A Luk Sõng 6 - KÃAB-PAALGÃ KOE-NOOGO

A Zezi karen-biisã yãgsa kood vʋʋsg daare

¹ Zuif-rãmbã vʋʋsg daar a yen, a Zezi dag n pɩʋʋgda pʋto. Bãmb karen-biisã ra yãgsda kood n tẽgd n wãbdẽ.

² Fariisẽ-dãmba kẽer soka bãmb yaa: Yaa bõe tɩ yãmb maand bũmb sẽn ka zems tɩ maan vʋʋsg daare?

³ A Zezi leok-b lame yaa: Yãmb ka karem bũmb ning a Daviid sẽn maan kom sẽn tar yẽ ne a tũud-n-taasã wakate,

⁴ sẽn yɩ wãn tɩ yẽ kẽ Wẽnnaam doogẽ wã n deeg kaset bur paadma n wãb la a kõ a tũud-n-taasã, baa ne ned sẽn ka tar noor tɩ rɩ, sã n ka maan-kʋʋdbã balã laa?

⁵ La a Zezi yeela bãmb tɩ Ninsaal Bi-ribla yaa vʋʋsg daarã Zu-soaba.

Dao nug sẽn ki

⁶ Zuif-rãmbã vʋʋsg daar a to, a Zezi kẽe karen-doogẽ wã n zãmsd neba. Dao n dag n be be t'a nug rɩtg ki.

⁷ Tõog karen-saam-dãmbã ne Fariisẽ-dãmbã da gũusda a Zezi n dat n ges b sã n na n maaga ned vʋʋsg daarã. Dag n yaa sẽn na n yɩl n paam bũmb n dõd a Zezi.

⁸ La a Zezi da mii b tagsdã. Dẽ, b yeela rao ninga nug sẽn ki wã t'a yik n yals sʋk be. Yẽ yik n yaasa yĩngri.

⁹ Dẽ, a Zezi yeela bãmb yaa: M sokda yãmba, noor beeme tɩ maan neer vʋʋsg daare, wall tɩ maan wẽnga? Tɩ fãag neda, wall tɩ kʋ-a?

¹⁰ Dẽ, a Zezi wẽnemd n gesa bãmb fãa n yeel rao wã t'a tẽeg a nugã. Yẽ tẽegame la a nugã vʋʋgame.

¹¹ Bãmb sũyã puuga wʋsg tɩ b yẽsd ne taab n baood b sẽn na n maan a Zezi bũmb ninga.

A Zezi tũusa karen-biis piig la a yiibu

¹² Wakat kãnga, a Zezi kẽnga tãng zug n na n tɩ pʋʋse. La bãmb pʋʋsa Wẽnnaam yʋngã tɛk fãa.

¹³ La beoogã sẽn vẽege, bãmb boola b karen-biisã n tũus bãmb piig la a yiibu, n bool-b tɩ tẽn-tʋmdba.

¹⁴ Yaa a Sɩmo bãmb sẽn pʋd a yʋʋr t'a Pɩyɛɛrã, ne a ba-biiga Ãndre, a Zak la a Zã, la a Filip ne a Bartelemi,

¹⁵ a Matye la a Toma, la a Alfe biig a Zak ne a Sɩmo b sẽn boond tɩ zelot,

¹⁶ la a Zak biig a Zuud, la a Zudas Iskaryo sẽn lebg zãmb soabã.

A Zezi moonda neb kʋʋng koɛɛga

¹⁷ A Zezi yii ne b karen-biisã tãngã zug n sig n yaas tẽnga. Bãmb karen-bi wʋsgã da bee be ne neb kʋʋng wʋsg sẽn yi Zude soolem fãa, la Zeruzalɛm la Tɩɩr tẽn-kɩremse ne Sɩdõ. Bãmb da waame n na n kelg a Zezi, la b paam tɩ b yiis b bãasã n maag-ba.

¹⁸ Zĩn-dẽgd sẽn da namsd-b rãmbã paama maagre.

¹⁹ La neb kʋʋngã fãa ra baood n sɩɩs a Zezi. Bala, pãng n da yit a Zezi nengẽ n maagd bãmb fãa.

Barka, la toogo

²⁰ Dẽ, a Zezi zẽka b neng n ges b karen-biisã n yeel yaa: bark bee yãmb sẽn ya naong rãmba zutu, bala, Wẽnnaam soolem yaa yãmb dẽnda.

²¹ Bark bee yãmb kom sẽn tar moasã wã zutu, bala, yãmb na n tɩgame. Bark bee yãmb sẽn yãbd moasã wã zutu, bala, yãmb na la.

²² Bark bee yãmb zutu, nebã sẽn na n kisg yãmba, la b bak yãmb toore, la b tʋ yãmba, la b tõdg yãmb yʋʋrã wa bõn-wẽnga, Ninsaal Bi-riblã yĩnga.

²³ Bɩ y maan sũ-noog da-kãnga n kɩdme, tɩ bõe yãmb keoor na n yɩɩ kãseng arzãn pʋgẽ. Bala, bãmb ba-rãmb dag n maanda Wẽnnaam no-rɛɛsdbã me a woto.

²⁴ La yãmb sẽn ya arzegs rãmbã, yãmb na paam toogo, bala, yãmb tara y belsgo.

²⁵ Yãmb sẽn dɩt n tɩgd moasã wã, yãmb na paam toogo, bala, kom na n yõka yãmba. Yãmb sẽn laad moasã wã, yãmb na paam toogo, bala, yãmb na n paama sũ-sãoong la nintãm.

²⁶ Yãmb na paam toogo, neba fãa sã n pẽgd yãmba, bala, ba-rãmba ra maanda belgr no-rɛɛsdbã a woto.

