A Luk Sõng 9 - KÃAB-PAALGÃ KOE-NOOGO

A Zezi tʋma karen-biis piig la a yiibu

¹ A Zezi tigma karen-biis piig la a yiibã n kõ-b pãnga la noor tɩ b tõog zĩn-dãmba, la pãn-tõog tɩ b maag bãad-dãmba.

² A Zezi tʋm-b lame tɩ b tɩ moon Wẽnnaam soolem koɛɛga, la b maag bãad-dãmba.

³ A Zezi yeel-b lame yaa: Da rɩk-y bũmb y kẽnda yĩng ye. Da rɩk-y da-saare, korgo, buri wall ligd ye. La y ra zã fut a yiib yiib ye.

⁴ Yãmb sẽn sig zak ning pʋgẽ, bɩ y pa be n ta y sẽn na n yi be n looge.

⁵ La zĩig ning fãa nebã sẽn ka reeg yãmba, y sã n wa n yit tẽn-kãnga, bɩ y pĩms y nao wã tom tɩ yɩ kaset b yĩnga.

⁶ A Zezi karen-biisã loogame n kẽng tẽng tẽnga, n moond koe-noogã, la b maagd neb zĩiga fãa.

A Zãmbatiis kũum

⁷ Naab a Herood da wʋma bũmb nins fãa sẽn da maandã, la a da ka mi yẽ sẽn na n tags tɩ bũmb ning ye. Bala, neb kẽer da yetame t'a Zã vʋʋgame n yi kũum sʋka,

⁸ tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye n vʋʋge.

⁹ La Herood yeelame: Mam kɩtame tɩ b fiuug a Zã zugu. Dẽ, ned ning mam sẽn wʋmd tɩ b gomd a yell woto wã yaa ãnna soaba? La yẽ ra baoodame n dat n yãnd a Zezi.

A Zezi dɩlga neb tus a nu

¹⁰ Tẽn-tʋmdbã sẽn lebg n wa, b togsa a Zezi bũmb nins fãa bãmb sẽn maanã. A Zezi peega bãmb n yi kɛɛng n kẽng tẽng a yen sẽn boond tɩ Betsayida sẽne.

¹¹ La neb kʋʋngã bãngame n pʋg bãmba. A Zezi reeg-b lame n gom ne-b Wẽnnaam soolem yelle, la b maag neb nins sẽn dag n dat maagrã me.

¹² Wĩndgã sẽn kɩlle, karen-biis piig la yiibã kolgame n yeel a Zezi yaa: Kɩt-y tɩ neb kʋʋngã loog n kẽng tẽn-bõonegẽ wã ne pʋtã sẽn pẽ ka wã n tɩ paam gãag zĩisi, la b paam dɩɩbo. Bala, tõnd sẽn beẽ wã yaa we-rasempʋɩɩga.

¹³ A Zezi yeela karen-biisã tɩ bãmb mensã kõ nebã rɩɩb tɩ b rɩ. La b leokame n yeele: Tõnd ka tar sẽn yɩɩd bur a nu ne zĩm a yiib ye. Sã n ka tɩ tõnd mens na n kẽngame n tɩ ra rɩɩb nin-kãensã fãa yĩnga.

¹⁴ La nebã sẽn da be be wã kolga raop tus a nu. A Zezi yeela b karen-biisã tɩ b kɩt tɩ neba zĩnd sull-sulli, neb pis-nunu.

¹⁵ Karen-biisã maana a woto n kɩt tɩ b fãa zĩndi.

¹⁶ A Zezi reega bur a nu wã ne zĩm a yiibã n nak n ges yĩngr n ning-b barka, n yaool n kao burã ne zĩma n kõ karen-biisã tɩ b pʋɩ neb kʋʋngã.

¹⁷ Bãmb fãa rɩɩme n tɩge, la b wʋka gɩrsã sẽn kellã n pid pet piig la a yiibu.

A Pɩyɛɛr kaseto

¹⁸ Daar a ye, a Zezi ra bee zĩig neb sẽn ka be, n pʋʋsdẽ, la karen-biisã ra bee ne bãmba. A Zezi soka b karen-biisã yaa: Neb kʋʋngã yetame tɩ mam yaa ãnna?

¹⁹ Bãmb leokame tɩ kẽer yetame t'a Zãmbatiis, tɩ kẽer yetẽ t'a Eli, tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye sẽn vʋʋge.

²⁰ La a Zezi soka bãmb yaa: La yãmba, yãmb yetame tɩ mam yaa ãnna? A Pɩyɛɛr leokame tɩ bãmb yaa Kirist sẽn yi Wẽnnaam nengẽ.

²¹ A Zezi keooga bãmb neere, n yeel-b tɩ b ra saag n togs ned yõwã ye.

