A Mark Sõng 1 - KÃAB-PAALGÃ KOE-NOOGO

A Zãmbatiis koe-moonego

¹ Koe-noog ninga sẽn togsd a Zezi Kirist sẽn ya Wẽnnaam Bi-riblã yɛlã sɩngr la a woto.

² A zemsa wa Wẽnnaam no-rɛɛs a Ezayi sẽn gʋlsã: Ade, mam tʋmda m koe-toagsd t'a reng fo taoor n maneg f sorã.

³ Yaa yẽ koɛɛg n kelemd we-rasempʋɩɩgã pʋgẽ n yetẽ: Maneg-y Zu-soaba sore, rems-y bãmb so-bugsã tɩ yɩ tɩrse.

⁴ A Zã ra bee weoogẽ n lisd nebã la a moondẽ n yetẽ tɩ b tek yam n deeg lisg b yel-wẽna sugr yĩnga.

⁵ Zude rãmba ne Zeruzalɛm dãmba yitame n kẽngd yẽ nengẽ, n vẽnegd n togsd b yel-wẽna t'a lisd bãmb Zʋrdẽ kʋɩlga pʋgẽ.

⁶ A Zã futã ra wʋga ne yʋgemd kõbdo. A sẽbdgã ra yaa gãongo, la a rɩɩb ra yaa sʋya la weoog sɩɩdo.

⁷ Yẽ ra moondame n yetẽ: Ned sẽn yɩɩd maam n na n pʋgl maam n wa. Mam pʋs n pa zems tɩ zõond n lok bãmb neooda loets ye.

⁸ Mam lisa yãmb koomẽ, la bãmb na n lisa yãmb Sɩɩg-sõng pʋgẽ.

A Zezi reega koom lisgu

⁹ Wakat kãnga, a Zezi yii Galile Nazarɛt n wa, la a Zã lisa bãmb Zʋrdẽ kooma pʋgẽ.

¹⁰ La b sẽn yit koomẽ wã, b yãa yĩngr sẽn pake, la Sɩɩg-sõng sẽn wẽnd wall sẽn sigd bãmb zugu.

¹¹ Koɛɛg zĩnda saasẽ n yeele: Fo yaa mam Bi-ribl-nongr sẽn ta mam yam zãnga.

Sʋtãana maka a Zezi

¹² Tao-tao bala, Sɩɩgã kɩtame t'a Zezi kẽng we-rasempʋɩɩgẽ.

¹³ Bãmb paa be rasem pis-naas tɩ Sʋtãanã mak bãmba. B ra bee be ne we-rũmsi, la malɛk-rãmb ra sõngda bãmba.

A Zezi tʋʋm sɩngre

¹⁴ B sẽn kẽes a Zã bi-bees roogã zugẽ, a Zezi kẽnga Galile n tɩ moond koe-noogã n yetẽ:

¹⁵ Wakat taame, la Wẽnnaam soolem kolgame. Tek-y yam n bas y yel-wẽna la y tẽ koe-noogã.

A Zezi boola zĩm-yõagdb a naase

¹⁶ Bãmb sẽn tũud Galile mogrã noore, bãmb yãa a Sɩmo ne a ba-biig a Ãndre tɩ b lobd zĩm-gãmbr mogrã pʋgẽ. Bala, b ra yaa zĩm-yõagdba.

¹⁷ A Zezi yeel-b lame yaa: Wa n tũ-y maam, tɩ m na n kɩtame tɩ y lebg nin-baoodba.

¹⁸ Bãmb basa b zĩm-gãmba wã tao-tao n tũ a Zezi.

¹⁹ Bãmb sẽn kẽng taoor bilfu, b yãa a Zebde kom-dibli a Zak ne a ba-biig a Zã. Bãmb me ra bee koom-koglgẽ n tõgd b zĩm-gãmba.

²⁰ Tao-tao bala, a Zezi boola bãmba, la b basa b ba a Zebde koglgã pʋgẽ ne tʋmtʋmdbã n tũ bãmba.

A Zezi maaga rao zĩn-dẽgd sẽn tara

²¹ A Zezi ne b karen-biisã kẽnga Kapɛrnawom. La Zuif-rãmbã vʋʋsg daarã sẽn ta, a Zezi kẽe karen-doogẽ wã n sɩng n zãms nebã.

