A Luk Sõng 2 - KÃAB-PAALGÃ KOE-NOOGO

A Zezi rogem

¹ Ra-kãense, Sezaar a Ogust yiisa tõog n yeel tɩ b sõd a soolmã nebã fãa.

² Sõd-kãng sẽn yɩ dẽenem soabã zĩnda Siiri Gʋvɛrneer a Kiriniyus zamaanẽ.

³ Ned fãa kuiisa a meng tẽngẽ tɩ b tɩ sõd-ba.

⁴ A Zozɛf me yii Nazarɛt sẽn be Galile soolmẽ n kẽng a Daviid tẽng sẽn boond tɩ Betlehɛm n be Zude soolmẽ, yẽ sẽn ya a Daviid buud la a yagengã yĩnga.

⁵ Yẽ kẽnga be ne a pʋg-bil a Maari tɩ b sõd-a. La a Maari da tʋtame.

⁶ La bãmb sẽn be be, a Maari rogem wakat taame.

⁷ La yẽ roga a bi-ribl kãsengã, n vil-a ne peend n gãneg rũms rɩɩb koglg pʋgẽ, weer sẽn ka be sik-zĩigẽ wã yĩnga.

Pe-kɩɩmb ne malegse

⁸ La tẽn-kãng pe-kɩɩmb n dag n be we-kɛɛng ne yʋng n gũud b piisi.

⁹ Zu-soabã malɛk puka a meng ne bãmba, la Zu-soabã ziir vẽenem yãgame n gũbg bãmba. Dabeem kãseng yõka bãmba.

¹⁰ La malɛkã yeel-b lame yaa: Da zoe-y rabeem ye, bala, mam togsda yãmb koe-noog sẽn na n wa ne sũ-no-kãseng nebã fãa yĩnga.

¹¹ Fãagd la b rog yãmb yĩng dũnna, a Daviid tẽngẽ wã. Bãmb la Kiristã, Zu-soabã.

¹² Ad bãnd ning sẽn na n kɩt tɩ yãmb bãng bãmba: Yãmb na n yãa bi-pɛɛlg sẽn vil ne peend n gãe rũms rɩɩb koglgẽ.

¹³ La zĩig pʋgẽ bala, malegs wʋsg yii arzãn n waa n paas malɛkã n pẽgd Wẽnnaam n yetẽ:

¹⁴ Ziiri! Wẽnnaam sẽn be hal saasẽ saasẽ! Laafɩ bee dũni zugu, neb nins bãmb sẽn nongã sʋka.

¹⁵ Malegsã sẽn bas bãmb n leb n leb arzãna, pe-kɩɩmbã yeela taab yaa: Wa-y tɩ d kẽng Betlehɛm n tɩ ges bũmb ning sẽn maan tɩ Zu-soabã togs tõndã.

¹⁶ La bãmb kẽnga tao-tao n tɩ yã a Maari ne a Zozɛf la bi-pɛɛlgã sẽn gãe rũms rɩɩb koglgẽ wã.

¹⁷ Bãmb sẽn yã bi-pɛɛlgã, b togsa bũmb nins fãa b sẽn dag n gom ne bãmb biigã wɛɛngẽ wã.

¹⁸ Yellã linga neb nins fãa sẽn wʋm bũmb nins pe-kɩɩmbã sẽn togsd bãmbã.

¹⁹ A Maari bĩnga gom-kãens fãa a sũurẽ n tagsd b yelle.

²⁰ Pe-kɩɩmbã lebgame, n waoogd Wẽnnaam la b pẽgd bãmba, bũmb nins fãa bãmb sẽn wʋme, la b sẽn yã tɩ sɩd yaa wa malɛkã sẽn da togs bãmbã yĩnga.

B waa ne a Zezi wẽnd-doogẽ

²¹ La rasem a nii daarã sẽn ya biigã bãong kẽesg daarã sẽn ta, b pʋda a yʋʋr t'a Zezi, wala malɛkã sẽn dag n yeel sẽn deng a ma sẽn na n dɩk a pʋgã.

²² La a Maari ne biigã yɩlgr wakat sẽn pidi, wa sẽn zems ne a Moyiis tõogã, yẽ ne a Zozɛf talla biigã n kẽng Zeruzalɛm n na n tɩ kõ Zu-soabã.

²³ Bãmb maana wa sẽn gʋls Zu-soabã tõog pʋgẽ n yetẽ tɩ b tog n dɩka bi-ribl rẽeng fãa n kõ Zu-soabã.

²⁴ La b maana wal a yiib bɩ man-wall-bi a yiib maoongo, wa sẽn gʋls Zu-soabã tõog pʋgẽ wã.

²⁵ La mik rao a yen n da be Zeruzalɛm n boond t'a Sɩmyõ. Rao-kãng dag n yaa nin-tɩrga, la a sakda Wẽnnaam. Yẽ dag n gũuda Israyɛl belsgo, la Sɩɩg-sõng dag n bee a zugu.

²⁶ Sɩɩg-sõng dag n wilg-a lame t'a kõn ki, hal t'a yã Kiristã, Zu-soabã sẽn na n tʋmã.