A Zezi togsa bãmb kũum yelle

²² A Zezi gomame n paas n yeel tɩ yaa tɩlɛ tɩ Ninsaal Bi-riblã nams wʋsgo, tɩ kãsem-dãmbã ne maan-kʋʋdbã kãsem-dãmba la tõog karen-saam-dãmbã kɩɩs bãmba n kʋ-ba, la tɩ rasem a tãab daare bãmb na vʋʋge.

²³ Dẽ, a Zezi yeela b fãa yaa: ned sã n dat n tũ maam, bɩ a kɩɩs a mengã ratem, n tʋk a da-pɩk daar fãa n pʋg maam.

²⁴ Sɩd me, ned ning fãa sẽn dat n kogl a vɩɩm, a vɩɩm na sãame. La ned ning sẽn na n bas a vɩɩm mam yĩnga, a na n le paam-a lame.

²⁵ Ned sã n paam dũni bũmb fãa, n yaool n menem wall a sãam a menga, a yõod bee yɛ ne-a?

²⁶ Sɩd me, ned sã n zoe mam yãnde la mam goama yãnde, Ninsaal Bi-riblã sã n wa n wa ne b ziirã, la b ba wã ziiri, ne malegs-sõamyã, b na n zoee yẽ me yãnde.

²⁷ Mam yeta yãmb sɩd-sɩd tɩ neb nins sẽn be ka wã kẽer ka na n ki hal tɩ b yãnd Wẽnnaam soolmã.

A Zezi neng tedgre

²⁸ Sẽn kolg rasem a nii, a Zezi sẽn gom gom-kãensã zugẽ, bãmb peega a Pɩyɛɛr ne a Zã la a Zak n dʋ tãngã zug n na n pʋʋse.

²⁹ La bãmb sẽn pʋʋsd wakate, b nengã yalẽ tedgame, la bãmb futã lebga peels n pɩnda.

³⁰ La gese, raop a yiib n wa n gom ne a Zezi. Dag n ya a Moyiis ne a Eli,

³¹ n puk b meng ne ziiri, n gomd ne a Zezi b kũuma b sẽn na n ki Zeruzalɛma yelle.

³² Gõeem ra namsda a Pɩyɛɛr ne a tũud-n-taasã, la bãmb neendame n yãnd a Zezi ziirã ne raop a yiibã sẽn da be ne bãmbã.

³³ Wakat ning raopã sẽn bas a Zezi n loogdẽ wã, a Pɩyɛɛr yeela a Zezi yaa: Karen-saamba, yaa sõama tɩ tõnd pa ka. D tilg fu-rot a tãabo: a yembr yãmb yĩnga, a yembr a Moyiis yĩnga, a yembr a Eli yĩnga. Yẽ ra ka mi a sẽn gomd bũmb ningã ye.

³⁴ La yẽ sẽn gomd a woto, sawadg waa n luda bãmba, la a Moyiis rãmb sẽn kẽed sawadgẽ wã, rabeem yõka bãmba.

³⁵ La koɛɛg yii sawadgẽ wã n yeele: Ada yaa mam Bi-ribl mam sẽn yãke, bɩ y kelg-a.

³⁶ La koɛɛgã sẽn gom a woto n sɛ, a Zezi ra yɛsa b yembre. Karen-biisã kell n sĩndame n ka togs ned bũmb ning bãmb sẽn yã wã da-kãens ye.

A Zezi maaga biig zĩn sẽn tara

³⁷ Vẽkembeoogo, bãmb sẽn yi tãngã zug n sigi, neb kʋʋng wʋsg waa n sega a Zezi.

³⁸ La gese, neb kʋʋngã sʋka, dao a ye n zĩnd be n zẽk a koɛɛg n yeele: Karen-saamba, m kot-y lame tɩ y ges m bi-riblã. Bala, yaa m bi-yende.

³⁹ Zĩn n kẽed-a, la a sã n kẽ-a bala, a kelemdame, la zĩna kɩtdame t'a sobg n gʋɩgsdẽ, tɩ tãntãn-puudã yita. A sã n na n wa n yi n bas biigã, rẽ t'a nams-a-la wʋsgo, n pogl-a.

⁴⁰ Mam bõosa yãmb karen-biisã tɩ b rig-a, la b ka tõog ye.

⁴¹ A Zezi yeelame yaa: Neb sẽn ka tẽebo, la sẽn ya nin-wẽnse, mam na n paa ne yãmb la m maan sũ-mar ne yãmb tɩ ta wakat bʋgo? Tall f biigã n wa ne ka.

⁴² La biigã sẽn kolgdã, zĩna lub-a-la tẽnga, n nams-a wʋsgo. La a Zezi lenga zĩn-dẽgdã, n maag biigã n kɩs-a a ba.

