɩda. Dẽ yĩnga, a zemsa ne tõnd tõogã tɩ yao Sezaar yõor yaood bɩ a ka zemse? Tõnd tog n yaoome bii, bɩ d ka tog n yao?

¹⁵ A Zezi sẽn mi b zãmbã leoka bãmb yaa: Yaa bõe tɩ yãmb makd maam? Wa-y ne lagf a yen tɩ m gese.

¹⁶ La b talla a yen n wa n kõ bãmba. La a Zezi sok-b lame yaa: Maasmã ne yʋʋrã yaa ãnna rẽnda? Bãmb leokame tɩ yaa Sezaar rẽnda.

¹⁷ Dẽ, a Zezi yeela bãmb yaa: Lebs-y Sezaar bũmb nins Sezaar sẽn so, la y lebs Wẽnnaam bũmb nins Wẽnnaam sẽn so. A Zezi leokrã yɛɛsa bãmba.

Sokr kũum vʋʋgr poorẽ

¹⁸ Saduusẽ-dãmba sẽn yet tɩ kũum vʋʋgr ka be wã waa a Zezi nengẽ n sok bãmb a woto:

¹⁹ Karen-saamba, a Moyiis ra gʋlsame n yeel tõnd tɩ: “Ned sã n ki n bas a paga, n ka tar biiga, bɩ a ba-biig reeg a pagã n dog kamb a ba-biigã yĩnga.”

²⁰ Raop a yopoe n da be n ya ba-biisi. Kẽem soabã peega paga, la a kiime n ka paam biig ye.

²¹ Yiib soabã reega pʋgkõorã, la yẽnda me kiime n ka paam biig ye. Tãab soaba me yɩɩ a woto.

²² Bãmb b yopoe wã ned baa a yen ka paam biig ye. Bãmb fãa sẽn ki, pagã me yaool n kiime.

²³ Kũum vʋʋgr wakate, pagã na n yɩɩ ãnna soab paga? Bala, yẽ yɩɩ bãmb b yopoe wã fãa paga.

²⁴ A Zezi leoka bãmba: Ka yãmb sẽn ka wʋmd gʋls-sõamyã, wall Wẽnnaam pãngã võor yĩng la yãmb tudg-y sɩda?

²⁵ Tɩ bõe, kũum vʋʋgr wakate, raop ka na n le rɩgs pagba, pagb me ka na n kuil sɩdba: Bãmb na n yɩɩ wa malegsã sẽn be arzãnã.

²⁶ La ne kũum vʋʋgrã yelle, yãmb nan ka karem a Moyiis sebrẽ wã, Wẽnnaam sẽn gom ne a Moyiis to-to, tuugã sẽn wit bugma sɛɛgẽ wã n yeele tɩ: “Mam yaa a Abraham Wẽnnaam, a Izak Wẽnnaam la a Zakob Wẽnnaam” laa?

²⁷ Wẽnnaam ka kũum Wẽnnaamã ye b yaa nin-vɩɩse Wẽnnaam. Ad yãmb tudgrã yaa kãsenga!

Tõog sẽn ya kãseng n yɩɩda

²⁸ Tõog karen-saamb a yembr sẽn wʋm bãmb goama, la a sẽn yã t'a Zezi leoka bãmba ne yam, a kolgame n sok bãmb yaa: Tõodã fãa sʋka, bʋg n yɩɩda?

²⁹ A Zezi leokame n yeele: Ad tõog ning sẽn yɩɩd-a wã: “Israyɛl dãmba, kelg-y-yã. Zu-soaba, tõnd Wẽnnaamã yaa Zu-soab b yen tãa.

³⁰ Nong Zu-soaba fo Wẽnnaam ne f sũur fãa la f ratem fãa la f yam fãa la f pãng fãa.”

³¹ Tõog ninga sẽn pʋgd-a yẽ la woto: “Nong f to wa f menga.” Tõog ka be sẽn yɩɩd bãmba ye.

³² Tõog karen-saambã yeela bãmb yaa: Karen-saamba, y gomd yaa sɩda. Wẽnnaam sɩd yaa b yen tãa, la a to ka be kal bãmb bala,

³³ la tɩ nong bãmb ne f sũur fãa la f yam fãa la f pãng fãa, la tɩ nong f to wa f menga, a yɩɩda maand sẽn yõogd bugum la maand buud a taabã fãa.

³⁴ A Zezi sẽn yã tɩ yẽ leoka ne yam, b yeel-a lame: Fo ka zãr ne Wẽnnaam soolem ye. La ned baa a yen ka saag n le sok bãmb bũmb ye.

Kirist yaa ãnna biiga?

³⁵ A Zezi sẽn zãmsd nebã wẽnd-doogẽ wã, b sokame: Yɩta a wãn tɩ tõog karen-saam-dãmbã yetẽ tɩ Kirist yaa a Daviid biiga?

³⁶ Sɩɩg-sõng kɩtame t'a Daviid meng yeel tɩ: “Zu-soaba yeela mam Zu-soaba yaa: Zĩnd mam dɩtgo, hal tɩ m kɩt tɩ f tab f bɛɛbã n zĩẽ.”

³⁷ A Daviid meng boonda bãmb tɩ Zu-soaba. Dẽ, bãmb na n yɩɩ a wãn n le yɩ a Daviid biiga? La neb kʋʋng wʋsg kelga bãmb ne sũ-noogo.

A Zezi gomda tõog karen-saam-dãmbã yelle

³⁸ Zãmsgã pʋgẽ, a Zezi yeela nebã yaa: Gũus-y y mens ne tõog karen-saam-dãmbã sẽn nong n gõ ne fu-bɛda, n dat tɩ nebã pʋʋsd bãmb raas pʋsã.

³⁹ Bãmb baooda waoogr zaoods karen-dotẽ la rɩɩb zĩisẽ.

⁴⁰ Bãmb gʋsda pʋgkõap paoongo, la b pʋʋsd pʋʋs-wogd nebã gesg yĩnga. Bãmb na n paama sɩbgr sẽn ya toog n yɩɩd a taabã.

Pʋgkõor kõo kũuni

⁴¹ A Zezi zĩndame n tees b neng ligdã koglgã, n get kʋʋngã sẽn ningd ligdã be wã. Arzegs rãmb wʋsg ninga ligd wʋsgo.

⁴² Pʋgkõor a yen sẽn ya naong soab n wa n ning lagd-bõoneg sẽn zem tãma.

⁴³ La a Zezi boola b karen-biisã n yeel-ba: Mam yeta yãmb sɩd-sɩd tɩ pʋgkõ-kãngã sẽn ya naong soabã kõome n yɩɩd neba fãa sẽn ning ligd ligdã koglgẽ wã.

⁴⁴ Tɩ bõe, bãmb ned kam fãa tʋm n yõngame n ningi, la yẽ sẽn ka tarã, a pɩɩsa a meng zãng n kɩse, hal a rɩɩb ligdi.