²⁷ Sɩɩg-sõng kɩtame t'a Sɩmyõ kẽng wẽnd-doogẽ wã. La a Zezi ba wã ne b ma wã sẽn tall bãmb n wa n na n pids bũmb ning tõogã sẽn yetã,

²⁸ a Sɩmyõ deega biigã a nusẽ, n pẽg Wẽnnaam n yeele:

²⁹ Zu-soaba! Moasã, yãmb basa y tʋmtʋmdã t'a loogd ne laafɩ. Wa yãmb sẽn dag n yeelã,

³⁰ mam nin yãa fãagr ning yãmb sẽn kõ tõndã,

³¹ fãagr y sẽn segl neba fãa nifẽ wã.

³² A yaa vẽenem sẽn vẽnegd bu-zẽmse, la a yaa Israyɛl sẽn ya yãmb nebã ziiri.

³³ B sẽn gom a Zezi yell a woto wã yɛɛsa b ba ne b ma.

³⁴ A Sɩmyõ ning-b-la barka, la a yeel a Zezi ma a Maari yaa: Ad bi-kãngã waa Israyɛl neb wʋsg lʋɩɩse la b yikr yĩnga, la a na n yɩɩ bãnd neb sẽn na n zãgse.

³⁵ A na n puka neb wʋsg sũy pʋsẽ yɛla, la sũ-sãoong sẽn wẽnd sʋʋg sẽn kõs ned n na n paam foom.

³⁶ Wẽnnaam no-rɛɛs-poak a ye n da be be. A yʋʋr la a Ãnn, a Fanuwɛl bi-pugla, n ya a Azɛɛr buudu. A ra kʋʋla wʋsgo. A zĩnda ne a sɩdã yʋʋm a yopoe a pʋgsademd wakate,

³⁷ n lebg pʋgkõore, n kell n paa a woto. La baa ne a sẽn tar yʋʋm pis-nii la a naasã, a dag n ka yit wẽnd-doogẽ wã ye. A dag n maanda Wẽnnaam tʋʋmd wĩntoog ne yʋngo, ne no-loeer la pʋʋsgo.

³⁸ Yẽ me waa wẽnd-doogẽ wã wakat kãng bala. Yẽ dag n pẽgda Wẽnnaam la a gomd ne neb nins sẽn dag n gũud Zeruzalɛm fãagrã a Zezi yelle.

A Maari ne a Zozɛf leba Nazarɛt

³⁹ La bãmb sẽn pids bũmb fãa wa sẽn zems Zu-soabã tõogo, a Zozɛf ne a Maari leb n leba b tẽngẽ, Nazarɛt.

⁴⁰ Biigã ra bɩtame, la a pãng paasdame, la a da pida ne yam, la Wẽnnaam barkã da bee a zugu.

Biig a Zezi bee wẽnd-doogẽ wã

⁴¹ A Zezi ba-rãmbã dag n kẽngda Zeruzalɛm yʋʋmd fãa, zʋʋg-n-basã kibs yĩnga.

⁴² A Zezi sẽn ta yʋʋm piig la a yiibu, b kẽnga Zeruzalɛm wa sẽn zems kibsã miningu.

⁴³ La kibsã sẽn sa tɩ bãmb lebg n kuiisẽ, biig a Zezi paa Zeruzalɛm, la b ba-rãmbã ka bãng ye.

⁴⁴ Bãmb sẽn dag n tags t'a Zezi bee b kẽnd-n-taasã nengẽ wã yĩnga, b kẽna daar a ye kẽnde, n yaool n gẽes a Zezi b mitinsã sʋka.

⁴⁵ La b ka yãnd-b ye. La b lebg n lebda Zeruzalɛm la b gẽesd a Zezi.

⁴⁶ Ra-yɩt-n-daarã, bãmb yãnda a Zezi wẽnd-doogẽ wã tɩ b zĩ karen-saam-dãmbã sʋk n kelgd-b-la b sogsd-b sokdse.

⁴⁷ A Zezi bãngrã ne b leokdsã linga neb nins fãa sẽn da wʋmd bãmbã.

⁴⁸ A Zezi ba-rãmbã sẽn yãnd-bã, b yɛɛsame. A Zezi ma wã yeel-b lame yaa: M biiga, yaa bõe tɩ fo maan tõnd a woto? Gese, maam ne f baaba baoo foom ne sũ-sãanga.

⁴⁹ A Zezi yeel-b lame yaa: Bõe yĩng tɩ yãmb da baood maam? Yãmb da ka mi tɩ mam tog n bee m ba wã roogẽ laa?

⁵⁰ La bãmb ka wʋm bũmb ning a Zezi sẽn da gomd ne bãmbã võor ye.

⁵¹ Dẽ poore, a Zezi tũu bãmb n leb Nazarɛt, la b saka bãmb noore. Bãmb ma wã dag n bĩngda bõn-kãens fãa a sũurẽ.

⁵² A Zezi ra bɩtame, tɩ b yamã paasdẽ, la b paama Wẽnnaam barka la ninsaalb rẽnd me.