⁴³ La neba fãa yɛɛsame, b sẽn yã Wẽnnaam pãn-kãsengã yĩngã. Nebã sẽn ket n tagsd bũmb nins fãa a Zezi sẽn maanã yell ne yɛɛsgo, a Zezi yeela b karen-biisã yaa:

A Zezi leb n goma b kũuma yelle

⁴⁴ Yãmba, yok-y y tʋb n kelg gom-kãensã sõama: b na n yõka Ninsaal Bi-riblã n kõ neba.

⁴⁵ La karen-biisã ra ka wʋmd gom-kãng võor ye. A ra solga ne bãmba, sẽn na n yɩlg tɩ b ra bãng a võorã ye. La b ra yɛɛsdame n ka rat n sok a Zezi bõn-kãng wɛɛngẽ ye.

Ãnna n ya kãseng n yɩɩda?

⁴⁶ No-koeemd yika bãmb sʋka, tɩ b rat n bãng sẽn ya-a kãseng n yɩɩd bãmb sʋkã.

⁴⁷ A Zezi sẽn mi bãmb sũyã tagsgã, b peega bi-bilf n zĩnig-a b sɛɛgẽ

⁴⁸ n yeel karen-biisã yaa: ned ning fãa sẽn na n deeg bi-bilf kãngã mam yʋʋrã yĩnga, yaa mam mengã la a reeg-yã. La ned ning fãa sẽn deeg maam, a reegda sẽn tʋma maamã. Bala, ned ning sẽn ya-a yao-zʋʋg yãmb sʋkã, yaa yẽ soab n ya kãsenga.

Ned ning sẽn ka kis yãmb yaa yãmb dẽnda

⁴⁹ A Zã gomame n yeele: Karen-saamba, tõnd yãa rao sẽn digd zĩn-dãmb ne yãmb yʋʋre, la tõnd gɩdg-a lame, a sẽn ka naag tõnd n tũud yãmbã yĩnga.

⁵⁰ A Zezi leok-a lame n yeele: ra gɩdg-a ye. Bala, ned sã n ka kis yãmba, a bee ne yãmba.

A Zezi lenga a Zak ne a Zã

⁵¹ Wakat ning b sẽn tog n zẽk a Zezi tɩ b kẽng arzãnã sẽn kolge, bãmb tolg n yãka yam n na n kẽng Zeruzalɛm.

⁵² B tʋma neb tɩ b reng bãmb taoore. La b kẽngame n tɩ kẽ Samari n na n segl bũmb fãa a Zezi yĩnga.

⁵³ La neba ka reeg a Zezi ye, bãmb sẽn dag n dabd Zeruzalɛma yĩnga.

⁵⁴ Bãmb karen-biis a Zak ne a Zã sẽn yã woto, b yeelame yaa: Zu-soaba, yãmb datame tɩ d kɩt tɩ bugum yi yĩngr n sig n dɩ-ba?

⁵⁵ La a Zezi wẽnemdame n leng bãmb [n yeele: yãmb ka mi sɩɩg ning sẽn tar yãmbã ye.

⁵⁶ Bala, Ninsaal Bi-riblã ka wa tɩ sãam ninsaalbã vɩɩm ye, la yaa tɩ fãag-ba.] La bãmb kẽnga tẽng a to.

Ned sã n dat n yɩ a Zezi karen-biiga

⁵⁷ Bãmb sẽn be sorẽ n dabda, ned n yeel a Zezi t'a na n tũu bãmb n kẽng zĩig ning fãa bãmb sẽn na n kẽnge.

⁵⁸ A Zezi leok-a lame tɩ waas tara bogdo, la liuuli sẽn yɩgda tara tʋgdo, la Ninsaal Bi-riblã ka tar zĩig sẽn na n gãneg a zug ye.

⁵⁹ A Zezi yeela ned a to t'a tũ bãmba. La yẽ leoka a Zezi yaa: bas-y-m nand tɩ m tɩ mum m ba la m wa.

⁶⁰ La a Zezi leok-a lame n yeele: bas kũ-rãmbã tɩ b mum b kũum, la foo, kẽng n moon Wẽnnaam soolem koɛɛgã.

⁶¹ Ned a to leb n yeelame: Zu-soaba mam na n tũu yãmba, laa, sak-y tɩ m deng n tɩ pʋʋs m zaka rãmb wẽnd-na-taas la m wa.

⁶² A Zezi leoka yẽ yaa: ned sã n gãd wãk rũng sẽn tata, la a rat n wẽnemd n ges a poorẽ, yẽ ka zems tɩ kẽ Wẽnnaam soolma ye.