A Mark Sõng 11 - KÃAB-PAALGÃ KOE-NOOGO

A Zezi kẽeda Zeruzalɛm ne waoogre

¹ Bãmb sẽn kolg Zeruzalɛm n pẽneg Bɛtfaaze la Betani, oliiv tɩɩs tãngã sẽne, a Zezi tʋma b karen-biis a yiib n yeel-b yaa:

² Kẽng-y tẽng ninga sẽn be-a yãmb taoorã. Yãmb sã n kẽ tẽngã bala, y na n yãa bõn-bil sẽn loe, ned sẽn nan ka zomb-a ye. Lok-y-yã-a n wa-ne ka.

³ Ned sã n sok yãmb tɩ yaa bõe tɩ yãmb maand a woto? Bɩ y leok-a tɩ yaa Zu-soabã n dat-a, la bãmb na n kɩtame tɩ b leb n tall-a n wa ka moas-moasã bala.

⁴ Bãmb karen-biisã kẽngame n tɩ yã bõn-bil sẽn loe zak noore, sorã kɩrenga, la bãmb lok-a lame.

⁵ Neb kẽer sẽn be be soka bãmb yaa: Yãmb maanda bõe? Yaa bõe tɩ yãmb lokd bõn-bilã?

⁶ Bãmb leoka wa a Zezi sẽn da yeel bãmbã, la b basa bãmb tɩ b looge.

⁷ Bãmb waa ne bõn-bilã a Zezi nengẽ, n palg-a b futu, la a Zezi zomb-a lame.

⁸ Neb wʋsg yɛɛda b fut sorã zugu, tɩ kẽer gãneg tɩɩs vãad b sẽn kao pʋt pʋsẽ.

⁹ Neb nins sẽn be a Zezi taoorã ne neb nins sẽn pʋgd bãmbã kelmame n yeele: Hozaana! Bark bee ned ning sẽn wat ne Zu-soaba yʋʋrã zugu!

¹⁰ Bark bee soolem ning sẽn wat-a wã, tõnd ba a Daviid soolmã zugu. Hozaana hal saasẽ!

¹¹ A Zezi taa Zeruzalɛm n kẽ wẽnd-doogẽ wã. La bãmb sẽn ges bũmbã fãa n sa, rẽ tɩ zĩigã sobgame. La b yii be ne b karen-biisã piig la a yiibã n kẽng Betani.

Kankang paama kãab-wẽnga

¹² Vẽkembeoog yibeoogo, bãmb sẽn yit Betani, kom da tara a Zezi.

¹³ La b sẽn tool n yã kankang sẽn tar vãad yɩɩga, bãmb kẽngame n na n tɩ ges b sã n na paam bũmb beene. La b sẽn kolge, b ka yã bũmb ye, yaa vãad bala: Bala, kankam wakat nan ka ta ye.

¹⁴ Dẽ, bãmb yeela kankangã yaa: Ned kõn leb n dɩ fo biis yɛs ye, abada. La bãmb karen-biisã wʋmame.

A Zezi riga koaasdb wẽnd-doogẽ wã

¹⁵ Bãmb taa Zeruzalɛm, la a Zezi sẽn kẽ wẽnd-doogã zakẽ, b sɩngame n dig neb nins sẽn koosda, wall b raad beene wã. La b leeba ligd tekdbã taabl-dãmba la wan koaasdbã goeelse.

¹⁶ La bãmb ka sak tɩ ned baa a yen zã teoog n pɩʋʋg wẽnd-doogã zak ye.

¹⁷ La bãmb zãmsa nebã n yeele: Rẽ yĩnga, b ka gʋls tɩ “b na n boola mam doogã tɩ pʋʋsg roog buud fãa yĩng” sɩda? La yãmb maan-a lame t'a lebg wagda geongo.

¹⁸ Maan-kʋʋdbã kãsem-dãmbã ne tõog karen-saam-dãmbã wʋma a Zezi gomdã, la b baoo sor ning b sẽn na n tũ n kʋ-ba. Bãmb dag n zoeta a Zezi, bala, b zãmsgã ra kẽe neb kʋʋngã sõama.

¹⁹ La zĩ-sobd sẽn ta, a Zezi yii tẽngã ne b karen-biisã.

Kankangã kʋɩɩme

²⁰ La yibeoogo, bãmb sẽn loogda, b yãa kankangã sẽn kʋɩ ne a yẽgã fãa.

²¹ A Pɩyɛɛr sẽn tẽeg bũmb ninga sẽn dag n maanã, a yeela a Zezi yaa: Karen-saamba, ges-y-yã! Kankangã yãmb sẽn dag n kãab wẽngã, a kʋɩɩme.

²² A Zezi yeela bãmba: Maan-y tẽeb ne Wẽnnaam.

²³ Mam yeta yãmb sɩda, tɩ ned sã n yeel tãn-kãngã t'a serg a sẽn beẽ wã n kẽ ko-kãsengã pʋga, la a sã n ka sãmb a sũurã pʋgẽ, la a sã n tẽ tɩ bũmb ning yẽ sẽn yeelã na n yɩɩme, Wẽnnaam na n kɩtame tɩ yɩ a woto.

²⁴ Yaa woto yĩnga, mam yeta yãmba: Bũmb ning fãa yãmb sẽn na pʋʋs n kose, bɩ y tẽ tɩ y reeg-a lame, la yãmb na yã t'a pidsame.

²⁵ Yãmb sã n yas yĩngr n pʋʋsdẽ, yãmb sã n tara yell ne neda, bɩ y kõ-a sugri, tɩ yãmb ba sẽn be arzãnã me kõ yãmb sugr y beegrã yĩnga. [

²⁶ La yãmb sã n ka maan sugri, yãmb ba sẽn be arzãnã me kõn maan yãmb sugr ne y beegrã ye.]

A Zezi reega b noorã yɛɛne?

²⁷ Bãmb leb n kẽnga Zeruzalɛm yɛsa, la a Zezi sẽn gõod wẽnd-doogẽ wã, maan-kʋʋdbã kãsem-dãmbã ne tõog karen-saam-dãmbã, ne kãsem-dãmbã waa bãmb nengẽ n sok-b yaa:

²⁸ Yãmb maanda bõn-kãens ne no-bʋgo, la ãnna n kõ yãmb noor tɩ y maane?

²⁹ A Zezi leoka bãmb yaa: Mam na n soka yãmb sokr a yembre. Leok-y maam tɩ mam na yaool n togs yãmb mam sẽn paam noorã zĩig ning n maand bõn-kãensã.

³⁰ A Zã lisgã yii arzãn bii, bɩ ninsaalb nengẽ? Leok-y maam.

³¹ La bãmb yẽsa ne taab a woto: Tõnd sã n leok t'a yii arzãna, bãmb na n yeelame tɩ la yaa wãn tɩ tõnd ka tẽ-a?

³² La tõnd sã n yeel t'a yii ninsaalb nengẽ, ha! Bãmb dag n zoeta nebã, bala, nebã ra tẽedame t'a Zã sɩd yaa Wẽnnaam no-rɛɛs hakɩɩka.

³³ Dẽ, bãmb leoka a Zezi tɩ b ka mi ye. La a Zezi yeela bãmba: Mam me kõn togs yãmb mam sẽn paam noorã zĩig ning n maand bõn-kãensã ye.