Nonglem bɛɛbã yĩnga

²⁷ La mam yeta yãmba, yãmb sẽn kelgd maamã, tɩ y nong y bɛɛbã, la y maan neb nins sẽn kis yãmbã neere.

²⁸ Ning-y neb nins sẽn kãabd yãmb wẽngã zut barka, la y pʋʋs neb nins sẽn maand yãmb wẽngã yĩnga.

²⁹ Ned sã n wẽ fo yɛgd pɛka, bɩ f wẽnemd a to wã me n kõ-a. Ned sã n deeg fo fu-bedre, bɩ f bas-a t'a reeg f fu-bilã me.

³⁰ Ned ning fãa sẽn kos foom bũmb bɩ f kõ-a, la ned sã n dɩk fo paoongo, bɩ f ra sok-a ye.

³¹ Bũmb ninga yãmb sẽn dat tɩ neba maan yãmbã, bɩ yãmb me maan bãmb me a woto.

³² Yãmb sã nong neb nins sẽn nong yãmbã bala, bõe bark la yãmb na n paame? Bala, yel-wẽn maandbã me nonga neb nins sẽn nong bãmbã.

³³ La yãmb sã n maand neb nins sẽn maand yãmb neerã bal neere, bõe bark la yãmb na n paame? Bala, yel-wẽn maandbã me maanda a woto.

³⁴ La yãmb sã n pengd neb nins yãmb sẽn tẽed tɩ b na n paam n lebsa yãmbã bala, bõe bark la yãmb na n paame? Bala, yel-wẽn maandbã me pengda taaba, tɩ b tõe n leb n deeg sẽn zem a woto.

³⁵ La, nong-y yãmb bɛɛba. Maan-y-b neere, la y peng n da tẽed tɩ b na lebs-y ye. La yãmb keoor na n yɩɩ kãsenga, la yãmb na n yɩɩ Wẽnnaam sẽn be saasẽ saasẽ wã kamba. Bala, bãmb yaa sõama zɩ-beoog rãmbã ne nin-wẽnsã yĩnga.

³⁶ Bɩ y yɩ nimbãan-zoɛtba, wa yãmb ba wã sẽn ya nimbãan-zoɛtã.

Taab bʋʋd kaoobo

³⁷ Da bʋ-y ned bʋʋd ye, la b kõn bʋ yãmb bʋʋd ye. Da kao-y ned bʋʋd ye, la b kõn kao yãmb bʋʋd ye. Maan-y sugri, la b na maan yãmb me sugri.

³⁸ Bɩ y kõ la b na kõ yãmba. B na n maka sõama n kõ yãmba, n dĩ, n yegse, n ning tɩ sudgi. Bala, ne makdg ninga yãmb sẽn makd n kõt nebã, Wẽnnaam na n maka ne rẽnda n kõ yãmba.

³⁹ A Zezi wẽe bãmb yel-bũnd me n yeele: Zoang tõe n tɛɛ zoang sɩda? Bãmb b yiibã fãa kõn lʋɩ bokẽ sɩda?

⁴⁰ Karen-biig ka yɩɩd a karen-saamb ye. La karen-biig fãa sẽn paam zãmsg n taas lebga wa a karen-saamba.

⁴¹ Yaa bõe tɩ fo get moogã sẽn be f ba-biigã nifẽ wã, n yaool n ka ne sug-raoogã sẽn be fo mengã rẽndẽ wã?

⁴² Fo sẽn ka ne sug-raoogã sẽn be fo nifẽ wã, fo na n yɩɩ a wãn n yeel f ba-biigã t'a bas tɩ f yãk moogã sẽn be a nifẽ wã? Zãmb soaba, deng n yãk sug-raoogã sẽn be fo nifẽ wã, la rẽ, fo na n yãa sõama n tõog n yãk moogã sẽn be f ba-biigã nifẽ wã.

Tɩɩg ne a biisi

⁴³ Tɩ-sõng ka be n womd bi-wẽns ye, la tɩ-wẽng me ka be n womd bi-sõama ye.

⁴⁴ Bala, b bãngda tɩɩg fãa a biisẽ. B ka wobd kankam gõaag zug ye, la b ka kaood sib kɛglg zug ye.

⁴⁵ Nin-sõng yiisda bõn-sõng a laog-sõngã bĩngr zĩigẽ sẽn be a sũurẽ, la nin-wẽng yiisda wẽnga a laog-wẽngã bĩngr zĩigẽ. Bala, yaa bũmb ning sẽn pid sũurã n yit noorẽ wã.

Rot a yiib yẽbgre

⁴⁶ Bõe yĩng tɩ yãmb boond maam tɩ Zu-soaba! Zu-soaba! La y ka maand mam sẽn yet yãmbã?

⁴⁷ Ned ning fãa sẽn wat mam nengẽ n kelgd mam goama n sakdẽ, mam na n wilga yãmb yẽ sẽn wẽnd ned ninga.

⁴⁸ Yẽ wẽnda wa rao sẽn yik n na n me a roogo. Yẽ tuu bog-zulunga, n yẽbg roogã kugr zugu. La ko-kãseng sẽn wa, ko-zoetma zoeeme n wẽ roogã, la a ka tõog n miim-a ye, roogã meebã sẽn da ya sõama wã yĩnga.

⁴⁹ La ned ning sẽn wʋmd n ka sakdẽ wã, yẽ wẽnda wa rao a yen sẽn me a roog tom zugu, n ka tuk bok ye. Ko-zoetma zoee n wẽe roogã, la tao-tao bala, a lʋɩɩme, la ro-kãnga sãoongã yɩɩ kãsenga.