²² Bãmb zãmsgã yɛɛsa nebã, bala, b zãmsa ne noore, la ka wa tõog karen-saam-dãmbã ye.

²³ La rao a yen n da be bãmb karen-doogẽ wã tɩ zĩn-dẽgd tar-a. A kelmame n yeele:

²⁴ Zezi sẽn yit Nazarɛt, yãmb toor bee ne tõndo? Yãmb waame n na n sãam tõnd laa? Mam bãnga yãmb sẽn ya ned ninga. Yãmb yaa Wẽnnaam sõmblem soaba.

²⁵ A Zezi leng-a lame n yeele: Sĩnd la f yi n bas rao wã.

²⁶ Zĩn-dẽgdã kelma ne pãnga, n yi n bas rao wã t'a rigd wʋsgo.

²⁷ Neba fãa yɛɛsame n sok taaba: Bõn-kãnga yaa bõe? Koe-paalga! B tãsda zĩn-dãmb mens hal tɩ b sakd-ba.

²⁸ Tao-tao bala, bãmb yʋʋr saaga zĩiga fãa Galile soolmẽ.

A Zezi maaga a Pɩyɛɛr reem-poaka

²⁹ A Zezi ne b karen-biisã sẽn yi karen-doogẽ wã, a Zezi ne a Zak la a Zã kẽnga a Sɩmo ne a Ãndre rãmb zakẽ.

³⁰ A Sɩmo reem-poakã yĩns ra wɩngame t'a gãeyã. La a Zezi sẽn ta bala, b togs-b lame.

³¹ Bãmb kolgame n gãd a nug n sõng-a t'a yiki, la wakat kãng bala, a yĩn-wɩngrã sigame t'a yik n maan-b sãando.

A Zezi maaga neb wʋsg zĩ-sobdo

³² La zĩ-sobdo, wĩndgã lʋɩɩs poore, neba talla bãad-dãmba fãa ne neb nins zĩn-dãmb sẽn tarã n wa a Zezi nengẽ.

³³ La tẽngã nebã tigma taab roogã noore.

³⁴ A Zezi maaga neb wʋsgo, bãas buud toay-toay sẽn da tara. Bãmb diga zĩn-dãmb wʋsg me n ka sak tɩ b gom ye, bala, zĩn-dãmba da mii bãmba.

A Zezi kẽnga koe-moonego

³⁵ A Zezi sãda beoogo, tɩ zĩigã ket n ya lika, n kẽng zĩig neb sẽn ka be n tɩ pʋʋse.

³⁶ A Sɩmo ne neb nins sẽn be ne yẽ wã baoo bãmba.

³⁷ La b sẽn yãnd a Zezi, b yeel-b lame yaa: Neba fãa baooda yãmba.

³⁸ La a Zezi leoka bãmba: Wa-y tɩ d kẽng tẽn-kɩremse, tɩ m tɩ moon koe-noogã beene me, tɩ yaa rẽnda yĩng la m wa-yã.

³⁹ Bãmb saaga Galile n moon koe-noogã karen-dotã pʋse, la b rig zĩn-dãmba.

A Zezi maaga yĩng soaba

⁴⁰ Ned a yen yĩn-gãong bãag sẽn tar n wa a Zezi nengẽ n yĩgimd n bõos bãmb ne nimbãaneg n yeele: Yãmb sã n data, y tõe n maaga maam tɩ m yɩ yɩlemde.

⁴¹ Rao wã nimbãaneg yõka a Zezi tɩ b tẽeg b nug n sɩɩs-a n yeele: Mam datame, lebg yɩlemde.

⁴² Wakat kãng bala, yĩn-gãongã bãag loog n bas-a lame t'a lebg yɩlemde.

⁴³ A Zezi yeel-a-la tao-tao t'a looge, n keoog-a neer n yeele:

⁴⁴ Yõk f noor n da yeel ned tɩ bũmb ye. La f kẽng n tɩ wilg f meng maan-kʋʋdã, la f maan maoong ning a Moyiis sẽn wilgã, f yɩlgr yĩnga, t'a yɩ kaset neba yĩnga.

⁴⁵ La rao wã sẽn looge, a puka yellã n moone, hal t'a Zezi ka le tõe n kẽ tẽngẽ tɩ ka yɩ ne soosg ye. Bãmb zĩnda zĩis neb sẽn ka be, la neb ra yita zĩiga fãa n wat bãmb nengẽ.